Ձեր վստահելի աղբյուրը

ՀԱԿ խմբակցության անդամ Լյուդմիլա Սարգսյանը քիչ առաջ Ազգային Ժողովում ընթացող ԱԺ-Կառավարություն հարցուպատասխանի ժամանակ բարձրացրեց Կ.Դեմիրճյանի անվան մարզահամերգային համալիրի ճակատագրի մասին հարցը: Ընդդիմադիր պատգամավորը ասաց, որ ամիսներ առաջ նամակով հետաքրքրվել էր, թե որքանով են համապատասխանում իրականությանն այն լուրերը, որ մարզահամերգային համալիրը լինելու է Պաշտպանության նախարարության հաշվեկշռում: Ու թեև հուլիսի վերջին նրան պատասխանել են, որ համալիրի 100 տոկոս բաժնետոմսերը գտնվում են Մուրադյան ընտանիքի մոտ և Պաշտպանության նախարարությունը որևէ կապ չունի մարզահամերգային համալիրի հետ, այդուհանդերձ հետագան բոլորիս է հայտնի:

«Այնպես չէ, որ մենք դեմ ենք, որ այդ կառույցը լինի պետության հաշվեկշռում, բայց ինչու ոչ Սպորտի կամ Մշակույթի նախարարությունը: Արդյո՞ք ավելի քիչ եք վստահում այս նախարարություններին»,- հետաքրքրվեց Լյուդմիլա Սարգսյանը:

Արձագանքելով հարցին` ՀՀ կառավարության աշխատակազմի ղեկավար-նախարար Դավիթ Հարությունյանը նախ ասաց, որ քիչ վստահելու խնդիր նշված նախարարությունների հանդեպ, իհարկե, չկա: Այնուհետ ասաց, որ իրականում ՊՆ-ն չէ և որևէ պետական կառույց չէ, որ կարող է արդյունավետ կառավարել այդ շենքը:

«Մենք խորապես համոզված ենք, որ այն պետք է լինի ձեռնարկատիրական գործունեության կենտրոնում: Մենք որոնելու ենք արդյունավետ կառավարիչ»,- տեղեկացրեց Դ.Հարությունյանը:

Լ.Սարգսյանը նաև հետաքրքրվեց՝ կարո՞ղ են վստահ լինել, որ մարզահամերգային համալիրը կշարունակի կրել Կարեն Դեմիրճյանի անունը և արդյո՞ք կարող է վստահեցնել, որ որոշ ժամանակ անց համալիրը կրկին չի հանվի վաճառքի:

«Թեև այդ հարցը մենք կառավարությունում չենք քննարկել, բայց վստահաբար կարող եմ ասել, որ անկախ նրանից, թե ում կառավարման տակ կլինի մարզահամերգային համալիրը, այն ոչ միայն կպահպանի իր անունը, այլև չի կարող դառնալ առևտրային կառույց և կպահպանի իր նշանակությունը»,- նշեց նա:

Համալիրի հետ կապված հետագա գործընթացները, ըստ Դ.Հարությունյանի, կլինեն թափանցիկ. «Մենք դա անպայման կապահովենք»: