Ձեր վստահելի աղբյուրը

Ուկրաինան մտադիր է Ռուսաստանի առաջ բարձրացնել սեփական տնտեսության վրա 2015թ.-ի հունվարի 1-ից Եվրասիական տնտեսական միության ստեղծումից, ինչպես նաև միությանը նոր պետությունների, մասնավորապես Հայաստանի միանալուց հետո առաջացող հնարավոր ռիսկերի հարցը: Այս մասին «Լիգա» ուկրաինական պարբերականի փոխանցմամբ, հայտարարել է Ուկրաինայի ԱԳՆ տեղեկատվական քաղաքականության գործակալության տնօրենի պաշտոնակատար Վասիլի Զվարիչը:

«Մենք կբարձրացնենք այն հարցը, թե պետք է արդյոք Հայաստանն, օրինակ, վերանայի մաքսատուրքերը Առևտրի համաշխարհային կազմակերպության անդամ մյուս պետությունների, այդ թվում՝ Ուկրաինայի հետ: Ինչպես գիտենք՝ Հայաստանը նույնպես ԱՀԿ անդամ է»,- ասել է Զվարիչը:

Նա նշել է, որ Ուկրաինան մինչև հուլիսի 30-ը սպասում է ԵՄ և Ուկրաինայի միջև ասոցացման համաձայնագրի իրագործման հետ կապված հնարավոր ռիսկերի վերաբերյալ ՌԴ գնահատականներին: Զվարիչը հիշեցրել է, որ Ուկրաինայի արտգործնախարար Պավել Կլիմկինը մասնակցել է Ուկրաինա-ԵՄ-Ռուսաստան եռակողմ խորհրդակցություններին՝ կապված ԵՄ հետ Ուկրաինայի ասոցացման համաձայնագրի իրագործման, մասնավորապես ազատ առևտրի գոտու գործառնության հետ:

«Նիստի արդյունքներով ընդունվել է համատեղ հայտարարություն և համաձայնեցվել կողմերի գործողությունների հետագա ալգորիթմը: Մասնավորապես մենք ակնկալում ենք, որ մինչև հուլիսի 30-ը ռուսական կողմը մեզ կտարամադրի սեփական գնահատականները ԵՄ և Ուկրաինայի միջև ասոցացման համաձայնագրի իրագործման հետ կապված իրական ռիսկերի մասին: Մինչև սեպտեմբերի 1-ը այդ փաստարկներն ու գնահատականները պետք է մշակվեն փորձագիտական մակարդակով, իսկ սեպտեմբերի 12-ին նախատեսվում է Ուկրաինայի, ԵՄ և ՌԴ միջև անցկացնել նախարարների մակարդակով եռակողմ հանդիպման հաջորդ փուլը»,- տեղեկացրել է Ուկրաինայի ԱԳՆ ներկայացուցիչը:

Հիշեցնենք, որ ԵՄ և Ուկրաինայի միջև հունիսի 27-ին ստորագրվել է Ասոցացման և խորը ու համապարփակ ազատ առևտրի գոտու մասին պայմանագիրը, որը ուկրաինական կողմը նախատեսում է վավերացնել մինչև սեպտեմբեր: Մոսկվան բազմիցս մտահոգություն է հայտնել, որ այդ համաձայնագրով առաջանում են ռիսկեր ռուսական շուկայի համար:

Ըստ ռուսական կողմի՝ Ուկրաինան, լինելով ԱՊՀ ազատ առևտրի գոտու անդամ, օգտվում է ռուսական շուկա առանց խոչընդոտների մուտքի հնարավորությունից: Իսկ դա նշանակում է, որ եվրոպական ապրանքները Ուկրաինայի տարածքով կներթափանցեն ռուսական շուկա՝ ոչ մրցակցային պայմաններում վնասելով ռուսական արտադրանքին:

Հիշեցնենք նաև, որ 2014թ-ի մայիսի 29-ին Ռուսաստանի, Բելառուսի և Ղազախստանի միջև ստորագրվել է Եվրասիական տնտեսության միության ստեղծման մասին պայմանագիրը, որը երկրների խորհրդարաններում վավերացվելուց հետո ուժի մեջ կմտնի 2015թ-ի հունվարի 1-ից: Միությանը Հայաստանի անդամակցության մասին օրերս հայտարարել է Ղազախստանաի արտգործնախարար Եդրան Իդրիսովը, ում խոսքով՝ ԵՏՄ-ին Հայաստանի անդամակցության համաձայնագիրն, ամենայն հավանականությամբ, կստորագրվի այս տարվա հոկտեմբերին: Նշենք, որ Հայաստանը Ուկրաինայի հետ միասին նույնպես ԱՊՀ ազատ առևտրի գոտու անդամ է: