Ձեր վստահելի աղբյուրը

Հայաստանում վերջին երկու ամիսներին դիտվում էր էնտերովիրուսային վարակով պայմանավորված շճային մենինգիտների հիվանդացության աշխուժացում, սակայն վերջին օրերին հիվանդության դեպքերը կարծես թե նվազում են: Այս մասին այսօր լրագրողների հետ հանդիպման ժամանակ ասաց մանկաբույժ Էլմիրա Մինասովան:

Նրա խոսքերով` հիվանդությունն ունենում է սուր սկիզբ` բարձր ջերմություն, անտանելի գլխացավ, ընդհանուր թուլություն, անզուսպ փսխումներ: Հատկանշական է հիվանդների արագ ապաքինումը` առավելագույնը հոսպիտալացվում են 10 օր:

Ըստ Է.Մինասովայի` տարիքային և սեզոնային որևէ օրինաչափություն չկա. հիվանդանում են բոլորը, տարվա բոլոր եղանակներին: Սակայն դեպքերը գրանցվել են մինչև 18 տարեկանների շրջանում, գերազանցապես` 2-10 տարիքային խմբում:

Մանկաբույժի խոսքերով` դա վարակ է, որը փոխանցվում է և՛ օդակաթիլային ճանապարհով, և՛ շփվելով, սերտ կոնտակտի միջոցով: Է.Մինասովան միաժամանակ նշեց, որ մենինգիտ հիվանդություն չի գրացվել Հայաստանում:

«Մենիգակոկային ինֆեկցիան հանգեցնում է մենինգիտի: Հայաստանում, բարեբախտաբար, մենինգակոկային ինֆեկցիայից առաջացած սուր մենինգիտի դեպքեր չեն գրանցվել»,- ընդգծեց մանկաբույժը:

Նշենք, որ մենինգիտը գլխուղեղի և ողնուղեղի թաղանթների բորբոքումն է:

Ըստ նրա՝ վերջին շրջանում բնակչության զգոնությունը բավական բարձրացել է, ծնողները հենց նկատում են ջերմության բարձրացում, փսխումներ և գլխացավ երեխայի մոտ, անմիջապես բերում են հիվանդանոց:

Մանկաբույժը էնտերովիրուսային վարակներից պաշտպանվելու համար խոհուրդ է տալիս պահպանել անձնական հիգիենայի կանոնները (հաճախակի լվանալ ձեռքերը, հազի և փռշտալու հիգիենան), միրգը և բանջարեղենը լավ լվանալ, խուսափել էնտերովիրուսային վարակներով հիվանդների հետ սերտ շփումից, բնակարանը հաճախակի օդափոխել։