Ձեր վստահելի աղբյուրը

Հայաստանի նախագահ Սերժ Սարգսյանի` Սուրբ Աթոռ  կատարվելիք պաշտոնական այցին ընդառաջ իտալական մամուլում անդրադարձել են Արևելքում քրիստոնյաների դրությանը: Իտալական առաջատար Corriere dela sera պարբերականը վերջին համարի «Ագրեսիա Արևելքի քրիստոնյաների նկատմամբ» վերտառությամբ հոդվածում գրված է  վերջին ամիսներին Մերձավոր Արևելքում կրոնական ծայրահեղականության աճի հետևանքով քրիստոնյա բնակչության, ինչպես նաև քրիստոնեական ժառանգության ճակատագրի և խնդիրների մասին:

Պարբերականը նշում է, որ քանդված եկեղեցիները, դատարկ խորանները, ավերված հնադարյան սրբապատկերները, որոնց կարելի է հանդիպել Սիրիայում, Իրաքում, Անատոլիայում, ընդամենը տխուր պատկերի մի մասն են:

Անդրադառնալով Մերձավոր Արևելքի նշված, ինչպես նաև այլ երկրներում գտնվող քրիստոնյա բնակչության թվաքանակին` պարբերականը նկատում է, որ հատկապես վերջին տարիներին թվաքանակի նվազումը ահագնացող աստիճանի է հասել:

Հղում անելով Օքսֆորդի համալսարանի տվայլներին` իտալական պարբերականը նշում է, որ օրինակ Սիրիայում 2050 թվականին քրիստոնյաները կազմելու են բնակչության ընդամենը 1.32 տոկոսը, այն դեպքում, երբ տարիներ առաջ կազմում էին բնակչության ավելի քան 15 տոկոսը: Իրաքում` 6.4-ից տոկոսից նվազելու է մինչև 0.37 տոկոս: Պաղեստինում 11.6 տոկոսից` 0.5 տոկոս, իսկ Անատոլիայում 22 տոկոսից հասնելու է 0.17 տոկոսի: Նույնիսկ Լիբանանում, որն ըստ պարբերականի, աչքի է ընկնում իր կրոնական բազամազանությամբ, քրիստոնյաների թիվը նվազելու է` կազմելով բնակչության մեկ քառորդը:

«Թե ինչ տեսք ունեն այդ երբեմնի քրիստոնյա բնակավայրերը, նույնիսկ քրիստոնեությունը, ամբողջացված են գեղեցիկ և թախծալի ցուցահանդեսում, որը Ռիմինիիում տեղի ունեցած ցուցադրությունից հետո սեպտեմբերի 19-ին երկու շաբաթով բացվելու է Վիտորիանիի պատկերասրահում: Ցուցահանդեսը կրում է «Արևելքի առակ. Քրիստոնեությունը նոր հազարամյակի մարտահրավերների առջև» անվանումը, որը նախաձեռնվել է հայազգի դիվանագետ և մտավորական Վարդան Կարապետյանի կողմից: Ցուցահանդեսը հիմնված է Միքելե Բորզոնիի լուսանկարների և Անդրեա Միլուցցիի խոսքերի վրա, ովքեր տարիներով ճամփորդել են` փորձելով հասկանալ, թե ինչ է մնացել Մերձավոր Արևելքի քրիստոնյա բնակչությունից»,- գրել է պարբերականը:

Շարունակելով` քրիստոնեական ժառանգության ոչնչացման թեման` պարբերականը անդրադառնում է նաև Վանի Աղթամար եկեղեցուն. «Վանդալիզմի ենթարկվելով 1915 թվականին` եկեղեցին վերաբացվել է 2007 թվականի մարտին` որպես արդեն աշխարհիկ թանգարան` թուրքական անվամբ, Աթաթուրքի դիմանկարով և առանց հայկական խաչի: Դա այն դարաշրջանն էր, երբ հայերին դուրս քշեցին Անատոլիայից»:

Պարբերականը նշում է, որ «ցեղասպանություն վերապրածների ժառանգներն Աղթամարում տարվա ընթացքում ընդամենը մեկ անգամ աղոթք անելու իրավունք ունեն»:

Եզրափակելով` պարբերականը գրում է, որ Հայոց ցեղասպանության 100 ամյա տարելիցին ընդառաջ քրիստոնյա բնակչությունը Սիրիայում և Իրաքում կրկին վերապրում է իսլամական ծայրահեղականության դրսևորման մի նոր փուլ, որը «վերստին կենդանացնում է քրիստոնյաների դեռևս արնահոսող վերքը»:

Հիշեցնենք, որ պարբերականի կողմից հիշատակված «Արևելքի առակ. Քրիստոնեությունը նոր հազարամյակի մարտահրավերների առջև» անվանումը կրող ցուցահանդեսը կազմակերպվել է Ժողովուրդների բարեկամության ամենամյա փառատոնի շրջանակներում, Սուրբ Աթոռում Հայաստանի Հանրապետության դեսպանության նախաձեռնությամբ և նրա հովանու ներքո:

Լուսանկարները` «Corriere dela sera»-ից

Նախորդիվ`
Ցուցահանդես Հռոմում` նվիրված Մերձավոր Արևելքի քրիստոնյա փոքրամասնություններին