Սոչիում Հայաստանի և Ադրբեջանի նախագահները հայտարարել են, որ հակամարտությունն անհրաժեշտ է լուծել խաղաղ ճանապարհով (Տեսանյութ)

Քաղաքական 15:07 10/08/2014

Սոչիում Հայաստանի և Ադրբեջանի նախագահները հայտարարել են, որ հակամարտությունն անհրաժեշտ է լուծել խաղաղ ճանապարհով (Տեսանյութ)

Սոչիում քիչ առաջ մեկնարկեց Հայաստանի, Ռուսաստանի և Ադրբեջանի նախագահներ Սերժ Սարգսյանի, Վլադիմիր Պուտինի և Իլհամ Ալիևի եռակողմ հանդիպումը:

Հանդիպման մեկնարկին Հայաստանի նախագահ Սերժ Սարգսյանը հույս է հայտնել, որ ղարաբաղյան հակամարտությունը հնարավոր կլինի մոտ ապագայում խաղաղ ճանապարհով լուծել: Իր հերթին Իլհամ Ալիևը նշել է, թե հակամարտությունը պետք է լուծել ԵԱՀԿ Մինսկի խմբի փոխզիջումների միջոցով: Այս մասին հայտնում են ռուսական լրատվամիջոցները:

ՌԴ նախագահ Վլադիմիր Պուտինն էլ նշել է, որ Լեռնային Ղարաբաղի հակամարտության լուծման համար անհրաժեշտ է դրսևորել համբերություն, իմաստնություն և փոխադարձ հարգանք:

«Ես հաճույքով եմ արձանագրում, որ Ադրբեջանի նախագահը ուշադրություն հրավիրեց հիմնախնդիրը խաղաղ ճանապարհով լուծելու վրա, և Դուք (դիմում է ՀՀ նախագահ Սերժ Սարգսյանին) նույնպես խոսեցիք այդ մասին: Սա իրականում ամենակարևորն է, քանզի չկա ավելի մեծ ողբերգություն, քան մարդկանց կորուստն է»,- Interfax-ի հաղորդմամբ հայտարարել է Վլադիմիր Պուտինը:

Նա նշել է, թե պետք է հաշվի առնել, որ Ղարաբաղի հակամարտությունը գոյություն ունի վաղուց և «Խորհրդային Միության ժառանգություն է»:

«Մենք պետք է համբերություն, խոհեմություն և փոխադարձ հարգանք ցուցաբերենք, որպեսզի կարողանանք լուծում գտնել: Անկասկած ցանկացած բարդ իրավիճակ կարելի է հանգուցալուծել, եթե առկա է բարի կամք, իսկ ինձ թվում է, որ նման կամք ադրբեջանական և հայ ժողովրդի մոտ առկա է»,- ասել է նա:

Տեղեկատվության համաձայն՝ նախագահների հանդիպումը սկսվել է եռակողմ առանձնազրույցով: Նախատեսվում է, որ հանդիպում կկայանա նաև ընդլայնված կազմով:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: