Ձեր վստահելի աղբյուրը

««Իսլամական պետության» նման գործելաոճն, ըստ էության, տեղավորվում է կառույցի որդեգրած գործունեության տրամաբանության մեջ. կազմակերպության կողմից իրականացվող բռնությունները, վայրագությունները նպատակ են հետապնդում` մշտապես գտնվել միջազգային հանրության ուշադրության կենտրոնում և հատկապես գրավիչ գործոն դառնալ ծայրահեղական գաղափարներ դավանող բոլոր մուսուլմանների համար»,- Panorama.am-ի թղթակցի հետ զրույցում, մեկնաբանելով ԻՊ-ի կողմից արդեն երկրորդ ամերիկացի լրագրողի գլխատման մասին տեսանյութի տարածման հանգամանքը,  նշեց արաբագետ Արմեն Պետրոսյանը:

Նրա կարծիքով միամտություն կլինի կարծելը, թե իսլամականները չեն գիտակցում, որ արևմտյան պետություններին, նրանց ղեկավարներին հասցեագրված սպառնալիքներով ուղեկցվող նման գործողությունները և նման տեսանյութերի տարածումը, ընդհանրապես սեփական վերահսկողության տակ գտնվող տարածքներում իրականացվող վայրագությունները կունենան տրամագծորեն հակառակ հետևանքներ. կհամախմբվեն կառույցի դեմ հանդես եկող շահագրգիռ ուժերը, կակտիվանան նրա դեմ իրականացվող ռազմական գործողությունները, մինչդեռ, ստեղծված իրավիճակում ԻՊ-ն, ըստ էության, այլընտրանք չունի.«Կազմակերպության կողմից իսլամական ծայրահեղ արմատական գաղափարախոսությամբ հիմնավորվող այդօրինակ գործելաոճը կանխամտածված է, փորձված է, այն հստակ ռազմավարություն է, որը դրված է կառույցի գործունեության հիմքում, և, աներկբայորեն, համարվում է նրա արձանագրած հաջողությունների առանցքային գրավականներից մեկը»:

Ըստ փորձագետի՝ անթաքույց և հստակ ուղղորդված դաժանությունը միաժամանակ կրկնակի թիրախավորում ունի՝ նախ՝ սեփական վերահսկողության տարածքներում՝ Սիրիայի և Իրաքի մի շարք շրջանների բնակչության շրջանում ահ ու սարսափի մթնոլորտի տարածումն է, այդ եղանակով նրանց հնազանդեցումը, մյուս կողմից՝ այդ շրջաններում որոշակի մրցակից կազմակերպությունների նկատմամբ առավելությունների արձանագրումն է. «Ինչի ականատեսն էլ լինում ենք, ըստ էության, 2014 թ. ողջ ընթացքում նախ Սիրիայում, ապա՝ նաև Իրաքում. կառույցը կարողացավ ոչ միայն լուրջ ռազմական հաջողություններ գրանցել մրցակիցների ու հակառակորդների նկատմամբ, այլև ստեղծել այնպիսի իրավիճակ, երբ բազմաթիվ առավել փոքր խմբավորումներ, ցեղային զորամիավորումներ միավորվեն իրեն՝ հավատարմության երդում տալով ԻՊ առաջնորդ Աբու Բաքր ալ-Բաղդադիին. այս համատեքստում, հատկապես կրոնաքաղաքական տեսանկյունից անգնահատելի կարևորություն ունեցավ հունիսի վերջին կառույցի կողմից խալիֆայության հռչակման հանգամանքը»:

«ԻՊ նման գործելաոճի արտաքին ուղղվածությունը նպատակ է հետապնդում, օգտագործելով արդի տեղեկատվական տեխնոլոգիաների ընձեռած հնարավորությունները, գրավիչ դառնալ ամբողջ մուսուլմանական աշխարհի համար՝ դրանով իսկ ապահովելով սեփական զինված ուժերի անընդհատ համալրումը: Եթե վերոնշյալին հավելենք նաև հմտորեն ծրագրված ռազմական գործողությունները, նախապես ընտրված ռազմավարական և տնտեսական առումով կարևոր թիրախային շրջանների դեմ հարձակումներն, ինչը կառույցին դարձրել է ֆինանսական տեսանկյունից ինքնաբավ, ապա հիմնավորվում է աշխարհի բոլոր ծայրերից նրա շարքերն անընդհատ համալրող իսլամականների ոչ միայն դավանական այլև սոցիալան մոտիվացիան»,- պարզաբանեց Panorama.am-ի զրուցակիցը:

«Իհարկե, վերոնշյալից ելնելով, կարելի է կանխատեսել, որ ԻՊ-ի կողմից նման գործելոճը կշարունակվի նաև հետագայում՝ ներառելով զանգվածային սպանություններ, էթնիկ-դավանական հիմքով զտումներ, հակառակորդ ուժերի ներկայացուցիչների, օտարերկրյա քաղաքացիների ցուցադրական մահապատիժներ, լավ ծրագրված թիրախային ռազմական գործողություններ և այլն, այսինքն՝ բոլոր հնարավոր միջոցները, որոնք կերաշխավորեն կառույցին մշտապես մնալ միջազգային հանրության ուշադրության կենտրոնում և միաժամանակ կապհովեն կառույցի գրավչությունը արմատական իսլամական գաղափարներով տարված երիտասարդության շրջանում ամբողջ աշխարհում: Հետևաբար, ստեղծված իրավիճակում «Իսլամական պետությանը» դիմագրավելու միակ արդյունավետ ճանապարհ կա՝ բացառապես ռազմական եղանակը՝ անհապաղ և համակարգված, վճռական ռազմական գործողությունները՝ մերձավորարևելյան և արտատարածաշրաջանային բոլոր ազդեցիկ ուժերի մասնակցությամբ և, ընդհուպ մինչև կառույցի վերջնական ոչնչացումն, այլապես ԻՊ-ի գործունեությունից բխող սպառնալիքները, հիրավի, կունենան գլոբալ հետևանքներ»,- եզրափակեց Ա.Պետրոսյանը:

Նախորդող`
Ամերիկացի լրագրողի գլխատման նոր տեսանյութը լայն արձագանք է գտել