Ձեր վստահելի աղբյուրը

Էլեկտրաէներգիայի սակագնի բարձրացումը կհանգեցնի գնաճի, քանի որ դրա կիրառումը առկա է տնտեսության բոլոր ոլորտներում: Այս մասին Panorama.am-ի թղթակցի հետ զրույցում ասաց ՀԱԿ անդամ, տնտեսագետ Վահագն Խաչատրյանը:

Ինչ վերաբերում է սոցիալական լարվածությանը, ապա, ըստ տնտեսագետի, բնականաբար, էլեկտրաէներգիայի բարձրացումը մարդկանց սոցիալական վիճակի վրա բացասական ազդեցություն կունենա, սակայն այս պահին դեռ վաղ է որևէ կանխատեսում անել:

Վ.Խաչատրյանի դիտարկմամբ` առանց էլեկտրաէներգիայի բարձացուման էլ պարենային ապրանքների գներն ամեն օր աճում են:

«Բոլորս էլ մեր մաշկի վրա զգում ենք այդ բարձրացումը: Դա փաստ է, և ոչ ոք չի կարող ասել, որ գնաճ չկա»,- ասաց տնտեսագետը:

Հարցին, թե հնարավո՞ր էր էլեկտրանէներգիայի սակագինը չբարձրացնել, Վ,Խաչատրյանը արձագանքեց` միանշանակ հնարավոր էր:

«Ավելին ասեմ` երբ նայում եմ «Որոտան» ՀԷԿ-ի 2013թ-ի հաշվետությունը, որտեղ գրված է` Որոտանին տարբեր կազմակերպություններ պարտք են 35 մլրդ դրամ, դրանից կարելի է եզրակացնել, որ ՀԷԿ-ի սակագինն այնքան ռեալ չի եղել, որ լրացուցիչ շահույթ է ունեցել, ինչն էլ կարողացել է տրամադրել տարբեր կազմակերպությունների:

«Նաիրիտ» գործարանի աշխատակիցների աշխատավարձի պարտքերը նույնպես իշխանությունները պարբերաբար մարել են «Որոտանի ՀԷԿ»-ի եկամուտների միջոցով»,- ասաց տնտեսագետը:

Նրա խոսքերով` տեսնելով էլեկտրաէներգիայի սակագնի ձևավորման մեթոդիկան, կարելի է եզրակացնել, որ իրականում կարիք չկար բարձրացնելու էլեկտրանէներգիայի սակագինը:

«Պարզապես արդյունավետ կառավարում չկա, կա մեծ կոռուպցիա և մեծ կորուստներ, բացի այդ, գազի և էներգետիկ համակարգը գտնվում է արտոնյալ վիճակում, բայց չգիտես ինչու առաջացած ծախսերի կամ պարտքերի դիմաց ժողովուրդն է փոխհատուցում: Որոշեցին, որ ամենաթույլ օղակը ժողովուրդն է և սակագինը բարձրացրեցին: Բայց ինչո՞ւ պետք է ժողովուրդը վճարի, այլ ոչ թե կազմակերպությունները»,- նշեց Վ.Խաչատրյանը:

Ըստ նրա` գազի, էլեկտրաէներգիայի բարձրացումը մեծ հարված կհասցնի նաև տնտեսվարողներին.«Թեև կառավարությունը հայտարարում է` պետք է մրցակցային տնտեսություն ունենանք, բայց գազի, էլեկտրանէներգիայի գինն է թանկացնում, ինչի արդյունքում Հայաստանում արտադրված ապրանքները մրցակցությանը չեն կարողանում դիմանալ»:

«Հայաստանի իշխանությունները չեն դադարում հայտարարել արտահանմանը միտված քաղաքականություն որդեգրելու մասին: Իրականում, նրանք իրականացնում են ճիշտ հակառակ ուղղությամբ քայլեր»,- ասաց Վ.Խաչատրյանը:

Տնտեսագետը նաև անհասկանալի է համարում, թե ինչո՞ւ գործարարների դժգոհությունը չի լսվում այս առիթով: Չէ՞ որ նրանք մրցունակության անկման լուրջ խնդրի առջև են կանգնում:

Նրա խոսքերով` էլեկտրաէներգիայի թանկացման դեմ արտահայտվել են և քաղաքական կուսակցությունները,և ՀԿ-ները, հասարակությունը, մինչդեռ բիզնեսը լռում է:

«Ոչ ի մի խոսք ոչ էլեկտրաէներգիայի բարձրացումից, ոչ էլ կենսաթոշակային բարեփոխումներից, մինչդեռ այդ ամենն առաջին հերթին իրենց բիզնեսի վրա է ազդելու: Ստացվում է, որ մեկ տարվա ընթացքում էլեկտրաէներգիան թանկացել է 40%-ով, և ոչինչ: Ասենք, մեկ տարի անց կթանկանա ևս 20%` ավելի լավ: Ստացվում է, որ բիզնեսը չի ցանկանում փչացնել իշխանության հետ իր հարաբերությունները: Մինչդեռ դժգոհողները առաջին հերթին իրենք պետք է լինեին», - ասաց Վ. Խաչատրյանը:

Տնտեսագետի համար անտրամաբանական է այս մոտեցումը: Ըստ նրա` ոչ թե բիզնեսը պետք է վախենա իշխանությունից, այլ իշխանությունը` բիզնեսից:

«Պետությունը, կարծես թե, դարձել է պատժիչ մեքենա: Այս պայմաններում զարգացման, վստահության մասին խոսելն ավելորդ է: Սրանից գալիս ենք այն եզրակացության, որ այս համակարգը աշխատող չէ, քանի որ նորմալ տրամաբանությանը հակառակ է գործում»,- նշեց Վ.Խաչատրյանը

Հիշեցնենք, որ Հանրային ծառայությունները կարգավորող հանձնաժողովն էլեկտրաէներգիայի սակագինը բարձրացրել է 10%-ով՝ նախկին 38 դրամի փոխարեն հասցնելով այն 42 դրամի: Որոշումն ուժի մեջ է մտնում օգոստոսի 1-ից: