Ձեր վստահելի աղբյուրը

Ռուսաստանի Դաշնությունը միգրացիոն օրենքներում փոփոխությունները կատարում է ոլորտի կարգավորման համար: Այս մասին Ծաղկաձորում միգրացիայի խնդիրներին վերաբերող սեմինարի ժամանակ ասաց ՀՀ միգրացիոն պետական ծառայության պետի տեղակալ Իրինա Դավթյանը:

Այսպիսով, ըստ նրա, Ռուսաստանը փորձում է կանոնակարգել միգրացիոն ոլորտը, ամեն մի հնարավոր դեպքի համար սահմանել կարգ ու կանոն:

«Իհարկե քաղաքացիների մեծ մասը պատրաստ չեն դրան, բայց սա օրինաչափ, օբյեկտիվ գործընթաց է, քանի որ յուրաքանչյուր երկիր փորձում է ցանկացած ոլորտում, այդ թվում` միգրացիոն, իր օրենսդրությունը կանոնակարգել, և սահմանել խաղի այնպիսի կանոններ, որոնք բխում են իր երկրի շահերից»,- ընդգծեց Ի.Դավթյանը:

Նա նաև տեղեկացրեց, որ փոփոխությունների արդյունքում` ավելի քան 35 հազար ՀՀ քաղաքացի զրկվել է ՌԴ մուտքի հնարավորությունից:

«Սև ցուցակում» հայտնվելու պատճառները, ըստ Ի. Դավթյանի, տարբեր են. «Առաջին խնդիրն այն է, որ նրանք տեղեկացված չեն, ծանոթ չեն նոր փոփոխություններին, թեև դրանք միանգամից ուժի մեջ մտան և քաղաքացիները չկարողացան իրազեկվել: Արդյունքում` խախտում կատարած քաղաքացիները երկրից դուրս գալուց հետո զրկվեցին ՌԴ մուտքի հնարավորությունից: Բացի այդ, նախկինում տվյալ անձինք հնարավորություն են ունեցել այլ կերպ բնակվել և աշխատել Ռուսաստանում, բայց այսօր շատ բան փոխվել է»:

Օրենքների փոփոխությունների մասին մանրամասներ ներկայացնելով` մասնագետն ասաց, որ ՌԴ օրենսդրության մեջ տեղի է ունեցել 4 փոփոխություն, որից երկուսը վերաբերում են «Քաղաքացիության մասին» օրենսդրությանը, երկուսը` «Օտարերկրյա քաղաքացիների իրավական կարգավիճակի մասին» օրենքին:

«Քաղաքացիության մասին» օրենքում կատարվել են հետևյալ փոփոխությունները. ՌԴ քաղաքացիություն ունեցող անձինք, ովքեր ունեն այլ երկրի քաղաքացիություն, պարտավոր են երկու ամսվա ընթացքում այդ մասին տեղեկացնել ՌԴ իշխանություններին: Այդ դրույթը ուժի մեջ է մտել այս տարվա օգոստոսի 4-ից, այսինքն` ժամկետը մինչև հոկտեմբերի 4-ն է: Ըստ Ի.Դավթյանի` բացառություն են կազմում այն երկքաղաքացիները, ովքեր այս պահի դրությամբ ՌԴ-ում չեն գտնվում:

«Այսինքն` եթե տվյալ անձը ներկայումս բնակվում է Հայաստանում, ապա ինքը այդ պարտավորությունից ազատվում է, սակայն հենց մուտք գործի ՌԴ, ապա 60 օրվա ընթացքում նորից պետք է տեղյակ պահի համապատասխան ծառայություններին»,- ասաց նա:

Երկրորդ կարևոր հանգամանքն այն է, որ ծանուցման հետ միասին անձը պետք է ՌԴ իշխանություններին ներկայացնի փաստաթուղթ, որը կհավաստի անձի՝ ՀՀ-ում մշտական բնակության փաստը:

