Ձեր վստահելի աղբյուրը

«Երևանը և Բաքուն միևնույն բան են պահանջում մեզանից: Հստակ կանգնեք մեր կողքին և խզեք հակառակ կողմի հետ հարաբերությունները: Դա երբեք չի լինելու, քանի որ դա սխալ է և ապակայունացնող»,- անդրադառնալով Ռուսաստանի կողմից Ադրբեջանին զենքի վաճառքի թեմային` այսօր կայացած Մոսկվա-Երևան տեսակամուրջի ժամանակ նման տեսակետ հայտնեց ռուսաստանցի քաղաքագետ Սերգեյ Միխեևը:

Բանախոսը շեշտեց, որ պատերազմի բացառումը բխում է Ռուսաստանի շահերից և հստակ է` այստեղ Մոսկվայի և Երևանի շահերը համընկնում են:

«Այս հարցում Ռուսաստանի կողմից հավասարակշռության պահպանումը անխուսափելի է: Իհարկե` կարելի է հասարակական, լրագրողական մակարդակում բարձրացնել այս հարցը, սակայն Ռուսաստանի դիրքորումը այսպիսին է, և չի փոփոխվի»,- ասաց Սերգեյ Միխեևը:

Բանախոսը շեշտեց, որ Ռուսաստանը ՀԱՊԿ շրջանակներում «երաշխավորում է Հայաստանի անվտանգությունը», սակայն առկա են նաև ռուս-ադրբեջանական հարաբերություններ, որոնց հետ Մոսկվան չի կարող հաշվի չնստել:

«Լուրջ փորձագետները հաստատում են, որ Ռուսաստանը այլ ընտրություն էլ ուղղակի չունի: Մեր նպատակը մի կողմից, ռազմական գործողությունների վերսկսման բացառումն է, իսկ մյուս կողմից, տարածաշրջանում հավասարակշռության պահպանումը, որ, ասենք, Բաքվում չհայտնվի ՆԱՏՕ-ի ռազմակայան»,- ասաց Ս. Միխեևը:

Նա վստահության հայտեց որ Ռուսաստանի բևեռացված դիրքորումը նկատելիորեն կսրի լարվածությունը տարածաշրջանում:

ԱՊՀ երկրների ինսիտուտի Կովկասի բաժնի ղեկավար Վլադիմիր Եվսեևը իր հերթին շեշտեց, որ եթե անգամ Ռուսաստանը դադարի զենք վաճառել Ադրբեջանին, Բաքուն ամենևին չի հրաժարվի այն գնելու մտադրությունից:

«Ադրբեջանը պարզապես կփոխի մատակարարողին: Ի՞նչ է` այդ դեպքում Հայաստանին ավելի հեշտ կլինի: Հայաստանին դրանից ավելի հեշտ չի լինի:  Այս տեսանկյունից պետք է հստակ գիտակցել, որ եթե Ադրբեջանը ցանկանում է զենք գնել և դրա համար ունի միջոցներ, նա մշտապես այն կգնի զենքի միջազգային շուկայում: Այս տեսանկյունից ձեզ համար ավելի լավ է, որ դա լինի ռուսական զենքը, որովհետև մեք գիտենք ինչքան, ինչ տեսակի, որակի և ինչպիսի խնդիրներով զենք է մատակարարվել: Մենք այս զենքը գիտենք «միջից» և մեք ձեզ մշտապես կտրամադրենք «հակաթույնը»: Իսկ եթե այդ զենքը մատակարարի օրինակ` Իսրայելը, ԱՄՆ-ն կամ որևէ այլ երկիր, ապա «հակաթույնը» դուք չեք ունենա և ձեզ դժվար կլինի դիմակայել այդ զինատեսակներին,- ասաց Վլադիմիր Եվսեևը:

Նախորդող`
Ռուս փորձագետ. ՀՀ-ի` ԵՏՄ-ին անդամակցության հարցում Արցախի գործոնի քննարկման փորձերը «լիակատար հիմարություն են»