Ձեր վստահելի աղբյուրը

«Օբյեկտիվորեն ասած, եթե տարածաշրջանում պատերազմ սկսվի և այն լինի ոչ միայն Ղարաբաղում, այլ նաև Հայաստանի տարածքում, ապա Ռուսաստանը պարտավոր է պատասխանել և Ադրբեջանն այդ մասին գիտի»,- «ԱԻՖ»-ի հետ հարցազրույցում նշել է ռուս քաղաքագետ Անդրեյ Եպիֆանցևը: Նրա համոզմամբ` արտաքին ուժեր, որ շահագրգիռ են սատարել այս հակամարտությանը, կարծես թե, չկան: Անգամ Թուրքիան այսօր դժվար թե այդ ճանապարհով գնա, քանի որ Թուրքիան ՌԴ հետ վարում է Մաքսային միությանն ավելի սերտ ինտեգրվելուն ուղղված բանակցություններ և այս ֆոնի վրա նա, ըստ քաղաքագետի, ռիսկի տակ չի դնի իր հարաբերությունները ՌԴ հետ:

Լրագրողի հարցին` այսինքն Ռուսաստանը պարտավոր է խառնվել պատերազմին և լինել Հայաստանի կողմից, Ա.Եպիֆանցևը կարծիք է հայտնել, որ այլ կերպ լինել չի կարող, քանի որ ՌԴ-ն Հայաստանում ունի ռազմաբազա և եթե որևէ մեկը Հայաստանի անվտանգությանը սպառնա, ապա ռուսները պետք է պաշտպանեն, ընդ որում` ոչ միայն այդ ռազմաբազայի ուժերով, այլև ողջ ռուսական բանակի ուժերով:

«Բայց Հայաստանը Ղարաբաղ չէ: Եթե Ադրբեջանը սպառնա Ղարաբաղի անվտանգությանը, ապա մենք այն չենք պաշտպանի: Հայկական բանակը կպաշտպանի, մենք` ոչ: Սակայն հարցն այստեղ այլ է: Ղարաբաղը փոքր տարածք է, հնարավո՞ր է ներխուժել Ղարաբաղ և միևնույն ժամանակ չներխուժել Հայաստան: Զինվորականներն ասում են, որ հնարավոր չէ: Տեսեք, ներկայումս Ուկրաինայում ականները այս ու այն կողմ են թռնում ու հայտնի չէ, թե ով ուր է կրակում: Իսկ Ղարաբաղում ավելի դժվար կլինի դա հասկանալ: Եթե պատերազմ սկսվի, Ռուսաստանն ու եվրոպական երկրները, որոնք ադրբեջանական գազ են ստանում, կփորձեն դիվանագիտական մեթոդներով կամ տնտեսական ճնշմամբ այն կանխել»,- նշել է Եպիֆանցևը:

Հաջորդ հարցին` իսկ եթե Ռուսաստանը խառնվի պատերազմին և լինի հայկական կողմից, արդյո՞ք Ադրբեջանը հաղթելու շանս կունենա, քաղաքագետը նկատել է, որ առանց այդ էլ Ադրբեջանն այդ շանսը չունի և ոչ թե այն պատճառով, թե իր բանակը ավելի թույլ է, այլ այն պատճառով, որ «Ադրբեջանը կամ 5-7 օրում հաղթում է Ղարաբաղում, կամ չի հաղթում եբեք»

«Հայերը օդ կհանեն իրենց կործանիչները ու կոչնչացնեն գազի խողովակները և այդպիսով Ադրբեջանին կպարտադրեն դադարեցնել պատերազմը: Ադրբեջանի համար ռիսկը շատ մեծ է, նա շատ բան կարող է կորցնել: Նախ, Հայաստանն անմիջապես կճանաչի Լեռնային Ղարաբաղը , ինչպես դա արեց Ռուսաստանը` ճանաչելով Ախբազիան ու Հարավային Օսեթիան, երբ Վրաստանը հարձակվեց նրանց վրա: Իսկ այս դեպքում Ադրբեջանի շանսերը վերադարձնել այդ հողերը կդառնան ուղղակի պատրանք: Եթե Ադրբեջանը հարձակվի, Հայաստանի բարոյահոգեբանական դիրքորոշումն ավելի հզոր կլինի: Ադրբեջանն այսօր ասում է` ինձանից խլել են իմ հողերը, իսկ այդ ժամանակ իրավիճակը կլինի այլ` Հայաստանը կասի, որ առաջարկել է խնդիրը կարգավորել բանակցային սեղանի շուրջ, բայց Ադրբեջանը հարձակվեց»,- նշել է «ԱԻՖ»-ի զրուցակիցը:

«Բայց չպատերազմել էլ Բաքուն չի կարող, քանի որ այդ դեպքում կփլվի 20-ամյա ադրբեջանական երազանքը, հասարակությունում լուրջ ճգնաժամ կսկսվի և այդժամ Ալիևին կհիշեցնեն շատ բան` և կոռուպցիա, և իր զավակների շքեղ պալատները արաբական երկրներում, և ընդդիմությանը ճնշելը և շատ այլ բաներ: Եվ այդ դեպքում ոչ ոք չի կարող պնդել, որ նա ևս չի ավարտի իր կյանքը այնպես, ինչպես որոշ առաջնորդներ նմանատիպ ճգնաժամերի ժամանակ: Հենց այդ պատճառով է, որ ոչ ոք չգիտի ինչ անել այսօր»,- հավելել է Ա.Եպիֆանցևը:

Հարցազրույցն ամբողջությամբ կարելի է կարդալ այստեղ` http://www.aif.ru/politics/world/1312691