Հաջորդ փոփոխությունը վերաբերում է ՌԴ քաղաքացիություն ստանալու կարգին: Փոփոխության համաձայն` ՌԴ քաղաքացիություն ստանալու համար սահմանվել է հեշտացված կարգ` «Հայրենակիցների համար»: Հայրենակիցներ են համարվում նրանք, ովքեր բավարարում են 4 պահանջի: Առաջին` ռուսաց լեզվի կրողներ են, իսկ դրա համար պետք է ունենան համապատասխան հանձնաժողովի եզրակացությունը, երկրորդ` մշտապես բնակվում են ՌԴ տարածքում, ունենան կացության կարգավիճակ, սակայն այդ պայմանը չբավարարելու դեպքում գործում է երրորդ պայմանը` իրենց նախնիները` ծնողները, տատիկներ-պապիկները, պետք է բնակված լինեն կամ ներկայումս բնակվեն ՌԴ տարածքում:

Չորրորդ պայմանն այն է, որ տվյալ անձը պետք է հրաժարվի իր քաղաքացիությունից, որ ներկայումս ունի:

«Իսկ եթե անձը գտնվում է Ռուսաստանում և հնարավորությունի չունի գալ Հայաստան, ապա այդ դեպքում նա կարող է ծանուցել այդ մասին և տեղեկանք վերցնել Դաշնային միգրացիոն ծառայությունից»,- ասաց Ի.Դավթյանը:

Նա նաև հայտնեց, որ եթե անձը թաքցնի քաղաքացիությունը, ապա այդ դեպքում նախատեսված է տուգանք՝ երկու հարյուր հազար ռուբլու չափով, կամ հարկադիր աշխատանք 400 ժամ: Իսկ եթե 60 օրվա ժամկետներն են խախտվել, կամ որևէ անճշտություն է եղել այդ ծանուցման մեջ, ապա այդ դեպքում տուգանքը կազմում է 500-ից 1000 ռուբլի:

Անդրադառնալով «Օտարերկրյա քաղաքացիների իրավական կարգավիճակի մասին» օրենքում տեղի ունեցած փոփոխություններին` Ի.Դավթյանը նշեց, որ օրենքը ուժի մեջ է մտել այս տարվա հուլիսի 22-ից:

Փոփոխություններից մեկը վերաբերում է միգրացիոն քարտերին: Մասնավորապես, բոլոր այն անձինք, ովքեր մուտք են գործում ՌԴ և նպատակ ունեն աշխատել, միգրացիոն քարտը լրացնելիս` «Այցի նպատակը» բաժնում պետք է պարտադիր նշեն աշխատանք բառը, հակառակ պարագայում, եթե դիմեն Դաշնային միգրացիոն ծառայություն աշխատանքի թույլտվություն կամ պատենտ ստանալու համար, ապա իրենց հայցը կմերժվի:

Օրենքում կատարված երկրորդ փոփոխությունը ուժի մեջ է մտնելու 2015թ-ի հունվարի 1-ից: Սա վերաբերում է նրան, որ բոլոր օտարերկրյա քաղաքացիները, ովքեր ցանկություն ունեն ՌԴ-ում աշխատել, կամ ստանալ կացության կարգավիճակ, կամ աշխատանքի թույլտվություն, ապա պետք է անցնեն որոշակի թեստավորում, որը վերաբերելու է անձի ռուսաց լեզվի իմացությանը, ՌԴ թույլտվությանը և ՌԴ օրենսդրությանը:

«Այս երեք ուղղություններով աշխատանքային միգրանտները քննություն են հանձնելու, որոնք վճարովի են: Հաջող հանձնելու դեպքում՝ միգրանտը ստանալու է հավաստագիր, որը ուժի մեջ է 5 տարի, եթե հաջող չի հանձնում, ապա կարող է կրկին քննություն հանձնել»,- ասաց Ի. Դավթյանը:

Ընդ որում` միգրանտները քննությունները կարող են հանձնել և՛ ծագման, և՛ մուտքի երկրներում: Նրա խոսքերով` թեստերը հասանելի են ՌԴ թեստային կոնսորցիումի և գիտության և կրթության նախարարության կայքերում: