«Արևելքի առակ. Քրիստոնեությունը նոր հազարամյակի մարտահրավերների առջև»` լուսանկարների ցուցահանդեսը Ռիմինիում (լուսանկարներ)

Հասարակություն 17:20 26/08/2014

Օգոստոսի 24-ին Իտալիայի Ռիմինի քաղաքում` Ժողովուրդների բարեկամության ամենամյա փառատոնի շրջանակներում, Սուրբ Աթոռում Հայաստանի Հանրապետության դեսպանության նախաձեռնությամբ և նրա հովանու ներքո կազմակերպվել է «Արևելքի առակ. Քրիստոնեությունը նոր հազարամյակի մարտահրավերների առջև» խորագրով լուսանկարների ցուցահանդեսի բացումը:

Այն նպատակ է հետապնդում միջազգային հանրության ուշադրությունը հրավիրել Մերձավոր Արևելքի` հազարամյակների արմատներ ունեցող քրիստոնյա համայնքների վիճակի վրա, որոնց գոյությունը վտանգի տակ է, ինչպես նաև` տարածաշրջանում քրիստոնեական մշակութային ժառանգության պահպանման անհրաժեշտության վրա: Այս մասին հաղորդում է ԱԳՆ մամուլի ծառայությունը:

Ցուցահանդեսում ընդգրկված են Միջին Արևելքի ինը երկրներում արված լուսանկարներ, առանձին բաժին է կազմում Ջուղայի հայկական խաչքարերի ոչնչացումը փաստող վավերագրական ֆիլմը:

Առաջին իսկ օրվանից ցուցահանդեսն առաջացրել է հասարակության տարբեր շերտերի մեծ հետաքրքրությունը. բացման օրը ներկա են եղել Սուրբ Աթոռի բարձրաստիճան պաշտոնյաներ, Վատիկանում հավատարմագրված դիվանագետներ` գրացվելով ութ հազար այցելու:

«Արևելքի առակ. Քրիստոնեությունը նոր հազարամյակի մարտահրավերների առջև» ցուցահանդեսը Ռիմինիում այցելուների համար բաց է մինչև ս.թ. օգոստոսի 30-ը, որից հետո այն կշրջի այլ քաղաքներում ևս, այդ թվում` Հռոմում: Հռոմում ցուցահանդեսի բացումը նախատեսված է ս.թ. սեպտեմբերի 18-ին:

Օգոստոսի 26-ին Սուրբ Աթոռի Տնտեսական հարցերով քարտուղարության պրեֆեկտ կարդինալ Ջորջ Պելլը` Սուրբ Աթոռում ՀՀ դեսպան Միքայել Մինասյանի ուղեկցությամբ, այցելել է ցուցահանդես:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: