Ձեր վստահելի աղբյուրը

«Հայկական կողմը բազմիցս ադրբեջանական կողմից զինադադարի խախտման բոլոր դեպքերի վրա հրավիրել է միջազգային հանրության ուշադրությունը, բայց ցավոք` կոչերը մնացել են անպատասխան կամ եղել են հավասարազոր կողմերին ուղղված: Թեև, իմ տպավորությամբ, միջազգային հանրությունը ինքնին լավ գիտակցում է, որ հենց ադրբեջանցիներն են պարբերաբար միակողմանի խախտում հրադադարը»,- Panorama.am-ի հետ զրույցում ասաց ՀՀԿ խմբակցության անդամ, ԱԺ Արտաքին հարաբերությունների հարցերի մշտական հանձնաժողովի նախագահ Արտակ Զաքարյանը` անդրադառնալով  հարցին` արդյոք հայկական կողմի արձագանքը սահմանում լարված իրավիճակին ու հաճախակիացած միջադեպերին համարժե՞ք է և կամ ժամանակը չէ՞, որ հայկական կողմը ավելի պահանջախնդիր լինի` հրավիրելով միջազգային հանրության ուշադրությունն այս ամենին:

Պատգամավորի խոսքով, միևնույն ժամանակ կա այն հանգամանքը, որ ԵԱՀԿ Մինսկի խումբը բազմիցս կարևորել է խնդրի խաղաղ կարգավորումը և այս իմաստով` դատելով Ադրբեջանի գործողություններից, կարելի է մեկ եզրահանգում անել. այն է` Մինսկի խմբի բանակցային գործընթացում Ադրբեջանը, կարծես թե, որևէ այլ մանևրելու հնարավորություն չունի, քան ընդունի մշակված առաջարկները և ի վերջո վաղ թե ուշ ճանաչի Լեռնային Ղարաբաղի անկախությունը, ինչը բնականաբար Ադրբեջանի համար ցանկալի ելք չի կարող լինել:

Եվ այդ իսկ պատճառով Ադրբեջանը պարբերաբար փորձ է անում բանակցությունները դուրս բերել իր տրամաբանական հունից` տանելով այն դեպի փակուղի և փոխարենն ավելացնել լարվածությունը սահմանային սահմանամերձ շրջաններում և նաև շփման գծում սադրանքների և դիվերսիաների միջոցով:

«Ադրբեջանը փորձում է ներքաշել Հայաստանին ու Լեռնային Ղարաբաղին սահմանային գործողությունների մեջ, ինչը հայկական կողմի համար անընդունելի է, որովհետև մենք խորապես համոզված ենք, որ Մինսկի խմբի ձևաչափում այդ խնդիրը պետք է լուծում ունենա, և դա հնարավոր է ու հիմնված է միջազգային բոլոր օրենքների և նորմերի վրա»,- նշեց Ա.Զաքարյանը:

Սակայն, ըստ մեր զրուցակցի`Ադրբեջանը նաև փորձում է օգտագործել այդ իրավիճակը. «Բայց  մեկ բան հստակ է` Հայաստանն ու հայկական զինված ուժերը ամբողջական վերահսկողության տակ են պահում բոլոր զարգացումները և անհրաժեշտության դեպքում հակահարված և համարժեք պատասխան են տալիս Ադրբեջանի կողմից վերջին շրջանում նկատելի դարձած ավելի ակտիվ ոտնձգություններին հայկական երկու հանրապետությունների սահմանների երկայնքով»:

Ինչ վերաբերում է այն հարցին, թե արդյոք ադրբեջանական կողմի այս ագրեսիվ պահվածքը պայմանավորված չէ այն հանգամանքով, որ աշխարհն այժմ իր ողջ ուշադրությունը կենտրոնացրել է թեժ կենտրոնների վրա` Սիրիա, Ուկրաինա, նաև իսրայելա-պաղեստինյան հակամարտություն և այսպիսով պատերազմի հավանականությունը չի մեծանում, Ա.Զաքարյանն ասաց, որ տարբեր առիթներով արտասահմանյան գործընկերների և հյուրերի հետ հանդիպումներում` թե Հայաստանում, թե դրսում միշտ հայտնել են այդ մտահոգությունը, որ ուկրաինական իրադարձությունները և ընդհանրապես` աշխարհում ցանկացած բախում և բախումային իրավիճակ անդրադարձ է ունենում Հայաստանի և Կովկասի վրա:

