Ձեր վստահելի աղբյուրը

«Կործանարար ուժեր կան, որոնք չեն ցանկանում, որպեսզի Իրանի միջուկային խնդրի շուրջ համաձայնություն ձեռք բերվի»,-այդ մասին իրանական «ՖԱՐՍ» լրատվական գործակալության հաղորդմամբ հայտարարել է ԻԻՀ ԱԳ փոխնախարար Սեյյեդ Աբբաս Արաղչին:

Իրանի փոխարտգործնախարարը, «Ֆրանս 24» հեռուստաալիքին տված հարցազրույցում, անդրադառնալով օրերս Իրանի տարածքում իսրայելական թռչող սարքի վնասազերծման փաստին, մասնավորապես նշել է. «Կործանարար ուժեր կան, որոնք չեն ցանկանում, որպեսզի Իրանի միջուկային խնդրի շուրջ համաձայնություն ձեռք բերվի. Մենք այդ անօդաչուն վնասազերծել ենք Նաթանզի մոտակայքում. Այդ միջադեպն ավելի է մեծացրել մեր անհանգստությունը, ուստի մենք ջանքեր ենք գործադրում, որպեսզի պաշտպանենք մեր միջուկային հաստատությունները. Այդ քայլը մենք որակում ենք որպես սադրիչ գործողություն, սակայն մենք առայժմ կենտրոնացել ենք բանակցությունների վրա»:

Իրանական «Ասրիրան.քոմ» կայքի հաղորդմամբ՝ օրերս Իրանի ԶՈւ հակահրթիռային պաշտպանության ուժերի կողմից Նաթանզի շրջանում վնասազերծվել էր իսրայելական արտադրության անօդաչու սարք: Իսրայելական անօդաչու ինքնաթիռի վնասազերծումից հետո Իրանի ԶՈւ ԳՇ պետի տեղակալ Սեյյեդ Մասուդ Ջազայերին հայտարարել էր, որ անօդաչուն Իրանի տարածք է ներխուժել երկրի հյուսիսում գտնվող ԽՄՀՄ նախկին հանրապետություններից մեկից:

Իրանական «ԻՍՆԱ» լրատվական գործակալությունը, հղում անելով իսրայելական հետախուզական «Մոսսադ» կազմակերպությանը մոտ կանգնած ԶԼՄ-ներին, նշում է, որ սույն թռչող սարքն Իրանի տարածք է մուտք գործել Նախիջևանի շրջանից:

Սակայն Ադրբեջանում Իրանի դեսպան Մոհսեն Փաքայինը, «Ասրիրան.քոմ»-ին տված հարցազրույցում նշել է, որ ադրբեջանցի պաշտոնյաներն իրեն վստահեցրել են, թե իսրայելական թռչող սարքն Ադրբեջանի տարածքից մուտք չի գործել:

Իրանական աղբյուրը հիշեցրել է, որ վերջերս էլ ՀՀ ԶՈւ հակաօդային պաշտպանության ուժերն էին ոչնչացրել իսրայելական արտադրության «Հերմես 450» մոդելի թռչող սարք, որը փորձել էր հատել ՀՀ օդային տարածքը:

Հավելենք, որ Իրանի իսլամական հեղափոխության պահապանների կորպուսին (ԻՀՊԿ) մոտ կանգնած «Թաբնաք.իր» կայքի մեկնաբանն էլ, անդրադառնալով անօդաչուի կործանման փաստին, գրում է. «Այդ դեպքից դեռ երկու տարի առաջ ռազմական փոձագետները նշում էին, որ Իսրայելի կողմից Ադրբեջանին տրամադրված «Հերմես 450» մոդելի անօդաչու ինքնաթիռների գործառույթն իրանա-ադրբեջանական սահմանում հետախուզական գործողություններ իրականացնելն էր»: