Ձեր վստահելի աղբյուրը

Վերջին տարիներին Հայաստանում սկսել են ավելի շատ ուշադրություն դարձնել իրենց սեռական առողջությանը. տարեցտարի մեծանում է այն մարդկանց թիվը, ովքեր ավելի շատ են ուշադրություն դարձնում իրենց սեռական առողջությանը, հաճախ են հետազոտվում, ինչպես նաև փորձում են այս կամ այն հարցերի շուրջ խորհրդակցել բժիշկների հետ:

Սեպտեմբերի 4-ը Սեռական առողջության համաշխարհային օրն է, ինչի առիթով Panorama.am-ը զրուցեց ԵՊԲՀ սեքսոպաթոլոգիայի ամբիոնի վարիչ, Սեքսոպաթոլոգիայի համալսարանական կլինիկայի ղեկավար Սևադա Հակոբյանի հետ:

-Ի՞նչ վիճակում է սեռական առողջությունը Հայաստանում:

-Սեռական առողջությունը մարդու ընդհանուր առողջության մի մասն է, որից մեծապես կախված է կյանքի որակը։ Հարկ է նշել, որ եթե առաջ անհատները բժշկին դիմում էին միայն սեռական խանգարումներ, խնդիրներ ունենալու դեպքում, ապա այսօր իրավիճակը փոխվել է:

Սեքսոպաթոլոգին առավել հաճախ դիմում եմ ինչպես ամուսնության պատրաստվող երիտասարդ զույգերը, այնպես էլ հասուն տարիքում գտնվող ամուսնական զույգերը: Այսօր զույգերը կարևորում են սեռական կյանքի որակը, հատկապես կանայք սկսել են ավելի մեծ ուշադրություն դարձնել իրենց սեռական առողջությանը, բացի այդ, զույգերը փորձում են համատեղ ուժերով լուծել իրենց խնդիրները:

Իրականում սեքսուալ խնդիրները վերաբերում են բոլոր տարիքային խմբերին:

-Որո՞նք են սեռական խնդիրների առաջացման հիմնական պատճառները, և սեռական ո՞ր խնդիրներն են տարածված Հայաստանում:

-Սեռական խնդիրների առաջացման պատճառները տարբեր են: Դրանք կարող են պայմանավորված լինել սոցիալական, հոգեբանական, կենսաբանական գործոններով:

Սոցիալ-հոգեբանական ցանկացած խնդիր առաջին հերթին անդրադառնում է սեռական կյանքի վրա: Առավել երիտասարդ տարիքի մարդկանց մոտ գերակշռում են հոգեբանական և ստրեսոգեն, դեպրեսիվ ազդեցություններով պայմանավորված սեռական խանգարումները, տարեցների մոտ` ֆիզիկական: Վերջին շրջանում ազգաբնակչության մոտ ավելացել են սթրեսային գործոնով պայմանավորված սեռական խանգարումները: Որոշակի նշանակություն ունեն խրոնիկական հիվանդություններով պայմանավորված սեռական խանգարումները, ավելացել են նաև արական անպտղության դեպքերը: Ներկայումս համաշխարհային տվյալներով նկատվում է անպտղության աճի միտում: Մեծ նշանակություն ունի նաև սեռական կյանքի նկատմամբ գիտելիքների բացակայությունը, ինչպես նաև ապատեղեկատվությունը, որը նույնպես սեռական խանգարումների պատճառ կարող է հանդիսանալ:

Վերջին շրջանում ավելի հաճախ կարելի է հանդիպել հորմոնալ խանգարումների պատճառով առաջացած սեռական խնդիրների, որոնք նույնպես համաշխարհային մակարդակում աճման միտում ունեն:

Նշեմ, որ սեքսոպաթոլոգին ավելի հաճախ դիմում են տղամարդիկ, քանի որ շատերը մեր երկրում դեռ կարծում են, որ զույգի սեռական կյանքի պատասխանատուն տղամարդն է: Սակայն, սեքսոպաթոլոգները բուժման գործընթացում աշխատում են ներգրավել նաև կնոջը, քանի որ կինն ավելի զգայուն է սեռական կյանքի այս կամ այն փոփոխության նկատմամբ: Ի վերջո սեռական խնդիրներն իրականում ոչ թե մեկ մարդու խնդիրն է, այլ` զույգի, ուստի բուժման համար անհրաժեշտ է, որ զույգերը համատեղ լուծեն առկա խնդիրները, այլ ոչ թե իրար հասցեին մեղադրանքներ հնչեցնեն:

-Կա՞ն սեռական խանգարումներ, որոնք բնորոշ են սոցիալական որևէ խմբի:

-Եթե ամուսնական զույգի կամ տղամարդու մոտ տվյալ սեռական խնդիրը սոցիալական ամուր դիրքի պայմաններում իրեն արտահայտել թույլ չէր տալիս, ապա որոշակի սոցիալական խնդիրների, սոցիալ-հոգեբանական դժվարությունների ժամանակ այն սկսում է առավել արտահայտիչ երևալ և զույգին անհանգստացնել: Ըստ էության` մարդը փորձում է կարգավորել իր մնացած խնդիրները, հետո նոր միայն կարևորել իր սեռական կյանքը: Այդ պարագայում, երբ սեռական կյանքը մղվում է երկրորդ պլան, լուրջ խնդիրներ, դժգոհություններ է առաջացնում հակառակ սեռի մոտ, ինչն էլ զույգի մոտ առաջացնում է սեքսուալ աններդաշնակություն:

Վիճակագրության համաձայն` վերջին տարիներին ամուսնալուծությունների աճ է նկատվում, իսկ ամուսնալուծությունների պատճառներից մեկն էլ սեռական չլուծված խնդիրներն են:

-Սեռական կյանքի կարևորության մասին գիտակցել են բոլոր ժամանակներում, սակայն մեր օրերում սեռական ոչ լիարժեք կյանքը շատ հաճախ է դառնում քննարկումների թեմա: Ի՞նչ առանձնահատկություններ կան ժամանակակից աշխարհում` կապված սեռական առողջության հետ:

- Նոր մարտահրավերներ են առաջ եկել: Այսօր առողջապահության ոլորտում, այդ թվում` սեքսոլոգիայում իրականացվում են կանխարգելիչ միջոցառումներ: Ինչո՞ւ բուժել սեքսուալ խանգարումը, եթե կարելի է այն ժամանակին կանխել: Իհարկե, այսօր սեքսուալ ինֆորմացիայի առավել մատչելիության դեպքում, երբ դրա մեծ մասն էլ ապատեղեկատվություն է, հաճախ կարող է առաջանալ այս կամ այն սեքսուալ խնդիրը:

Մեկ անգամ ևս պետք է նշեմ, որ այսօր ընտանիքներում սկսել են վերաիմաստավորել և կարևորել սեռական կյանքը:  Օրինակ` եթե նախկինում կինը ամաչում էր իր սեռական ցանկությունների կամ խնդիրների մասին բարձրաձայնել, ապա ներկայումս ամուսնական զույգերը դրանք կարևորում են, իսկ խնդրի կարգավորման համար էլ դիմում են մասնագետներին: Այդ առումով կարելի է ասել, որ եթե նախկինում ամուսինները կամուսնալուծվեին որևէ սեքսուլ խնդրի պատճառով, ապա այսօր բազմաթիվ սեքսուալ խնդիրներ բուժվում են: Եւ ամոթ է, որ դրա պատճառով ընտանիքները քայքայվեն:

Ի վերջո, ներդաշնակ սեքսուալ կյանքն ամուր և կայուն ընտանիք ունենալու հիմնական գործոններից է: