Ձեր վստահելի աղբյուրը

Կատալոնիայի ղեկավար Արթուր Մասն այսօր հրամանագիր է ստորագրել Կատալոնիայի՝ Իսպանիայից անկախանալու հանրաքվե անցկացնելու վերաբերյալ, որը նախատեսված է նոյեմբերի 9-ին: Այս մասին տեղեկացնում է «Ռոյթերս» գործակալությունը:

Երկրամասի խորհրդարանը սեպտեմբերի 19-ին ընդունել էր հանրաքվեի մասին օրենքը, որը հնարավորություն է ընձեռում համաժողովրդական հարցում անցկացնել առանց պաշտոնական Մադրիդի համաձայնության:

Կատալոնիայի իշխանությունները նախկինի պես պնդում են տարածաշրջանի անկախության անհրաժեշտությունը, համարելով, թե կենտրոնական իշխանությունները տարեց տարի կրճատոմ են մարզին տրամադրվող բյուջետային հատկացումները:

Հաղորդագրության համաձայն, նախատեսված հանրաքվեին Կատալոնիայի բնակիչներին առաջարկվելու է պատասխանել հարցին՝ «Ցանկանո՞ւմ եք արդյոք, որպեսզի Կատալոնիան դառնա պետություն» և եթե այո՝ ապա «Ցանականո՞ւմ եք արդյոք, որպեսզի Կատալոնիան դառնա անկախ պետություն»:

Իսպանիայի կառավարությունն ու Սահմանադրական դատարանը հանրաքվեի անցկացումն անօրինական էին համարել և հայտարարել, թե չեն ճանաչելու դրա արդյունքները:

«Omnibus» ըկերության կողմից անցկացրած հասարակական կարծիքի վերջին հարցման տվյալներով, Կատալոնիայի բնակիչների շուրջ 58,8%-ը ամբողջովին կամ մասնակիորեն կողմ է, որպեսզի Կատալոնիան պետություն հռչակվի, մինչդեռ հարցվածների 31,9% դեմ են գաղափարին: