Ձեր վստահելի աղբյուրը

 «Պետք է արձանագրել որ Հայաստան-Եվրասիական տնտեսական հանձնաժողով համագործակցությունը տալիս է իր պտուղները: Եվ շատ տրամաբանական է, որ նախագահ Պուտինը պետք է ստորագրեր, Եվրասիական տնտեսական միության հիմնադիր պայմանագրին Հայաստանի միանալու հրամանագիրը: Նույնը պետք է անեն Նուրսուլթան Նազարբաևը և Ալեքսանդր Լուկաշենկոն, որից հետո կսկսի ներհանրապետական ընթացակարգը: Փաստաթուղթը պետք է վավերացվի Ռուսաստանի, Ղազախստանի, Բելառուսի և Հայաստանի խորհրդարաններում: Միայն սրանից հետո կգնա Եվրասիական տնտեսական միությանը անդամակցելու բուն գործընթացը, ինչը պահանջում է որոշակի տեխնիկական կարգավորումներ»,- մեկնաբանելով ՌԴ նախագահ Վլադիմիր Պուտինի կողմից Հայաստանի՝ Եվրասիական տնտեսական միությանը (ԵՏՄ) անդամակցելու վերաբերյալ պայմանագիրը ստորագրել հանձարարելու որոշումը` panorama.am-ի հետ զրույցում այս մասին նշեց ԱԺ ՀՀԿ խմբակցության անդամ Խոսրով Հարությունյանը:

Այս համատեքստում անդրադառնալով կառույցին Հայաստանի անդամակցության հեռանկարի վերաբերյալ հնչող կասկածներին` Խ. Հարությունյանը ընդգծեց, որ կայացվել քաղաքական որոշում և գործընթացը անշրջելի է:

«Ես կարծում եմ, որ մենք գործ ունենք լուրջ և խոշոր քաղաքականության հետ, որի հիմքում կանգնած են Եվրասիական տնտեսական նախագծով շահագրհռված պետությունների ծանրակշիռ քաղաքական ղեկավարությունը: Նրանք են նախևառաջ որոշում կայացրել հավանություն տալ Մաքսային միության ապա և Եվրասիական տնտեսական միությանը ինտեգրացիոն գործընթացներին Հայաստանի մասնակցությանը: Հաստատվել է այս գործընթացի ճանապարհային քարտեզը: Այսպիսի քաղաքական որոշումներից հետո կասկածի տակ դնել այս պրոցեսի ապագան, նշանակում է կասկածի տակ առնել ամբողջ միության գաղափարը և Հայաստան-ԵՏՄ փոխշահավետ համագործակցությունը: Մեծ քաղաքականության մեջ դա պարզապես բացառված է: Թե՛ Ղազախստանի քաղաքական ղեկավարությունը, ի դեմս արտգործնախարարի, թե՛ Բելառուսը և թե՛ Ռուսաստանը հայտարարեցին որ Հայաստանի` Եվրասիական տնտեսական միությանը անդամագրվելու գործընթացը անշրջելի է և ձգձգումը պայմանավորված է որոշ տեխնիկական հարցերով»,- ասաց Խոսրով Հարությունյանը:

«Վերջին հաշվով մշակված ճանապարգային քարտեզի արդյունքում ձևավորվել է բազմավեկտոր ուսումնասիրությունների, վերլուծությունների և պայմանավորվածությունների փաթեթ, որում արձանագրված են Հայաստանի` այդ տնտեսական ինտեգրացիոն նախագծին միացման առանձնահատկությունները: Այս գործընթացում, ինչպես բազմիցս շեշտել են հենց Եվրասիական տնտեսական միությամբ շահագրգիռ մյուս երկրների ղեկավարները, Հայաստանը գրանցել է բազմաթիվ հաջողություններ»,- հավելեց բանախոսը:

«Այնպես չէ Հայաստանի` ԵՏՄ-ին անդամակցությունը պայմանավորված է միայն Հայաստանի տնտեսական հետաքրքրություններով: Ճիշտ է, Հայաստանը տնտեսական հետաքրքրությունների առումով լուրջ հետաքրքրություն չի կարող առաջացնել, ո՛չ Բելարուսի ո՛չ Ղազախստանի և ոչ թե Ռուսաստանի համար, սակայն որպես աշխարհաքաղաքական գործոն ունի կարևորագույն նշանակություն: Հայաստանը կարևոր դերակատարում ունի, և մեր երկրի անդամակցությունը առնչվում է կառույցի անդամ երկրների` հարավային ուղղությամբ անվտանգության` այս թվում` տնտեսական անվտանգության ապահովման խնդիրների հետ: Սա երկկողմանի, փոխշահավետ համագործակցության ֆորմատ է»,-շեշտեց Խ. Հարությունյանը:

Իր հերթին ԱԺ պետաիրավական հանձնաժողովի նախագահ Հովհաննես Սահակյանը նշեց, որ ցանկացած պարագայում մենք պետք է առաջնորդվենք մեր պետական շահերով:

«Եվրասիական տնտեսական միությանը Հայաստանի անդամակցությունը պետք է դիտարկել ինչպես տնտեսական, այնպես էլ ռազմական անվտանգության տեսանկյունից: Եվ եթե ամեն ինչ ընթանա բնականոն հունով և մեր պատկերացումներին համապատասխան, ապա ես վստահ եմ, որ կառույցին անդամակցությունը դրական ազդեցություն կունենա Հայաստանի հետագա զարգացման համար»,- ասաց Հովհաննես Սահակյանը:

Ինչ վերաբերում է հնչող կասկածներին, ապա ըստ ՀՀԿ-ական պատգամավորի, դրանք «պայմանավորված են ոչ թե երկրի ապագայի հարցում լուրջ մտահոգություններով, այլ ընդդիմադիր կեցվածքը ընդգծելու ցանկությամբ»: