Ձեր վստահելի աղբյուրը

«ՀՀ առողջապահության նախարարությունը շարունակում է համակարգում իրականացվող ծրագրերն ու բարեփոխումները` առաջնորդվելով ՀՀ նոր կառավարության ծրագրով, ինչպես նաև հանրապետության Նախագահի կողմից տրված հանձնարարականներով»։ Այս մասին այսօր ամփոփելով իր պաշտոնավարման 100 օրը` ասաց ՀՀ առողջապահության նախարար Արմեն Մուրադյանը:

Անդրադառնալով նախարարության կողմից իրականացվող ծրագրերին` նախարարը նշեց, որ ՀՀ նախագահի հանձնարարությամբ և կառավարության ծրագրին համահունչ վերջին երկու ամսում նախարարությունում ակտիվ քննարկումներ են կազմակերպել «Դեղերի մասին» ՀՀ օրենքի նախագիծը լրամշակելու ուղղությամբ:

Այն ամբողջությամբ կարգավորելու է դեղերի շրջանառությունը, բնակչությանը որակյալ և անվտանգ դեղերով ապահովումը, դեղերի ֆիզիկական և տնտեսական մատչելիությունը, դեղերի տեղական արտադրության խթանումը և այլն: Ուշադրության կենտրոնում են հատկապես դեղերի գների պետական կարգավորմանը, զուգահեռ ներկրմանը, գրանցման ընթացակարգերին ու կլինիկական հետազոտություններին վերաբերող դրույթները։

Ըստ նրա` մինչև տարեվերջ դեղարտադրող ևս երկու կազմակերպություն իր գործունեությունն ամբողջությամբ կհամապատասխանեցնի ՊԱԳ (պատշաճ արտադրական գործունեություն, GMP) պահանջներին:

Ա.Մուրադյանը տեղեկացրեց, որ Կառավարության ծրագրով նախատեսվել է ընդլայնել սրտի անհետաձգելի վիրահատության ծառայությունները։

Ներկայումս սրտի անվճար և արտոնյալ վիրահատություններ տրամադրվում են միայն բնակչության սոցիալապես անապահով և հատուկ խմբերում ընդգրկված 36,0 և ավելի անապահովության միավոր ունեցող անձանց, անվճար բուժօգնության իրավունք ունեցող սոցիալական փաթեթի շահառուններ հանդիսացող զինծառայողներին, և նրանց ընտանիքի անդամներին, պետական հիմնարկների աշխատողներին:

«ՀՀ նախագահը սրտի անհետաձգելի ինվազիվ սրտաբանական վիրահատության ծառայությունը Հայաստանի բոլոր քաղաքացիների համար հասանելի և մատչելի դարձնելու խնդիր է դրել»,- ասաց նախարարը հավելելով, որ ԱՆ ներկայացրած ծրագրով 2015թ. հունվարից այս ցանկում կընդգրկվեն սոցիալապես անապահովության 30,0 և ավելի միավոր ունեցող անձինք, ՀՀ կառավարությունը հաստատել է ծրագիրը` նախատեսելով 2015-2016-2017թթ.-ին տարեկան 500 մլն դրամ:

Անդրադառնալով բժշկական օգնություն իրականացնող կազմակերպությունների բուժանձնակազմի դրույքաչափերին, Ա.Մուրադյանը հայտնեց, որ հուլիսի 1-ից էականորեն բարձրացել են արտահիվանդանոցային բժշկական օգնություն իրականացնող կազմակերպությունների բուժանձնակազմի դրույքաչափերը: Բժիշկների ամսական բազային աշխատավարձը կազմել է 166,5 հազ. դրամ, իսկ միջին բուժանձնակազմինը` 75 հազար դրամ: Բացի այդ, տեղամասային սկզբունքով աշխատող թերապևտները, մանկաբույժները, ընտանեկան բժիշկները և նրանց բույժքույրերն ունեն ամսական մինչև 15 հազար դրամի չափով լրացուցիչ խրախուսական վարձատրման հնարավորություն՝ հաշվի առնելով նրանց կատարած աշխատանքի որակը և ծավալը:

Բուժանձնակազմի համար նախատեսվում են նաև օրենքով սահմանված հավելումներ աշխատանքի վտանգավոր պայմանների, լեռնային և բարձր լեռնային գոտում աշխատանքի համար, որի արդյունքում բժիշկների աշխատավարձը կտատանվի 166,5-216,4 հազար դրամի շրջանակում:

Նա նշեց նաև, որ առաջնային օղակում բնակչությանը մատուցվող ծառայությունների որակը և մատչելիությունն ապահովելու նպատակով կանոնակարգվում են կառուցվածքային և մասնագիտական պահանջները։ Լրամշակվել է առողջության առաջնային պահպանման, բժիշկների կողմից կանխարգելիչ այցի կազմակերպման չափորոշիչը` նախատեսելով նոր գործառույթներ և լաբորատոր-գործիքային հետազոտություններ:

Միաժամանակ, իրականացվել է ՀՀ մարզային բժշկական կազմակերպությունների քարտեզագրում, վերլուծվել են կադրային և տեխնիկական հագեցվածությունը, շենքային պայմանները, առկա կարիքները, պահանջարկը և յուրաքանչյուր մարզի համար սահմանված ձևաչափով ներկայացվել է բժշկական կազմակերպությունների վերաբերյալ տեղեկատվություն:

Ինչ վերաբերում է պատվաստանյութերին, Ա.Մուրադյանն ասաց, որ նախարարությունը որդեգրել է նոր պատվաստանյութերի ներդրման քաղաքականություն, որը միտված է նպաստելու նոր հիվանդությունների վերահսկման գործընթացին: Սեպտեմբերին Պատվաստումների ազգային օրացույցում ներդրվելու է պնևմակոկային պատվաստանյութը` այդ հիվանդությունների (թոքաբորբեր, մենինգիտներ և այլն) վերահսկման և դրանցից մահացության ցուցանիշի նվազեցման նպատակով:

Նշվեց նաև, որ հանրային առողջապահության ոլորտում կարգավորվում է օրենսդրական դաշտը՝ շրջակա միջավայրի հիգիենայի, սննդամթերքի և խմելու ջրի անվտանգության, աշխատանքի հիգիենայի և վարակիչ հիվանդությունների դեմ պայքարի հարցերը: