Ձեր վստահելի աղբյուրը

Ադրբեջանական մամուլը և գերատեսչությունները բավական հետաքրքիր ռեակցիա տվեցին սահմանային վերջին միջադեպերին: Այսօր լրագրողների հետ հանդիպմանը նման դիտարկում արեց տեղեկատվական անվտանգության փորձագետ Սամվել Մարտիրոսյանը և նկատեց, որ պաշտոնականներն ընկել էին կոլապսի մեջ, երկար ժամանակ ձայն չէին հանում, ինչն ադրբեջանական հասարակության մեջ լուրջ վրդովմունք բարձրացրեց:

«Ակնհայտ էր, որ այս անգամ Ադրբեջանական պաշտոնական տեղեկատվությունն ամբողջությամբ սուտ էր պարունակում: Եթե նախկինում սուտն ու ճիշտը խառնած էին տարածում, այս անգամ միայն ապատեղեկատվություն էր: Ադրբեջանական հասարակությունը չէր հասկանում՝ ինչ է կատարվում, դա ինչ-որ պահի բերեց նրան, որ իրենց զոհերի մասին հայկական տվյալները թափանցեցին այնտեղ: Իսկ մամուլը հիստերիկ վիճակում է»,- ասաց նա:

Երեկվա ընթացքում, ըստ Սամվել Մարտիրոսյանի, սկսեցին փորձել կառավարելի դարձնել իրենց դաշտը և ամեն կերպ իրենց ներքին լսարանին համոզել, որ հայկական կողմը ծանր կորուստներ է տվել. «Հայկական զորքերից մոտ 70-150 կորուստի մասին են խոսում, որպեսզի ասեն, թե այս փոքրիկ պատերազմը հաղթել են և կարողանան հանգստացնել ներքին լսարանը: Իրենց մոտ հեշտ է թաքցնել զոհերի քանակը, արդեն պրակտիկա է, իսկ մեզ մոտ թաքցնել հնարավոր չէ»:

Մեդիա փորձագետի խոսքով, Ադրբեջանում իրավապաշտպանների ձերբակալումով և ընդդիմադիր կայք փակելով, լսարանը դարձրին գրեթե 100 տոկոսով կառավարելի:

Մինչ այդ, առաջին օրերին ադրբեջանական մամուլում նաև քննադական նյութեր եղան, բայց կասեցրին, իսկ սոցցանցերում դժգոհություն կար Ալիևի բացակայությունից:

Անդրադառնալով հայկական լրատվամիջոցներին, Սամվել Մարտիրոսյանը նշեց, որ մեր մամուլն այս անգամ ակնհայտորեն շատ արագ կողմոնորշվեց, իհարկե, բացառություններ կան. «Կայքեր կային, որոնք ասես Ադրբեջանի ՊՆ մամուլի խոսնակի կցորդը լինեին»:

Մեդիա փորձագետը կարևորեց մամուլի և պատկան կառույցների ակտիվ համագործակցությունը, քանի որ միայն մամուլը կարող է կեղծ տեղեկություններ պարունակող խոսակցությունները կասեցնել. հասարակության մոտ միայն մամուլն ունի վստահություն:

Ինչ վերաբերում է հաքերային հարձակումներին, ապա հայ հաքերիներին զոհ գնաց մի լրատվական կայք՝ «Հաքքին.ազ»-ը: Սամվել Մարտիրոսյանի խոսքով, հայկական կողմից գրեթե գործողություններ չեն եղել, իսկ ադրբեջանցիները բացի կայքեր կոտրելուց, մի քանի լրատվականի վրա DDOS հարձակումներ արեցին. կայքերը չէին կոտրում, բայց լռեցնում էին:

Panorama.am-ի հարցին՝ ի՞նչ շեշտադրումներ կային ռուսական լրատվամիջոցներում՝ հաշվի առնելով, որ երկու երկրներում էլ ինֆորմացիայի երրորդ աղբյուր կարող էին դրանք լինել, Սամվել Մարտիրոսյանը նշեց, որ ռուսական լրատվամիջոցները թեման լուսաբանելու հարցում այդքան էլ ակտիվ չէին, մի կողմից կա իրենց օրակարգում առկա թիվ մեկ՝ Ուկրաինայի թեման, մյուս կողմից հանգստյան օրեր էին: Այնուամենայնիվ, անդրադարձ եղել է, որոշ դեպքերում նաև ադրբեջանական կողմին ձեռնտու շեշտադրումներով:

««Վեստի.ռու»-ի վրա տարօրինակ նյութ հայտնվեց նախագահների հանդիպման մասին, բեքը Ադրբեջանական շեշտադրումներով նյութ էր, հետո փոխեցին: Հաշվի առնելով, որ այն երկրորդական լրատվամիջոց չէ, շատերի մոտ դավադրության տեսություններ առաջացան: Այնտեղ սիրում են ցուցադրական կծել: Մի շարք ակտիվ դեմքեր էլ սոցցանցերով սկսեցին առաջ տանել թեզը, որ սա ամերիկացիներն են հրահրում»,- եզրափակեց նա: