Ալիևը փորձեց փրկել իր դեմքը
Կովկասի ինստիտուտի տնօրեն, քաղաքագետ Ալեքսանդր Իսկանդարյանն այսօր անդրադարձել է Սոչիում կայացած եռակողմ հանդիպման արդյունքներին:
«Հանդիպման արդյունքները յուրաքանչյուր կողմի համար տարբեր են եղել,-լրագրողների հարցին ի պատասխան գնահատեց նա:-Եթե խոսենք Ադրբեջանի նախագահ Իլհամ Ալիևի համար հանդիպման ունեցած նշանակության մասին, ապա կասենք, որ մի կողմից հանդիպումը Ալիևին թույլ տվեց դուրս գալ ստեղծված բարդ իրավիճակից. նա դրանով փորձեց փրկել իր դեմքը վերջին մի քանի օրվա ադրբեջանական ռազմական ուժերի կրած կործանարար պարտությունից հետո: Նման իրավիճակից դուրս գալը Ադրբեջանի համար անհրաժեշտություն էր, և հանդիպումը տվեց դա անելու ինչ-որ հնարավորություն: Մյուս կողմից, հանդիպումը կարելի է բանաձևել որպես Ադրբեջանի հերթական միջազգային ռազմաքաղաքական շանտաժի և/ կամ ավանտյուրայի լիարժեք ձախողում:
Եթե խոսենք, թե ինչ նշանակություն ունեցավ հանդիպումը Ռուսաստանի Դաշնության նախագահ Վլադիմիր Պուտինի համար, ապա, դատելով այն իրավիճակից, որում ներկայումս գտնվում է Ռուսաստանը, պետք է ասենք, որ ՌԴ նախագահի համար նույնպես պակաս կարևոր չէր ցույց տալու իր բարի կամքը և կարողությունը՝ դրական դերակատարություն ունենալու ինչ-որ հակամարտության լուծման հարցում, որը կլինի Ուկրաինայի հարավարևելքում առկա բարդ իրավիճակի համատեքստից դուրս: Այլ կերպ ասած՝ ազդել Ռուսաստանի իմիջի վրա՝ որպես պետություն, որը կարող է աշխատել ԵԱՀԿ Մինսկի խմբի ձևաչափում:
Իսկ ինչ վերաբերում է Հայաստանին, ապա նրա համար հադիպումը հարթակ հանդիսացավ ևս մեկ անգամ կոչ անելու, որ հակամարտությունը պետք է լուծվի բանակցային սեղանին երեք հիմնարար սկզբունքների՝ ազգերի ինքնորոշման իրավունքի, տարածքային ամբողջականության և ուժի չկիրառման շրջանակներում: Նաև հարկ է նշել, որ Հայաստանի համար նման ձևաչափի ցանկացած հանդիպում նաև քաղաքական անվտանգության ձևաչափ է հանդիսանում»:
Հարցին ի պատասխան, թե` ի՞նչ ազդեցություն կարող է ունենալ նախագահների եռակողմ հանդիպումը շփման գծում ներկայումս տիրող լարված իրավիճակի վրա, Իսկանդարյանը շեշտադրումը այլ կողմ տարավ. «Կարծում եմ, որ շփան գծում ներկայումս տիրող լարված իրավիճակի վրա ոչ այնքան ազդեցություն կունենա Սոչիում կայացած հանդիպումը, որքան նախքան դա շփման գծում տեղի ունեցած իրադարձությունները, որոնք պարզ ցույց տվեցին հայկական և ադրբեջանական զինված ուժերի հարաբերակցությունը՝ արդեն իսկ նպաստելով առկա լարվածության հաղթահարմանը: Միևնույն ժամանակ պետք է ասել, որ Սոչիում կայացած հանդիպումը նույնպես կունենա իր ազդեցությունը. հանդիպումից հետո սահմանին տիրող իրավիճակը գոնե կվերադառնա հուլիսի 31-ից առաջ տիրող իրավիճակին: Այս առումով, չնայած նրան, որ Սոչիի հանդիպումից հետո էական փոփոխություններ չեն արձանագրվի, հանդիպումը թույլ կտա դուրս գալ շփման գծում տիրող լարված իրավիճակից»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
