Ձեր վստահելի աղբյուրը

Մայր Աթոռ Սուրբ Էջմիածինը խորը մտահոգությունն է հայտնում Թբիլիսիի հայկական եկեղեցու դեմ կատարվածի առնչությամբ և դատապարտում ազգային թշնամանք և կրոնական անհանդուրժողականություն հրահրող այս գործողությունը:

Մայր Աթոռի Տեղեկատվական համակարգի տարածած հաղորդագրության մեջ նշվում է, որ այդ սադրիչ ոտնձգությունը վերջին տարիներին Վրաստանում տարբեր կազմակերպությունների ու անհատների` այդ թվում վրաց որոշ հոգևորականների կողմից տարածվող հակահայկական տրամադրությունների ցավալի հետևանքն է:

«Ծայրահեղական նման դրսևորումները անհարիր են հայ և վրաց ժողովուրդների բարեկամական հարաբերությունների ոգուն, որը պատմական մեր ընդհանուր անցյալի թանկ ձեռքբերումներից է: Մայր Աթոռ Սուրբ Էջմիածնի ակնկալությունն է, որ Վրաստանի իշխանությունները պատասխանատվության ենթարկեն եկեղեցու հանդեպ ոտնձգություն կատարած բոլոր անձերին և ապահովեն Վրաստանում Հայ Եկեղեցու և հայ համայնքի անվտանգությունն ու կյանքի բնականոն ընթացքը»,- ասված է հայտարարության մեջ:

Հիշեցնենք, որ հուլիսի 19-ի երեկոյան Թբիլիսիի հայկական Սուրբ Էջմիածին եկեղեցու վրա 50 հոգանոց խումբ է հարձակվել, ծեծել հոգևորականներին ու հայ հավատացյալներին:

Նախորդող նորություններ՝
Ջավախահայ պատգամավորը՝ Թբիլիսիի հայկական եկեղեցու վրա հարձակման մասին
Ջավախահայությունը դատապարտում է Թբիլիսիի հայկական եկեղեցու նկատմամբ կատարվածը
Հարձակում Թբիլիսիի հայկական եկեղեցու վրա, հնչել են կրակոցներ, կան տուժածներ