Ձեր վստահելի աղբյուրը

Amnesty International միջազգային իրավապաշտպան կազմակերպությունը հանդես է եկել հայտարարությամբ` ահազանգելով, որ օգոստոսի 21-ին Նախիջևանում դաժան ծեծի ենթարկված ադրբեջանցի լրագրող Իլգար Նասիբովը և նրա ընտանիքը շարունակում են սպառնալիքներ ստանալ:

Կազմակերպության տարածած հայտարարության մեջ նշված է, որ ծեծի ենթարկված լրագրողը և նրա ընտանիքը կատարվածը կապում են վերջինիս մասնագիտական լրագրողական և իրավապաշտպան գործունեության հետ:

«Դաժան ծեծից հետո Իլգար Նասիբովը և նրա կինը` Մալահաթ Նասիբովան, բազմաթիվ հեռախոսազանգեր են ստացել, որոնցով վերջիններիս սպառնացել են, որ եթե չդադարեն լրագրողական գործունեությամբ զբաղվել, ապա իրենք կսպանեն նրանց երեխաներին:

Նասիբով ամուսիններին նաև հետևում են անհայտ անձինք, երբ վերջիններս ինչ-որ նպատակով դուրս են գալիս տնից, նույնիսկ այն ժամանակ, երբ Իլգար Նասիբովը բուժման նպատակով հիվանդանոց էր այցելում»,- ասված էհայտարարության մեջ:

Amnesty International-ը հիշեցնում է, որ ամուսինների նկատմամբ հալածանքները և սպառնալիքները նոր չեն: Այս տարվա հուլիսի ամսին Իլգար Նասիբովը «պատահաբար» վրաերթի էր ենթարկվել, իսկ 2007 թ-ին էլ 90 օրով բանտարկության դատապարտվել: Ըստ ամուսինների` այս բոլորը իրենց լռեցնելու ադրբեջանական իշխանությունների հաջորդական քայլերն են:

Հաղորդվում է, որ մինչ այս պահը ադրբեջանական իշխանությունները ծեծի դեպքի մասով քրեական գործ չեն հարուցել և ոչ էլ հետաքննություն է իրականացվում:

Իրավապաշտպան կազմակերպությունը ևս մեկ անգամ կոչ է անում ադրբեջանական իշխանություններին հարգել մարդու հիմնարար իրավունքները և ազատությունները, կատարել գործի թափանցիկ հետաքննություն և պատասխանատվության ենթարկել մեղավորներին:

Նախորդիվ`
Freedom House»-ը դատապարտել է Ադրբեջանի իշխանություններին` լրագրողի վրա հարձակման հերթական դեպքի համար
ԱՄՆ Պետդեպը դատապարտել է Ադրբեջանում լրագրողին ծեծի ենթարկելը