Ձեր վստահելի աղբյուրը

Հայաստանի և Վրաստանի վարչապետների հանդիպման ընթացքում քննարկվել են երկուստեք հետաքրքրություն ներկայացնող հարցեր, որոնք վերաբերել են առևտրատնտեսական կապերի, կրթության, մշակութային, մարդասիրական ոլորտներում համագործակցությանը: Այս մասին այսօր պաշտոնական այցով Հայաստանում գտնվող Վրաստանի Հանրապետության վարչապետ Իրակլի Ղարիբաշվիլիի հետ հանդիպումից հետո լրագրողների հետ ճեպազրույցում հայտարարեց ՀՀ վարչապետ Հովիկ Աբրահամյանը:

«Հատուկ ընդգծվեց հայ-վրացական միջկառավարական հանձնաժողովի կարևորությունը, որը երկու երկրների առևտրատնտեսական հարաբերությունների պահպանման և առավել խորացման լավագույն միջոցն է: Քննարկումներ եղան ենթակառուցվածքների զարգացման և տրանսպորտային կապի բարելավման հետ կապված հարցերի շուրջ»,- ընդգծեց Հ.Աբրահամյանը:

Վարչապետի խոսքերով` քննարկումներ են եղել նաև սահմանային անցակետերի արդիականացման շուրջ: Մասնավորապես, պայմանավորվածություն են ձեռք բերել Բագրատաշեն-Սադախլո նոր կամուրջի շինարարության վերաբերյալ: «Քննարկեցինք նաև անցած գիշեր Լարսում տեղի ունեցած սողանքի հետևանքների վերացման հետ կապված հարցեր: Ես իմ գործընկերոջն առաջարկեցի Հայաստանի համապատասխան ծառայությունների աջակցությունը»,- ասաց վարչապետը` հավելելով, որ բանակցությունները ընթացան բարեկամ երկրներին բնորոշ ջերմ ու կառուցողական մթնոլորտում:

Վրաստանի վարչապետ Իրակլի Ղարիբաշվիլին իր հերթին շնորհակալություն հայտնեց ՀՀ վարչապետին` հյուրընկալության և ջերմ ընդունելության համար:

«Ինձ համար ուրախալի է լինել Հայաստանում, որի հետ մեզ կապում է բազմադարյա բարեկամությունը: Մենք բանակցությունների արդյունքում համաձայնության եկանք, որ պետք է ավելի խորացնենք Հայաստանի և Վրաստանի միջև առկա սերտ համագործակցությունը բոլոր ոլորտներում: Ընթացիկ տարվա 6 ամիսների ընթացքում մենք 42 տոկոսով ավելացրել ենք առևտրաշրջանառությունը, ինչը խոսում է այն մասին, որ մեր երկրների միջև տնտեսական կապերը զարգանում են, և մենք շարունակելու ենք խորացնել այդ հարաբերությունները»,- ասաց Վրաստանի վարչապետը:

Ըստ նրա` քննարկումներ են եղել նաև տարածաշրջանում կայունության և անվտանգության ապահովման հարցերի վերաբերյալ:

«Մենք ունենք դինամիկ աճ նաև զբոսաշրջության ոլորտում և համաձայնության ենք եկել, որ կխորացնենք հարաբերությունները նաև այս ոլորտում»,- ասաց նա` հավելելով, որ նաև համաձայնության են եկել Բագրատաշեն անցակետում նոր կամուրջի կառուցման վերաբերյալ, որը կկոչվի «Բարեկամության կամուրջ»:

Իրակլի Ղարիբաշվիլին անդրադարձավ նաև Վերին Լարսի սողանքին, որի հետևանքով դադարեցվել է Հայաստանի գազամատակարարումը: Նա վստահեցրեց, որ 2-3 օրվա ընթացքում կվերականգնեն Հայաստան գազ մատակարարող խողովակաշարը:

Հայաստանի Հանրապետության վարչապետ Հովիկ Աբրահամյանի հրավերով այսօր պաշտոնական այցով Հայաստան է ժամանել Վրաստանի վարչապետ Իրակլի Ղարիբաշվիլիի գլխավորած պատվիրակությունը: Երկու երկրների վարչապետների առանձնազրույցից հետո կայացել են պաշտոնական պատվիրակությունների մասնակցությամբ ընդլայնված կազմով բանակցությունները: Այնուհետև վարչապետներ Հովիկ Աբրահամյանը և Իրակլի Ղարիբաշվիլին ՀՀ կառավարության մամուլի կենտրոնում հանդիպեցին զանգվածային լրատվամիջոցների ներկայացուցիչների հետ և հանդես եկան բանակցությունների արդյունքներն ամփոփող հայտարարությամբ: