Ձեր վստահելի աղբյուրը

«Ժառանգություն» կուսակցության փոխնախագահ Արմեն Մարտիրոսյանը չի կիսում այն տեսակետը, թե միջազգային հանրության անտարբերությունն է նաև պատճառը սահմանային լարվածության:

«Միջազգային հանրությունն իր կանոններով ու շահերով է շարժվում և, որպես այդպիսին, միաձույլ հանրություն գոյություն չունի` տարբեր երկրներ են, տարբեր շահեր են, ուստի խոսել ինչ-որ ընդհանուր մոտեցման մասին, չի կարելի»,- Panorama.am-ի հետ զրույցում ասաց նա:

Նախկին պատգամավորը ողջունեց ՀՀ Պաշտպանության նախարարության գործունեությունը` նշելով, որ ամենից ադեկվատ այս օրերին հենց ՊՆ-ն է իրեն դրսևորել ու թեև, ընդգծեց, այդ համակարգում կան գեներալներ, ովքեր բացասական համբավ ունեն, բայց ընդհանուր առմամբ Պաշտպանության նախարարությունը ճիշտ է գործում ու իր ֆունկցիան կատարում է:

Ինչ վերաբերում է սահմանային լարվածությանը, ինչպես նաև նախօրեին խաղաղ բնակիչ Կարեն Պետրոսյանի սպանությանը Ադրբեջանում, Ա.Մարտիրոսյանը նշեց, որ այստեղ գործ ունենք Ադրբեջանին բնորոշ պահվածքի հետ և ցավոք սա առաջին դեպքը չէ, երբ խաղաղ բնակիչները սպանվում են այդ երկրում:

«Ես կարծում եմ, որ սա խոսում է այն մասին, որ մենք իսկապես բավականին խնդիրներ ունենք լուծելու Հայաստանի ներսում` սկսած այն տարրական երևույթից, ինչպիսին մեր քաղաքացիների միամիտ սահման անցնելն է, ինչը հաճախակի է լինում, վերջացրած նրանով, որ մեր երկրում ավելի նորմալ կառավարման համակարգ պետք է ունենանք:

Ցավոք իշխանությունները իրենց իշխանությունը պահելու համար մտան տարատեսակ աշխարհաքաղաքական խաղերի մեջ, ճոճվում են այդ ճոճանակի վրա մեկ այս, մեկ այն կողմ` խաբեցին մեր արևմտյան գործընկերներին, Ռուսաստանի կողմից վստահելի չեն, բայց Ռուսաստանը ճնշման լծակներ ունի Հայաստանի իշխանությունների վրա և Հայաստանի շահերի հաշվին փորձում է իր հարաբերությունները լավացնել մնացածի հետ, ինչին մեր իշխանությունները ադեկվատ չեն կարողանում պատասխանել... այս ամենն է բերել այսօրվա իրավիճակին,- թվարկեց «Ժառանգության» փոխնախագահը և ավելացրեց,- եթե մենք ունենայինք վստահություն իշխանության հանդեպ, ունենայինք երկրում արդարություն, համերաշխություն, ապա այսօր այսպիսի վիճակ չէր կարող լինել»:

Նրա խոսքով, Ադրբեջանը տեսավ, որ Հայաստանը թուլացած վիճակում է և փորձեց օգտվել այդ առիթից. «Բայց մի հարցում սխալվել էր` կոպիտ հաշվարկ էր արել, որ Հայաստանը ոչ թե իշխանություններն են, այլ հասարակությունն ու իր բանակը, որովհետև բանակը հենց ժողովուրդն է»:

Անդրադառնալով Սոչիում Հայաստանի և Ադրբեջանի նախագահների հնարավոր հանդիպմանը` Ա.Մարտիրոսյանը շեշտեց. «Ես որևէ ակնկալիք այդ հանդիպումից չունեմ և չեմ կարծում, որ ինչ-որ բան լինելու է: Առավելագույնը, թեև դա էլ դժվար եմ պատկերացնում, կարող է լինել լարվածության թուլացումը, որովհետև մի պատերազմ էլ այստեղ որ սկսվի, չեմ կարծում, որ դա Ռուսաստանի համար ձեռնտու տարբերակ է. Արևելյան Ուկրաինան մի կողմից, արևմտյան պատժամիջոցները` մյուս և այլ գործոններին որ գումարվի հայ-ադրբեջանական պատերազմ....»:

Panorama.am-ի զրուցակիցը մատնանշեց, որ այդ հավանականությունը ոչ միայն ՌԴ, այլև շատ պետությունների «սրտով չէ». Իրանը անընդունելի է համարում պատերազմը, հարևան Վրաստանը, որը ստորագրել է ԵՄ Ասոցացման համաձայնագիրը, նույնպես չի ցանկանում պատերազմ:

«Խոշոր հաշվով չեմ տեսնում, որ այդ հանդիպումները ինչ-որ լուրջ արդյունք կտան: Բացի այդ, լուր տարածվեց, որ եռակողմ` Սարգսյան-Ալիև-Պուտին հանդիպում չի լինի, թեև եթե լինի էլ այդ հանդիպումը, ես մեծ փոփոխություններ չեմ սպասում: Ճիշտ քայլ կլիներ, որ ճանաչեինք Արցախի անկախությունը և փորձեինք երկրում արմատական բարեփոխումներ իրականացնելով, ուժեղացնելով երկիրը ներսից, ամրապնդեինք սահմանը և շարժվեինք առաջ: Կարծում եմ` այդ դեպքում կկարողանայինք ավելի ճիշտ քայլեր իրականացնել, իսկ ներկայիս պայմաններում առավելագույնը հրադադարն է, որ կարող է լինել, այն էլ ժամանակավոր»,- հավելեց Արմեն Մարտիրոսյանը: