Իրավաբան. Հայրապետյանի կալանավորմամբ ոուսական կողմը մի կրակոցով երկու նապաստակ է սպանում
Ռուսաստանում կալանավորված գործարար Լևոն Հարայետյանի առողջական վիճակը լավ չէ: Նա գտնվում է կալանավայրի բուժմասում: Այս մասին այսօր մամուլի ասուլիսում Ռուսաստանից հեռախոսակապով հայտնեց իրավաբան Արթուր Սաֆարյանը:
Նա տեղեկացրեց, որ Ռուբեն Մարգարյանի գլխավորությամբ աշխատող փաստաբանական խումբը փոխվելու է, ավելի ուժեղ խումբ է աշխատելու:
Նրա խոսքով, Մոսկվայի քաղաքային դատարան խափանման միջոցը փոխելու մասին միջնորդություն է ներկայացված, երկշաբաթյա ժամկետում պետք է դատարանը պատասխանի: Միջնորդություն է ներկայացվել նաև, որպեսզի մշտական հանձնաժողով ստեղծվի, որը կուսումնասիրի գործարարի առողջական վիճակը, որպեսզի խափանման միջոցը փոխվի տնային կալանքի, բայց դա, ըստ փաստաբանի, քիչ հավական է:
Նաև աշխատանքներ են տարվում այն ուղղությամբ, որ գոնե նորմալ հիվանդանոց տեղափոխեն, որտեղ հսկիչներ կլինեն Լևոն Հայրապետյանի կողքին:
Արթուր Սաֆարյանը շեշտեց, որ համաձայն Ռուսաստանի գործող օրենքի, այն հիվանդությունների ցանկը, որ ունի Լևոն Հայրապետյանը, թույլ չի տալիս, որ նրան կալանավորեն, բայց դատարանը հաշվի չի առել դա:
«Գործը պատվիրողը ինչ պետք է հաշվի առնի: Իրեն որպես կասկածյալ են ներգրավել, բայց դեռ պարզ չի, թե ինչում են մեղադրում: Հուլիսի 24-ին նոր մեղադրանք են ներկայացնելու, արդեն փաստաբանները կնայեն և կտեսնեն, թե կոնկրետ ինչում են մեղադրում»,- ասաց նա:
Ըստ իրավաբանի, Լևոն Հայրապետյանի կալանավորման մեջ կա և տնտեսական և քաղաքական ենթատեքստ. «Եթե հետևեք Ադրբեջանական մամուլի և բլոգների խրախճանքին, կհասկանաք, թե որը ինչ է: Կա բաժնետոմսերի հարց: Ազդելով Լևոնի նման մարդու վրա, փորձում են ուրիշ մարդկանց ուրիշ բան հասկացնել: Ռուսական կողմը փորձում է մի կրակոցով երկու նապաստակ սպանել՝ և բաժնետոմսերի հարց լուծել, և Ադրբեջանին հաճոյանալ: Չի կարելի կասկածել, որ նա որևէ հանցանքի հետ երբևէ կապ է ունեցել»:
Նաիրի բժշկական կենտրոնի ղեկավար, նյարդաբան-պրոֆեսոր Հենրիկ Բակունցը, ով երկար ժամանակ եղել է Հայրապետյանի բժիշկը, ասաց, որ Մոսկվա է ուղարկել գործարարի հիվանդության պատմությունը:
«Նա տառապում է անոթային հիվանդություններով, ինչի հետևանքով ստենդավորվել է, վիրահատվել : Ունի ծանր աստիճանի շաքարային դիաբետ: Շատ դժվար էր նրան համոզել, որ զբաղվի իր առողջությունով: Այդպիսի հիվանդները պետք է տարեկան մեկ-երոկու անգամ բուժում ստանան: Նման հիվանդներին բանտային պայմանները հակացուցված են, չպետք է կալանովորվեն: Լևոն Հայրապետյանի դեպքում շատ վտանագավոր է, նա մեծ քանակությամբ դեղեր է ստանում ռեժիմով: Եթե ռեժիմը խախտվի, լուրջ հետևանքներ կառաջանան»,- ասաց նա:
Արցախյան պատերազմի հերոս, ԱԱԾ պահեստի գնդապետ Արթուր Ալեքսանյանն էլ հավելեց, որ գործարարի հետ կատարվածն Ադրբեջանական պատվեր է. «Ինչու չեն ազատում գրավի դիմաց: Մենք ինչքան փող պետք է կհավաքենք: Ինքն էլ է պատրաստ վճարել, բայց չեն վերցնում»:
Նա հավելեց, որ տեղեկություն ունի, ըստ որի, Հայաստանի և Արցախի պաշտոնյաները շատ բարձր մակարդակով այդ հարցով զբաղված են:
Ըստ նախաքննության, հանցագործությունը, որի վերաբերյալ քրեական գործ է հարուցվել և որի շրջանակներում կասկածվում է նաև Հայրապետյանը, իրականացվել է 2008-ին «ԱՖԿ Սիստեմա»-ին «Բաշնեֆթ»-ի վաճառքի մասին գործարքի ժամանակ, որում ներգրավված է եղել նաև Հայրապետյանը: Նշվում է, որ Հայրապետյանն այդ գործարքից խոշոր չափի գումար է ստացել: Հուլիսի 15-ի երեկոյան, գործարարին Դոմոդեդովո օդանավակայանում ձերբակալելուց հետո, Հայրապետյանի գրասենյակում կատարված խուզարկության ժամանակ առգրավվել են երկու տուփ փաթեթավորված փամփուշտներ:
Մոսկվայի Բասմանյան դատարանը բավարարել էր հայազգի գործարար Լևոն Հայրապետյանի նկատմամբ որպես խափանման միջոց կալանքն ընտրելու մասին նախաքննական մարմնի միջնորդությունը և որոշել, որ նա պետք է մնա կալանքի տակ մինչև սեպտեմբերի 15-ը: Դատարանը կալանքի մասին որոշումը հիմնավորել էր նրանով, որ ազատության մեջ Հայրապետյանը կարող է օգտագործել իր կապերը ու թաքնվել նախաքննությունից: Բացի այդ, նշված քրեական գործի շրջանակներում դատարանը կալանքի տակ է դրել «Բանեֆթի» ակցիաների վրա, որոնց արժեքը անցնում է 300 մլն ռուբլին:
Հայրապետյանը չի ընդունում իր նկատմամբ առաջադրված մեղադրանքը և հերքում դրանք:
Նախորդող նորություն՝
Կոմանդոս. Ադրբեջանի հատուկ ծառայությունները վաղուց էին հետևում Լևոն Հայրապետյանին
Պաշտպանական կողմը բողոքարկել է Հայրապետյանին կալանավորելու մասին դատարանի որոշումը