Նրա խոսքով,  Հայաստանը խիստ շահագրգռված է բոլոր տեսակի բախումների և հակամարտությունների խաղաղ կարգավորմամբ, որովհետև Ադրբեջանը իր ռազմական հռետորաբանությամբ ու հակահայկական հիստերիան շարունակում է կիրառել որպես քաղաքական գործունեության մեխանիզմ, գործիք` փորձելով հոգեբանական և այլ կարգի ճնշումներ գործադրել ինչպես Հարավային Կովկասի տարածաշրջանում, այնպես էլ` Մինսկի խմբի համանախագահ երկրների և բանակցային գործընթացի վրա:

«Մեր պարագայում ամեն ինչ շատ պարզ ու հասկանալի է` ամբողջությամբ ընկալելի են ադրբեջանական գործողությունները և մտավախություն չկա, թե Ադրբեջանը ինչ-որ առումներով կարող է հաջողությունների հասնել: Մտահոգությունն այն է, որ Ադրբեջանի գործողությունները կարող են ամբողջ տարածաշրջանը սպառնալիքների տակ դնել, ինչն, իհարկե, աշխարհում կավելացնի թեժ տարածաշրջաններն ու թեժ հակամարտությունները»,- նշեց նա ու հավելեց` մեր պարագայում հակամարտության կարգավորման թիվ մեկ ձևաչափը դա Մինսկի խմբի ձևաչափն է:

Panorama.am-ի հետ զրույցում  փորձագետ Տիգրան Աբրահամյանն էլ նշեց, որ Ադրբեջանի քայլերը սահմանագծին ևս մեկ առիթ են համախմբվելու, մոբիլիզացնելու ռեսուրսները, մտածելու ու գտնելու անհրաժեշտ մեխանիզմներ, որոնք մեզ հնարավորություն կտան առավելագույնս ապահովել մեր երկրի անվտանգությունը:

«Հակառակորդն իր սպառազինմամբ ու առաջնագծում տակտիկական մանևրներով փորձում է նոր իրավիճակ ստեղծել, իսկ այս իրավիճակում հայկական կողմը ժամանակի ընթացքում պետք է տեղ գրավի ոչ թե պատասխան տվողի, այլ առաջին համարով խաղացողի դիրքում»,- ասաց փարձագետը:

Անդրադառնալով այն հարցին, թե ժամանակը չէ՞, որ հայկական կողմը ավելի պահանջախնդիր լինի` հրավիրելով միջազգային հանրության ուշադրությունն այս ամենին Տիգրան Աբրահամյանն ասաց, որ միջազգային հանրությունն իր լռությամբ անշուշտ բարենպաստ պայմաններ է ստեղծում Ադրբեջանի համար՝ կիրառելու սադրանքների իր ողջ զինանոցը, ինչն անշուշտ մտահոգիչ է:

«Ներկայումս լայնամասշտաբ ռազմական գործողությունների վերսկսման հավանականությունը մեծ չեմ համարում, սակայն միջնորդների «փափկությունն» ու օրեցօր աճող ադրբեջանական ագրեսիան հղի է անկանխատեսելի իրավիճակներով»,- ընդգծեց նա, իսկ անդրադառնալով հայկական կողմի քայլերի համարժեքությանն` հավելեց.

«Ադրբեջանը հետ կկանգնի առաջնագծում սադրանքներ իրականացնելուց, եթե առաջին` նրան սպառնան միջազգային պատժամիջոցներ, երկրորդ` մտավախություն ունենա, որ հայկական կողմի պատասխան քայլը լարվածություն կամ խուճապ կառաջացնի իր երկրում»:

Նշենք, որ սահմանամերձ Չինարի, Այգեպար և մյուս գյուղերը դեռ մնում են հակառակորդի նշանառության տակ: