Ձեր վստահելի աղբյուրը

Ադրբեջանական դիրքերից կրակոցներ են հնչում Տավուշի մարզի դաշտերի ուղղությամբ ու խանգարում գյուղատնտեսական աշխատանքներին:

Մովսես համայնքի ղեկավար Արարատ Ավալյանը Panorama.am-ի թղթակցին տեղեկացրեց, որ երեկ կրակել են դաշտում աշխատող տեխնիկայի վրա:

«Հացահատիկահավաք կոմբայնի վրա են կրակել: Կոմբայնավարները թաքնվել են, ուշ ժամի տարածքից հանել ենք, ուրիշ տարածք ուղարկել, որ անվտանգ է»,- ասաց նա:

Գյուղի վրա ևս կրակոցներ լինում են, բայց դրանք, համայնքի ղեկավարի խոսքով, այդքան չեն անհանգստացնում, որքան դաշտերի ուղղությամբ հնչողները. «Հիմա ցորենի և գարու բերքն ենք հավաքում, չեն թողնում, որ գյուղացին աշխատի»:

Տավուշի մարզի սահմանամերձ համայնքների ղեկավարները դիմել են Կարմիր Խաչի միջազգային կազմակերպություն, որպեսզի միջնորդեն և գյուղացիները կարողանան անվտանգ շարունակել բերքահավաքը:

Չինարիի գյուղապետ Սամվել Սաղոյանը Panorama.am-ի թղթակցի հետ զրուցում ասաց, որ իրենց դաշտերի ուղղությամբ ևս կրակոցներ կան և խանգարում են աշխատանքներին:

Արարատ Ավալյանն էլ հավելեց, որ դիմել են, որպեսզի Կարմիր Խաչը միջնորդի կամ մարդ ուղարկի, որ կազմակերպության մեքենայով կանգնեն տարածքում, գյուղացիներն էլ կարողանան աշխատել և բերքահավաքն անել: