Ձեր վստահելի աղբյուրը

Առաջիկա օրերին Հայաստանի տարածքում օդի ջերմաստիճանը նվազելու է. տաք օդային հոսանքներն արդեն այսօրվանից փոխում են իրենց ուղղությունը: Լրագրողների հետ հանդիպման ժամանակ եղանակի սեպտեմբեր ամսվա կանխատեսումները ներկայացրեց ԱԻՆ Հիդրոմետ ծառայության օդերևութաբանության կենտրոնի պետի տեղակալ, աշխարհագրական գիտությունների թեկնածու Գագիկ Սուրենյանը:

Նա նշեց, որ արևադարձային օդային հոսանքներն իրենց տեղը զիջում են հյուսիս-արևմուտքից տեղափոխվող արկտիկական ցուրտ օդային հոսանքներին: Օդի ջերմաստիճանն այսօրվանից մինչև սեպտեմբերի 1-ը ներառյալ կնվազի 4-5 աստիճանով, այսինքն օգոստոսի 31-ին, սեպտեմբերի 1-ին օդի ջերմաստիճանը չի գերազանցի 34-35 աստիճանը: Ջերմաստիճանի լուրջ անկում է սպասվում Լոռու, Տավուշի, Սյունիքի մարզերում. օդի ջերմաստիճանը ցերեկային ժամերին կնվազի 8-10 աստիճանով: Միաժամանակ Հանրապետության հյուսիսային շրջաններում երեկոյան ժամերին կդիտվի կարճատև անձրևներ, քամու ուժգնացում, Արարատյան դաշտի առանձին հատվածներում երեկոյան ժամերին նույնպես չի բացառում կարճատև անձրևների հավանականությունը:

Գ. Սուրենյանը տեղեկացրեց, որ սեպտեմբերի 2-ից օդի ջերմաստիճանը կրկին կբարձրանա, բայց 36 աստիճանը չի գերազանցի, իսկ սեպտեմբերի 5-ից կրկին կնվազի:

Նա հայտնեց, որ սեպտեմբերին օդի ջերմաստիճանն ու տեղումների քանակը սպասվում են նորմայի սահմաններում՝ համահունչ հայաստանյան բազմամյա կլիմայական պայմաններին:

Լեռնային շրջաններում, Շիրակում, Կոտայքում, Գեղարքունիքում, Արագածոտնի, Վայոց ձորի լեռներում սեպտեմբերի առաջին տասնօրյակում ցերեկային ժամերին օդի ջերմաստիճանը կբարձրանա մինչև 22-26 աստիճան, իսկ երկրորդ և երրորդ տասնօրյակներում չի բացառվում, որ գիշերային ժամերին օդի ջեմաստիճանը նվազի մինչև 2-5 աստիճան: Արարատյան դաշտում, Սյունիքի և Տավուշի հովիտներում, Երևանում սեպտեմբերի առաջին տասնօրյակում կգրանցվի մինչև 34-36 աստիճան տաքություն, իսկ երկրորդ և երրորդ տասնօրյակներում երկոյան ժամերին՝ 10-12 աստիճան: Լոռիում և Սյունիքի նախալեռներում սեպտեմբերի առաջին տասնօրյակում կգրանցվի 22-25 աստիճան, երկրորդ և երրորդ տասնօրյակում գիշերային ժամերին ջերմաստիճանը կնվազի մինչև 2-4 աստիճանի:

Սևանա լճի ջերմաստիճանն 22 աստիճան է, որը սեպտեմբերի երկրորդ տասնօրյակից կսկսի նվազել: Գ. Սուրենյանն ասաց, որ Սևանա լճի առավելագույն ջերմաստիճանը 22-23 աստիճան է: