Ձեր վստահելի աղբյուրը

«Դա ընդամենը դիրքորոշում էր: Իհարկե, ով ցանկանում է իր մոտեցումները ճշգրտել Ղարաբաղի հետ կապված ` հենց ԼՂՀ իշխանությունների կողմից արտահայտված, սա որոշակիորեն կարող է ուղենիշ համարել: Բայց ընդհանուր առմամբ դրական եմ գնահատում վարչապետի այդ խոսքը»,-Panorama.am-ի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը` անդրադառնալով ԼՂՀ վարչապետ Արա Հարությունյանի այն հայտարարությանը, որ Ստեփանակերտը անընդունելի է համարում Մադրիդյան սկզբունքները և, անգամ եթե Ղարաբաղը բանակցային գործընթացի կողմ դառնա, նման փաստաթղթի քննարկումը իրենց կողմից անընդունելի է:

Ա.Մարտիրոսյանի խոսքով` այնպես չէ, թե Ղարաբաղում նախկինում էլ ողջունել են Մադրիդյան սկզբունքները և որոշ ժամանակ առաջ նույնիսկ ԼՂՀ ԱԺ խմբակցությունները հանդես եկան համատեղ հայտարարությամբ, որ այս սկզբունքներն անընդունելի են: Հիմա արդեն, ըստ էության, ավելի պաշտոնական տեսակետ հնչեց: Ուստիև այդ տրամադրությունները, որ կային Ղարաբաղում, ավելի հրապարակային են դառնում` ոչ միայն հասարակության, այլև քաղաքական շրջանակներում:

Մեր զրուցակիցը հիշեցրեց նաև, որ «Ժառանգությունն» էլ միշտ դեմ է արտահայտվել այդ սկզբունքներին, ինչը այսօր ավելի քան ակտուալ է:

«Ուկրաինական դեպքերից հետո շատ ակնհայտ է դառնում, որ գրավոր երաշխիքները երբևիցե իրական երաշխիք չեն կարող դառնալ, որովհետև տեսեք` Ուկրաինան էլ հրաժարվեց իր միջուկային զենքից, որը բավականին մեծաքանակ էր, դրա դիմաց երաշխիք ստանալով նույն ՌԴ-ից, ԱՄՆ-ից ու Մեծ Բրիտանիայից, որ իր տարածքային ամբողջականությունը երաշխավորված է լինելու… բայց տեսանք, որ հենց այդ երաշխավորներից մեկը` ՌԴ-ն, ըստ էության անեքսիայի ենթարկեց Ղրիմը: Ուստիև թղթի վրա երաշխիք այսօր որևէ մեկի կողմից տրված` ում կողմից ուզում է լինի, չի կարող իրական երաշխիք հանդիսանալ»,- նշեց նա:

Ա.Մարտիրոսյանը նկատեց, որ այսօր որևէ մեկը չի կարող երաշխիք տալ, թե Ադրբեջանը ինչ-որ պահի չի որոշի ռազմական ագրեսիայի գնալ, ինչպես դա եղել է տարիներ առաջ: Ինչ վերաբերում է խաղաղապահ ուժերին, ապա կուսակցության փոխնախագահը մատնանշեց, որ նրանք ինչպես խաղաղապահ են, այնպես էլ կարող են պատերազմաբեր ուժեր լինել.

«Քանի որ այս տարիների ընթացքում ստատուս-քվոն հարաբերական խաղաղությունը ուժերի այս հարաբերակցությամբ պահպանել է կարծում եմ լավագույն ապացույցն է նրա, որ երրորդ երկրի ուժ այդ հատվածում պետք չէ: Կամ նաև միջազգային կազմակերպության դրոշի ներքո, որովհետև պարզ է, որ այդ ուժերը հավերժ չեն լինելու տարածքում և նրանց հեռանալուց հետո ևս Հայաստանը և Արցախը խնդիրներ կունենան»,-ասաց նա:

Հետաքրքրվեցինք` ԼՂՀ վարչապետի այս հայտարարությունը կարելի՞ է դիտարկել  որպես զգոնության կոչ Հայաստանի իշխանություններին.

«Ոչ միայն: Ղարաբաղը իր հստակ դիրքորոշումն արտահայտել է, ինչը շատ դրական եմ գնահատում»,- արձագանքեց Ա.Մարտիրոսյանը:

Իսկ թե ինչպիսի զարգացումներ կարելի է ակնկալել այս ամենից հետո, ըստ «Ժառանգության» փոխնախագահի, ցույց կտա ժամանակը, քանի որ զարգացումներն էլ բազմաթիվ գործոններից են կախված.

«Նորից եմ կրկնում` դիրքորոշման հրապարակումը շատ դրական եմ գնահատում»,-հավելեց Panorama.am-ի զրուցակիցը: