Ձեր վստահելի աղբյուրը

Սեպտեմբերի 23-ին ադրբեջանական մի շարք լրատվամիջոցներ տեղեկություն տարածեցին առ այն, որ Ադրբեջանի ազգային անվտանգության նախարարության աշխատակիցների կողմից իրականացված օպերատիվ-որոնողական աշխատանքների արդյունքում ձերբակալվել են 26 ադրբեջանցիներ, որոնք մեղադրվում են իսլամական ծայրահեղ արմատական խմբավորումներին անդամակցելու, և դրանց շարքերում Սիրիայում և այլ երկրներում ակտիվություն ցուցաբերելու մեջ :

«Սա ադրբեջանական իշխանությունների բեմադրած հերթական սցենարներից մեկին է նման»,-անդրադառնալով ադրբեջանական մամուլում արծարծված այս տեղեկություններին՝ «Panorama.am»-ի հետ զրույցում իր կարծիքը հայտնեց արաբագետ Սարգիս Գրիգորյանը:

Ըստ արաբագետի՝ «Ասածի վկայությունն է «Իսլամական պետությանը» (ԻՊ, նախկին ԻՇԻՊ) անդամակցելու մեղադրանքով վերոհիշյալ 26 իսլամականների ձերբակալության մասին տեղեկության տարածումն այն օրերին, երբ մերձավորարևելյան տարածաշրջանում ընթացող զարգացումներում կոալիցիոն ուժերի կողմից տեղի են ունենում ռազմաօդային հարվածներ ԻՊ-ի զինյալների դիրքերին: Բաքուն նման գործողություններով պատրանք է ստեղծում, թե իբր Ադրբեջանը մաս է կազմում միջազգային հակաահաբեկչության դեմ պայքարին, և արձագանքում է համաշխարհային հանրության կոչին` պայքարել ԻՊ-ի դեմ»:

Բանախոսի խոսքերով՝ «Եթե նույնիսկ Բաքուն անկեղծ միտումներով առաջնորդվելով կարողանում է ցույց տալ, թե ադրբեջանական իրավապահ մարմինների փայլուն գործողությունների և մասնագիտական կարողությունների շնորհիվ, այնուամենայնիվ, ձերբակալվել են իսլամական ծայրահեղ արմատական խմբավորումների անդամներ, ապա առնվազն ուշագրավ են անդամների թվաքանակը` 26 իսլամականների ձերբակալությունը չափազանց շատ է «աշխարհիկ» Ադրբեջանի համար: Բացի այդ, ձերբակալվածներից ոմանք Ադրբեջանում զբաղվել են երիտասարդ ջիհադականների հավաքագրմամբ, ինչը խոսում է Ադրբեջանում առկա ջիհադականների հավաքագրման լավ կազմակերպված ցանցային կառույցների մասին, որոնց հիմնական խնդիրը ադրբեջանցի իսլամականներ մատակարարելն է ջիհադական տարբեր ճակատներ:

Զրուցակիցը նշեց, որ, ըստ ադրբեջանական իրավապահ մարմինների ներկայացրած հետաքննության նախնական տվյալների` ձերբակալված իսլամականներից շատերը եղել են բազմաթիվ մուսուլմանական երկրներում, ներգրավված են եղել այդ երկրներում իրականացվող ջիհադական պայքարին, մասնակցել են Սիրիայում և Իրաքում տեղի ունեցող կռիվներին: Նման փորձ և ջիհադական պայքարի անցած ուղի ունեցող ադրբեջանցիները պահանջված են իսլամական ծայրահեղական շրջանակներում՝ շրջագայելով աշխարհով մեկ, և իրենց ջիհադական փորձը ներդնելով աշխարհի տարբեր հատվածներում:

Ըստ արաբագետի՝ եթե ձերբակալվածներն արդեն եղել են Ադրբեջանից դուրս, կիրառել են իրենց ջիհադական փորձն ու բարեհաջող վերադարձել են Ադրբեջան, ուրեմն ադրբեջանական իշխանություններն այդքան էլ չեն վերահսկում նրանց տեղաշարժերը, կամ էլ՝ փորձում են աչք փակել ադրբեջանցի իսլամականների ճանապարհորդությունների վրա, հավանաբար փորձելով ձերբազատվել անցանկալի և վտանգավոր տարրերից: Մինչդեռ արդեն փորձառու ադրբեջանցի ջիհադականները վերադառնում են Ադրբեջան՝ սպառնալիք ներկայացնելով ոչ միայն Ադրբեջանի համար, այլև նրա սահմաններից դուրս: