Ձեր վստահելի աղբյուրը

Սիրիայում շարունակվում են ականներ պայթել, դիպուկահարներ են կրակում, իսկ այնտեղ ապրող հայերը նույն վիճակում են, ինչ այդ երկրի մյուս բնակիչները:

Panorama.am-ի թղթակցի հետ զրույցում Հայաստանի սփյուռքի նախարարության Սփյուռքի Մերձավոր և Միջին Արևելքի հայ համայնքների վարչության պետ Լուսինե Ստեփանյանն ասաց, որ իրավիճակը չի փոխվել և անկանխատեսելի է:

Անդրադառնալով քեսաբահայերի՝ իրենց տներ վերադարձին, նա նշեց, որ մեծ աշխատանքներ են տարվել և դեռ շարունակվում են. «Այն, ինչ տեղի էր ունեցել մարտի 21-ի գիշերը, դրանից հետո բնակավայրերն արագ վերականգնել հնարավոր չէր: Բայց կյանքը կամաց-կամաց բնականոն հունի մեջ է ընկնում»:

Լուսինե Ստեփանյանը հավելեց, որ Հայաստանում դեռ մի քանի քեսաբահայ ընտանիք է մնացել:

Ինչ վերաբերում է մյուս հայաշատ քաղաքներին, նրա խոսքով, Հալեպում ջրի և էլեկտրաներեգիայի խնդիր միշտ կա, պարբերաբար վերականգնվում է և օրվա որոշակի ժամանակահատվում լինում է:

«Նույն վիճակում էլ Դամասկոսն ու մյուս բնակավայրերն են: Վերջերս էլ Դամասկոսում պայթյուններ են եղել, բարեբախտաբար հայեր չեն տուժել: Ամբողջ Սիրիայում հայերի վիճակը կապված է ընդհանուր վիճակից»,- ասաց նա:

Լուսինե Ստեփանյանը, պատախանելով հարցին, թե դպրոցներն ու մանկապարտեզները գործում են, ասաց, որ ուսումնական տարին իրենց մոտ դեռ չի մեկնարկել, բայց անցած տարին մինչև վերջին օրն աշխատել են:

Հարցին՝ քանի՞ հայ կա Սիրիայում և քանիսն են եկել Հայաստան, Սփյուռքի Մերձավոր և Միջին Արևելքի հայ համայնքների վարչության պետը պատասխանեց, որ Սիրայում մնացած հայերի թիվը հստակ չէ, հաշվառում չի կատարվել, բայց իրենց տեղեկություններով՝ 40-45 հազար հայ դեռ կա: Սիրիայից Հայաստան տեղափոխվածներին թիվն այս պահին 12 հազար է: