Ձեր վստահելի աղբյուրը

Հայաստանի, Ադրբեջանի և օտարերկրյա մի խումբ քաղաքացիներ հանդես են եկել «Խաղաղության կոչով», որտեղ առաջարկում են կյանքի կոչել շփման գծից դիպուկահարներին հետ քաշելու առաջարկը և դադարեցնել բռնությունները, ինչպես նաև իրական խաղաղ գործընթաց սկսել:

Հայտարարության տեքստը զետեղված է  The Neutral Zone պլատֆորմի կայքում: Տեքստում մասնավորապես ասված է.

«Մենք՝ ներքոստորագրյալ Ադրբեջանի, Հայաստանի և այլ երկրների քաղաքացիներս, Լեռնային Ղարաբաղի հակամարտության կողմերից պահանջում ենք դադարեցնել կրակը և հարձակումները հայ-ադրբեջանական սահմանում և շփման գծում:

Մենք պահանջում ենք, որ կողմերից մեկը՝ որպես բարի կամքի քայլ, միակողմանի դադարեցնի կրակը, իսկ հետո մյուս կողմը վարվի նույն կերպ:

Մի ժամանակ Մահաթմա Գանդին ասել է. «Ակն ընդ ական բոլորին կկուրացնի»: Դիպուկահարի կրակոցին՝ դիպուկահարի կրակոցը, ներթափանցումը՝ ներթափանցմանը ղարաբաղյան ճակատում կարող են հանգեցնել միայն մեծ թվով երիտասարդ հայերի ու ադրբեջանցիների մահվան, վիրավորման և հաշմանդամ դառնալուն: Մի քանի մետրի կամ «ռազմավարական բարձունքների» գրավումը չունեն երիտասարդ մարդկանց թարմ շիրիմների ու նրանց հարազատների ու բարեկամների տառապանքի գինը:

Ղարաբաղյան հրադադարը համաձայնեցվել էր 1994 թվականի մայիսին: 1995 թվականի փետրվարին կողմերը պայմանավորվեցին հրադադարի ռեժիմի ամրապնդման և այն վերահսկելու շուրջ: Սակայն տարեցտարի դա չօգնեց տասնյակ զինծառայողների մահից խուսափելուն: Անցած շաբաթ զոհվածներից շատերը ծնվել էին արդեն հրադադարից հետո:Հասկանալի է, որ հրադադարն ինքնին ոչինչ է և ստատուս քվոն խանգարում է հարյուր հազարավոր մարդկանց կյանքին:

Ուստի մենք հակամարտության կողմերից և միջնորդներից պահանջում ենք գտնել նոր իրավական և գործնական բանաձև, որը կկարողանար կանգնեցնել բռնությունը: Ֆրանսիայի, Ռուսաստանի և ԱՄՆ արտգործնախարարները Հելսինկիում2008 վականին կայացած հանդիպման ժամանակ կողմերին կոչ արեցին դիպուկահարներին հետ քաշել շփման գծից: ՄԱԿ Գլխավոր քարտուղար Պան Գի Մունը այս գաղափարին աջակցեց 2010 թվականին: Մենք ցավում ենք, որ այդ առաջարկը, որ կարող էր տասնյակ կյանքեր փրկել, այդպես էլ կյանքի չկոչվեց:

Մենք նաև կոչ ենք անում մեր համաքաղաքացիներին, հասարակական կազմակերպությունների ներկայացուցիչներին, պետքական և մասնավոր ԶԼՄ-ներին՝ հակամարտությունը քննարկելիս հավատարիմ մնալ էթիկայի և մասնագիտական կանոներին, հրաժարվել բռնությունը փառաբանելուց և դրա կոչեր հնչեցնելուց, ձեռնարկել հակամարտության խաղաղ կարգավորմանն ուղղված իրական քայլեր և իրենց իշխանությունների պահանջել՝ դադարեցնել հակամարտության շիկացումն ու սկսել խաղաղությանը միտված իրական բանակցային գործընթաց»:

Կոչը ստորագրել են Վերոնիկա Աղաջանյանը, Անար Ահմադովը, Ռաշադ Ալիևը, Զինադին Բաբաևը, Բայրամ Բալչին, Սոֆի Բեդֆորդը, ԺանճԲապտիստ Բլանը, Լոուրենս Բրոերը, Մայքլ Սիսայրը, Ալեքսանդր Քուլին, Ծովինար Տերտերյանը, Ջոն Էվանսը, Արզու Գեյբուլաևան, Ֆիլիպ Ղամագելյանը, Նատալյա Ղուրբանյանը, Ռիչարդ Կիրակոսյանը, Համիդա Գիյասբայլին, Սևիլ Հուսեյնովան, Ուլվի Իսմայիլը, Իրակլի կակաբաձեն, Մարիա Կարապետյանը, Ռիչարդ Քաուզլարիչը, Արսեն Խառատյանը, Բրեդի Քիսլինը, Չարլզ Քինգը, Մարիոն Կիպիանին, Մայքլ Լեմոնը, Նեյլ Մաքֆորլանը, Սիմոն Մաղաքյանը, Միկաիլ Մամեդովը, Կարեն Օհանջանյանը, Ելենա Օսիպովան, մանե Պապյանը, Կառլ Ռադերը, Ալաքբար Ռաուֆօղլուն, Նատալյա Ռիգը, Դենիս Սամուտը, Էմիլ Սանամյանը, Էմիլ Սուլեյմանովը, Ռոնալդ Գրիգոր Սյունին, Մարգարիտա Թադևոսյանը, Ալբերտ Ոսկանյանը, Թոմաս դե Վաալը և Կորի Ուելթը: