Պիպոյան. Քաղաքապետարանի կողմից անցկացվող մրցույթի կարգը լուրջ վերանայման կարիք ունի
Մանկապարտեզներին անպիտան միս մատակարարելը ցույց տվեց, որ ոլորտը բարձիթողի վիճակում է, և վերահսկողության լուրջ մեխանիզմների չներդրման դեպքում նման դեպքերը կարող են կրկնվել: Panorama.am-ին նման կարծիք հայտնեց «Իրազեկ և պաշտպանված սպառող» ՀԿ նախագահ Բաբկեն Պիպոյանը:
«Այստեղ մեղքի իրենց լուրջ բաժինն ունեն թե քաղաքապետարանը, թե սննդամթերքի անվտանգության ծառայությունը: Սակայն ստեղծված իրավիճակում պետք է ոչ թե մեղավորներ փնտրել կամ ինչ-որ մեկին քննադատել, այլ պրոֆեսիոնալ աշխատանքի շնորհիվ հասնել այն բանին, որ նման դեպքերն այլևս չկրկնվեն»,-ասաց նա:
Պիպոյանն այն համոզման է, որ նախ պետք է փոխվի քաղաքապետարանի կողմից անցկացվող մրցույթի կարգը:
«Եթե մրցույթի ընթացքում ուշադրություն չի դարձվում սննդամթերքի տեղափոխման, պահպանման պայմաններին, էլ ինչի՞ մասին է խոսքը, մրցույթում հաղթող է ճանաչվում այն ընկերությունը, որն առավել ցածր գին է առաջարկում»,-ընդգծեց ՀԿ նախագահը:
Ինչ վերաբերում է Սննդամթերքի անվտանգության ծառայության այն հայտարարությանը, թե նման ընկերություն ծառայություն գրանցված չէ, ապա Պիպոյանը համարում է, որ դա ևս ծառայության մեղքն է:
«Բոլորն այս իրավիճակում փորձում են պաշտպանվել, մեղքը գցելով անհատ ձեռնարկատիրոջ վրա, այո, նա հանցագործ է, իսկ մեղավորները քաղաքապետարանն ու ծառայությունն են: Այստեղ միայն կամքը բավարար չէ, անհրաժեշտ է պորֆեսիոնալիզմ, որի պակասն այսօր զգացվում է»,-նկատեց Պիպոյանը:
Հետևելով ոստիկանության, քաղաքապետարանի ու Սննդամթերքի անվտանգության ծառայության տարածած հաղորդագրություններին, Պիպոյանի համար առավել արժանահավատ է ոստիկանության տարածած հայտարարությունը, նա հավատում է, որ թռչնամիսը տևական ժամանակ է մատակարարվել մանկապարտեզներին:
«Մենք դեռ չունենք փորձաքննության արդյունքները, սակայն չգիտենք էլ, թե տվյալ մանկապարտեզների սաների մոտ եղե՞լ են փորլուծության, փսխման դեպքեր, թե՞ ոչ: Չէ՞ որ դրանք էլ թունավորման նշաններ են: Այսօր քաղաքապետարանն ու մանկապարտեզներն ամեն ինչ անում են, ապացուցելու, որ առաջին անգամ է նման միսը մատակարարվել, բայց եթե ապացուցվի հակառակը, ապա նրանք էլ հանցակիցներ են դառնում»,-նկատեց Պիպոյանը:
ՀԿ նախագահը պատրաստվում է դիմել կառավարությանը՝ վերանայելու գործող կարգը և մշակելու նոր վերահսկողության գործիքներ՝ ներդնելով որակի և անվտանգության կառավարման նոր համակարգեր:
Հիշեցնենք, որ օգոստոսի 11-ին ոստիկանության ԿՀԴՊ ԳՎ կոռուպցիայի և տնտեսական գործունեության դեմ ուղղված հանցագործությունների հակազդման վարչության և Նոր Նորքի բաժնի աշխատակիցների իրականացրած օպերատիվ-հետախուզական միջոցառումների արդյունքում առգրավվել են «Ալավերդու թռչնաֆաբրիկա» ապրանքանիշով և արտադրության ամսաթվերի վերաբերյալ կասկածելի տվյալներով հավի մսի խմբաքանակներ: Պարզվել է, որ Էդվարդ Մխիթարյանը ոչ պիտանի հավի միս է մատակարարել Նոր Նորքի թիվ 101, 116 և 118 մանկապարտեզներին:
Փաստի առթիվ հարուցված է քրեական գործ: Ինչպես ավելի վաղ Panorama.am-ին հայտնել էին քննչական կոմիտեից, քննության առջև խնդիր է դրված պարզելու, թե որտեղից է ձեռք բերվել թռչնամիսը, ի՞նչ որակի է այն եղել, անհատ ձեռներեցը իրավունք ունեցե՞լ է մատկարարելու, թե՞ ոչ, ինչպե՞ս է ստացվել, որ մրցույթում այդ ձեռնարկատերն է հաղթող ճանաչվել, և ընդհանրապես թռչնամիսն առաքվել է միայն այդ երեք մանկապարտեզների՞ն, թե՞ նաև այլ օբյեկտների ու խանութների:
Նախորդող հրապարակումներ՝
Ոչ պիտանի հավի միս է մատակարարվել Նոր Նորքի թիվ 101, 116 և 118 մանկապարտեզներին (Տեսանյութ)
Երեխաները փչացած հավի միսը չեն կերել. Վստահեցնում են մանկապարտեզներից
Քաղաքապետարանի պարզաբանումը՝ մայրաքաղաքի 3 մանկապարտեզներին անորակ թռչնամսի մատակարարման վերաբերյալ
Էդվարդ Մխիթարյան անունով անհատ ձեռնարկատեր ՍԱՊԾ-ում գրանցված չէ. Սուքիասյան
Նոր մանրամասներ փչացած հավի մսի գործից
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
