Ձեր վստահելի աղբյուրը

Մոսկովյան մետրոյում տեղի ունեցած խոշոր վթարի հետևանքով տուժած 20-ամյա Մերի Քոչարյանի առողջական վիճակը վիրահատությունից հետո շարունակում է մնալ ծայրահեղ ծանր: Այդ մասին Panorama.am-ին տեղեկացրեց ՌԴ-ում ՀՀ դեսպանատան մամուլի ծառայության ղեկավար Էդուարդ Ջամբազյանը:

Հիշեցնենք, 20-ամյա Մերի Քոչարյանը Մոսկվայի մետրոյի վթարից հետո տեղափոխվել էր Մոսկվայի հ.67 քաղաքային հիվանդանոց ողնաշարի կոտրվածքով և գլխուղեղի փակ վնասվածքով:

«Վիրահատությունն ուղղված է եղել ողնաշարի գործունեության կարգավորմանը, բայց վիճակը շարունակում է մնալ ծայրահեղ ծանր: Բժիշկներն անում են ամեն հնարավորը` վիճակը կայունացնելու համար», -հավելեց Ջամբազյանը:

Ինչ վերաբերում է նույն վթարի հետևանքով տուժած 23-ամյա Աննա Բուլղադարյանին, ով աջ ճաճանչոսկրի կոտրվածքով և տրավմատիկ ցնցումով տեղափոխվել էր Մոսկվայի հ.79 քաղաքային հիվանդանոց, Ջամբազյանն ասաց, որ նրա մասին տեղեկությունները հուսադրող են:

«Նրան արդեն վերակենդանացման բաժանմունքից տեղափոխել են հիվանդասենյակ»,-փոխանցեց ՌԴ-ում ՀՀ դեսպանատան ներկայացուցիչը:

Հարակից հրապարակումներ`

ԱԳՆ. Հայազգի երկու տուժածները գտնվում են վերակենդանացման բաժանմունքներում

Մոսկվայի մետրոպոլիտենում վթարի հետևանքով տուժածների մեջ հայեր կան

Մոսկվայի մետրոյում տուժած 20-ամյա հայուհուն վիրահատում են