Ձեր վստահելի աղբյուրը

«Դա օրենքի խախտում էր, որովհետև եթե գալիս են վտարելու, ապա նախապես պետք է այդ մասին ծանուցեն: Իսկ մեզ մոտ այնպիսի խայտառակ վիճակ էր, որ ուղղակի զանգում ասում են արդեն մտել և արդեն վտարում են. Այսպես չեն անում»,- լրագրողների հետ հանդիպմանը հայտարարեց Մարզահամերգային համալիրի հասարակայնության հետ կապերի և լրատվության պատասխանատու Կորյուն Գրիգորյանը` անդրադառնալով նախօրեին ԴԱՀԿ-ի կողմից Մարզահամերգային համալիրի աշխատակիցների վտարմանը:

Կ.Գրիգորյանը անդրադարձավ նաև աճուրդին և այն պարտքին, որի պատճառով էլ այդ աճուրդը կազմակերպվել է և նշեց, որ շատ տարօրինակ բան է տեղի ունենում` 25 մլն դոլար պետական բյուջեում չկա, բայց ոչ ոք չի հարցնում, թե ուր է այդ գումարը. «Ոչ ոք չի ուզում պարզի, թե ում թեթև ձեռքով է դա արվել և հեղինակը Տիգրան Սարգսյանն ու Դավիթ Սարգսյանն են»,- ընդգծեց նա:

Մեղադրելով նախկին վարչապետին նման խայտառակ իրավիճակի ՄՀՀ-ն բերելու համար, Կ.Գրիգորյանը նշեց, որ դիմել են ներկայիս վարչապետին, բայց դեռ պատասխան չեն ստացել: Բայց եթե իրենց գործողությունները հաջողությամբ չպսակվեն Հայաստանի համապատասխան ատյաններում, ապա իրենք պատրաստ են դիմել նաև միջազգային դատարան:

«Սա պետական ռեկետ է, այս ամենը անում են, որպեսզի մեզ լռեցնեն, բայց մենք չենք գնալու այս ճանապարհով: Մենք օրենք չենք խախտել, անգամ եթե գումարը չենք հասցրել վճարել: Այո, խնդիրներ կան բազմաթիվ, բայց մեր իշխանությունները կոնկրետ գնում են իրավախախտումների»,- ասաց նա ու ավելացրեց, որ չի կարող ասել, թե ով աչք ունի Մարզահամերգային համալիրի վրա, բայց` «դա դժվար չէ կռահել»:

Տեղեկացրեց նաև, որ ՄՀՀ-ի պարտքը ներկայումս կազմում է 10 մլրդ 200 մլն դրամ:

Իսկ Մարզահամերգային համալիրի փաստաբան Արմինե Հակոբյանը նշեց, որ երեկ տեղի ունեցածը օրենքի խախտում է:

«Վտարման որոշում չի եղել, իսկ ԴԱՀԿ տարածած հաղորդագրությունը խախտում էր, քանի որ գաղտնի տեսաձայնագրելու իրավունք ունի միայն ՀՀ ոստիկանությունը և այլ մարմիններ` բացառությամբ ԴԱՀԿ ծառայության: Տեսագրելու և հրապարակելու գործողությունների մեջ առկա են խախտումներ և այս իմ հայտարարությունը պատկան մարմինները պետք է դիտեն որպես հայտարարություն հանցագործության մասին, թեև ես արդեն դիմել եմ»,- մատնանշեց փաստաբանը:

Ի դեպ, Կորյուն Գրիգորյանը նշեց, որ եթե օրենքով են շարժվում, ապա Պաշտպանության նախարարությունը պարտք է ՄՀՀ-ին մոտ 60 մլն դրամ անցկացված երկու միջոցառումների համար:

Նշենք, որ ՄՀՀ-ի հերթական 6-րդ աճուրդը մեկնարկում է վաղը, բայց սա էլ բանախոսը որակեց որպես ապօրինություն, քանի որ` «ինչ-որ մեկը մտնում է համալիր, 15 րոպե շրջում է, գին է որոշում»:

 «Հատուկ գնահատում պետք է լինի, ոչ թե ինչ-որ պարոն գին որոշի ոտքի վրա»,- հավելեց Կ.Գրիգորյանը:


Հարակից հրապարակումներ
 Մարզահամերգային համալիրում ԴԱՀԿ-ն գործել է օրենքով սահմանված կարգով. պարզաբանում (տեսանյութ)
ԴԱՀԿ ծառայության աշխատակիցները ներխուժել են Մարզահամերգային համալիր և աշխատակիցներին դուրս են հրավիրում. Ահազանգ