Ձեր վստահելի աղբյուրը

«Պարբերաբար հատուկ դպրոցների մասով նմանատիպ տեղեկություններ են տարածվում թե մամուլում, թե հասարակության շրջանում: Եվ որպես լուծման ուղի այս խնդրին տեսնում եմ լիազոր մարմնի կողմից վերահսկողության ուժեղացումը, պետք է լինեն այնքան արդյունավետ մեխանիզմներ, որ բացառեն այդ երևություները…. Բայց ինչքան էլ ասում ենք` միևնույն է ակնհայտ տեղաշարժ չունենք»,- Panorama.am-ի հետ զրույցում ասաց ԱԺ Կրթության և գիտության հարցերի մշտական հանձնաժողովի նախագահ Արտակ Դավթյանը` անդրադառնալով օրերս հրապարակված Հանրային դիտորդական խմբի երրորդ զեկույցին:

Հիշեցնենք, զեկույցը պարունակում էր տեղեկություններ այն մասին, թե ինչպես են ոտնահարվում երեխաների իրավունքները հատուկ դպրոցներում, ինչպես են նրանց պատժում ու անգամ ծեծի ենթարկում տնօրենն ու մի շարք աշխատակիցներ:

Արտակ Դավթյանը նշեց, որ խնդրի լուծմանը անշուշտ կօգնի «Համընդհանուր ներառական կրթության մասին» օրենքի նախագծի վերջնական ընդունումը, որն ընդգրկված է այս նստաշրջանի օրակարգում և շատ մեխանիզմներ է առաջարկում: Պատգամավորը կարևորեց այն հանգամանքը, որ օրենքն ընդունելուց հետո ամբողջությամբ կվերանա «Կրթության առանձնահատուկ կարիք ունեցող անձանց կրթության մասին» օրենքը, ինչը կնպաստի կրթության առանձնահատուկ կարիք ունեցող անձանց շուրջ մթնոլորտի փոփոխման, քանի որ հարաբերությունները պետք է բոլորովին այլ լինեն, որոնք հարիր են կրթական միջավայրին:

«Խնդիրը բավականին խորն է և իրականում մենք` օրենսդիրներս ևս, լուրջ անելիքներ ունենք: Կարող եմ ասել, որ այդ անելիքների կես ճանապարհը կարծես թե արդեն անցել ենք, իսկ օրենքն ընդունելուց հետո կանցնենք նաև մնացածը: Օրինակ, կարիքների գնահատումը, որ եղել է մինչ այժմ, այդտեղ որոշակի բեկումնային մոտեցումներ են լինելու, որոնք պետք է բերեն նշած որոշակի առողջ մթնոլորտի ձևավորմանը: Պետք է բացառվեն նաև այլ երևույթներ, բայց ինչքանով դա մեզ կհաջողվի` ժամանակը ցույց կտա»,- նշեց հանձնաժողովի ՀՀԿ-ական նախագահը:

Նա նաև հորդորեց բոլորին` թե’ լրատվամիջոցներին, թե’ հասարակական կազմակերպություններին այս հարցում լինել ակտիվ, քանի որ խոսքը մեր հանրության ամենախոցելի խմբին է վերաբերում. «Եվ կախված նրանից, թե ինչպիսին է մեր վերաբերմունքը ամենաանպաշտպան մարդկանց և երեխաների նկատմամբ, կարելի է նաև գնահատական տալ, թե ինչպիսին ենք մենք»:

Ինչ վերաբերում է հարցին, թե արդյոք սա այն խնդիրն է, որ միայն օրենսդրական կարգավորմամբ կարելի է լուծման հասնել, Ա.Դավթյանը նշեց, որ լիովին համաձայն է` միայն օրենք գրելով հնարավոր չէ խնդիր լուծել: Բայց հենց այդ օրենքը իր մեջ ներառում է համալիր մեխանիզմներ, որոնք պետք է բերեն նաև թե մտածելակերպի, թե միջավայրի փոփոխության:

«Ի՞նչ է նշանակում համընդհանուր ներառում: Դա նշանակում է, որ կրթական ծրագիրը պետք է գրվի այնպես, որ այն յուրացվի թե կրթության առանձնահատուկ կարիք ունեցող երեխայի, թե նման կարիք չունեցող երեխայի կողմից: Ի դեպ ավելացնեմ, որ վերաբերմունքը նորմալ է լինում միայն այն ժամանակ, երբ համապատասխան միջավայր է ձևավորվում, ինչն էլ պետք է արվի այդ օրենքով»,- շեշտեց նա:

Ա.Դավթյանը ավելացրեց նաև, որ իրականում օրենսդիրը հեծանիվ չի հորինում, այլ ներդնելու է այն, ինչ վաղուց գոյություն ունի զարգացած երկրներում: Օրինակ, ներդրվելու է ուսուցչի օգնականի ինստիտուտը, շեշտը դրվելու է համապատասխան մասնագիտական վերապատրաստմանը, բացվելու են մարզային կենտրոններ և այլն:

«Մնում է միայն օրենքն ընդունենք, որն էլ ի վերջո կփոխի այն ամենը, ինչ այսօր բոլորիս այդքան անհանգստացնում է»,- ընդգծեց պատգամավորը` հույս հայտնելով, որ այս նստաշրջանում օրենքը վերջնական կընդունվի և 2015թ-ի հունվարից կմտնի ուժի մեջ:

Հարակից հրապարակում`
«Ծեծում են ձեռքով, ոտքերով, երկաթե ձողով». Զեկույց հատուկ դպրոցների մասին