Հայկական կողմը չի կարող իրեն թույլ տալ վտանգել քաղաքացիական մարդկանց կյանքը. Արծրուն Հովհաննիսյան

Քաղաքական 17:23 10/08/2014

Հայկական կողմը չի կարող իրեն թույլ տալ վտանգել քաղաքացիական մարդկանց կյանքը. Արծրուն Հովհաննիսյան

Ադրբեջանական ԶԼՄ-ները տարածել են Ադրբեջանի պաշտպանության նախարարության օգոստոսի 10-ի հայտարարությունը, որի համաձայն «Հայաստանը օգտագործում է Կարմիր խաչի միջազգային կոմիտեի հսկողության տակ գտնվող հումանիտար միջոցառումները՝ ադրբեջանա-հայական սահմանում ռազմական առավելության հասնելու նպատակով»:

Panorama.am-ը դիմել է ՀՀ ՊՆ մամուլի քարտուղար Արծրուն Հովհաննիսյանին՝ մեկնաբանելու այդ հայտարարությունը:

«Նման գործելաոճը հարիր է ոչ թե հայկական, այլ ադրբեջնական կողմին, որոնք կարող են թույլ տալ իրենց կրակել Կարմիր խաչի մեքենայի վրա»,- հայտնել է Ա. Հովհաննիսյանը:

ՊՆ մամուլի քարտուղարը հերքել է Ադրբեջանի ՊՆ-ի հայտարարությունը՝ նշելով, որ նման բան տեղի չի ունեցել, և հայկական կողմը չի կարող իրեն թույլ տալ վտանգել քաղաքացիական մարդկանց կյանքը:

«Մովսեսի գյուղի շրջակայքում էլ չի եղել դիրքերի բարելավման որևէ գործողությունը: Իսկ այդ տեղանքին ծանոթ մարդկանց մոտ այս տեղեկությունը կարող է ծիծաղ առաջացնել»,- նշել է Ա. Հովհաննիսյանը:

Նշենք, որ Հայաստանում Կարմիր խաչի միջազգային կոմիտեի պատվիրակությունը հուլիսի 26-ին տեղի ունեցած կրակոցների պատճառով ստիպված է եղել կասեցնել Տավուշի մարզի Չինարի գյուղի բնակիչների բերքահավաքին աջակցելու նախաձեռնությունը: Ինչպես նշում են տեղի բնակիչները՝ կրակոցները տեղի են ունեցել ադրբեջանական դիրքերից:

Հիշեցնենք, որ ավելի ուշ Կարմիր խաչի միջազգային կոմիտեի հայկական պատվիրակությունը հայտարարություն էր տարածել, որում ափսոսանք է հայտնել, որ 26-ին տեղի ունեցած կրակոցների պատճառով ստիպված է եղել գյուղի բնակիչների բերքահավաքին աջակցելու աշխատանքները դադարացնել:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: