Ձեր վստահելի աղբյուրը

Քրդական կազմակերպությունները պարբերաբար եզդիների նկատմամբ ցեղասպանություն են կազմակերպել, իսկ այս վերջին ցեղասպանությունը, որը շարունակվում է մինչ այսօր` 74-րդն է: Այս մասին այսօր լրագրողների հետ հանդիպման ժամանակ ասաց Եզդիների միության նախագահ Ազիզ Թամոյանը:

Նրա խոսքերով` Իրաքի հյուսիսում բնակվում է 1 մլն 300 հազար եզդի, սակայն այսօր եզդիները ստիպված լքել են իրենց բնակավայրերը, մի մասին հաջողվել է փրկվել` հասնելով սարերը, իսկ մյուս մասը, ըստ Ա. Թամոյանի, սպանվել է: Նա նշեց, որ դաժանաբար սպանում են կանանց, երեխաներին, ծերերին:

«Սարսափելի վիճակ է: Չնայած այսօր ինձ ասացին, որ ԱՄՆ զինուժը օգնություն է ցուցաբերում, սակայն դա բավարար չէ: Եթե ԱՄՆ-ը ցանկանա, ապա միանգամից այս հարցին լուծում կտա»,- նշեց նա:

Ա. Թամոյանը նաև հայտնեց, որ երեք օր առաջ եզդիներով բնակեցված գյուղերից 81 կնոջ դուրս են հանել գյուղից, բռնաբարել են, իսկ հետո գնդակահարել են:

«Այդ բարբարոսները, ստորները, մարդակերները ապրելու իրավունք չունեն, ինչ կրոնի մասին է խոսքը: Մարդիկ չեն ցանկանում մուսուլման դառնալ ու դրա համար նրանց գնդակահարել են: Մարդն իրավունք ունի ընդունել այն դավանանքը, որն ուզում է: Թքեմ դրանց կրոնի վրա, դա կրո՞ն է, դա ստորություն է, դա կեղտոտություն է, որ մի ազգի աշխարհի երեսից վերացնում են նրա համար, որ չեն ցանկանում մուսուլմանություն ընդունել»,- ասաց Ա.Թամոյանը:

Նա նաև տեղեկացրեց, որ Իրաքի հյուսիսային հատվածի գյուղերից մեկում քրդական զորքը կոտորել է ամբողջ գյուղի բնակչությանը, միայն 18-ամյա մի պատանու է հաջողվել փրկվել: Ա. Թամոյանի խոսքերով` մուսուլմանների նպատակն է այդ տարածքում  վերացնել ազգային փոքրամասնություններին և Քուրդստան ստեղծել:

«Այնպես են ուզում անել, ինչպես արեցին 1915 թվականին հայերի նկատմամբ Արևմտյան Հայաստանում: Այսօր Արևմտյան Հայաստանը գոյություն չունի, այնտեղ ապրում են մուսուլմանները, նույնն այսօր անում են եզդիների նկատմամբ: Ինչ է, ամբողջ աշխարհը հո մուսուլման չի՞ լինելու»,- նկատեց Ա.Թամոյանը:

Եզդիների միության նախագահը դիմեց բոլոր ազգերին ու գերտերություններին, որպեսզի ուշադրություն դարձնեն այս հարցին: Ազիզ Թամոյանը շնորհակալություն հայտնեց ՀՀ նախագահ Սերժ Սարգսյանին, ՀՀ կառավարությանը, ինչպես նաև մի շարք կուսակցությունների` եզդիների խնդրին արձագանքելու համար:

Եզդիների հոգևոր առաջնորդ, շեյխ Բրո Հասանյանը նույնպես նշեց, որ այսօր եզդիների նկատմամբ ցեղասպանություն է կատարվում միայն նրա համար, որ նրանք արևապաշտ են: Նրա խոսքերով` եզդիները դարձել են մի քանի մարդկանց քաղաքական և տարածքային շահի զոհ: Ըստ նրա՝ այս ամենը Իրաքի, Թուրքիայի նախագահների կողմից է ծրագրված:

Նախորդող հրապարակումներ`

Ա. Սաղաթելյան. Հայաստանն իր ուժերի չափով հետևողականորեն սատարելու է փորձության մեջ հայտնված բարեկամ եզդի ժողովրդին
«Հետագան ցույց կտա՝ ինչքանով են իրական իրաքյան եզդիներին օգնելու ՀՀ ԱԳՆ հրահանգները»
Իրաքում եզդիների զանգվածային ոչնչացումը Արևմուտքի երկակի ստանդարտների դրսևորում է. թուրքագետ (տեսանյութ)
ԱԳՆ. Կիսում ենք Հայաստանում ապրող եզդիների վրդովմունքը տեղի ունեցող ողբերգական զարգացումների կապակցությամբ
Այն, ինչ իրաքյան եզդիների հետ է կատարվում, եղել է 1915 թվականին հայերի հետ. Թամոյան
Գերտերությունները կօգնեն Իրաքի եզդիներին. Ազիզ Թամոյան (տեսանյութ)
«Իրաքյան եզդիների ցանկությունն է, որ իրենց զբաղեցրած տարածքը համարվի ԱՄՆ-ի վարչական տարածք»
Հայաստանյան եզդիները մարդասիրական օգնություն են խնդրում իրաքյան եզդիների համար (տեսանյութ)
«ՀՀ իշխանությունները կիսում են եզդիական համայնքի մտահոգությունները»