Հասարակական հնչեղություն ունեցող գործերով իրավական որոշում չենք տեսնում. Լ.Ստեփանյանի սպանության գործ
Հասարակական հնչեղություն ունեցող գործերով մեր իրավական համակարգն արդեն պարալիզացվել է: Panorama.am-ի հետ զրույցում նման դիտարկում արեց Նոյեմբերյանի զորամասում նախորդ տարի մահացած զինծառայող Լյուքս Ստեփանյանի գործով մեղադրյալ Դավիթ Խաչատրյանի պաշտպան Երեմ Սարգսյանը:
«Եթե գործը հնչեղություն ունի, սկսում է գործել բացարձակապես այլ իրավաբանություն, որն ավելի շուտ ոչ թե իրավաբանություն է, այլ ընդամենը հարմարվել, հասարակական տրամադրությունները բավարարել: Այսինքն՝ բացի իրավաբանությունից, սկսում է ամեն ինչ գործել»,- ասաց փաստաբանը՝ ընդգծելով, որ արդեն ականատես են լինում, որ ցանկացած հասարակական հնչեղություն ունեցող գործով որևէ իրավական որոշում չեն կարողանում տեսնել: Ստեղծված իրավիճակը, ըստ Ե. Սարգսյանի, կաշկանդվածության հետևանք է:
«Որոշում կայացնող բոլոր մարմինները՝ քննչական, դատախազություն, դատարան, նույն տրամաբանությամբ են գործում: Պետք է փոխել մտածելակերպը, աշխատելաոճը: Բոլորն աշխատում են ապահովագրելու մեթոդով, որ հանկարծ իրենք որևէ տիպի հարցի առաջ չկանգնեն, որովհետև երբևէ որևէ մեկին չեն հարցնում, թե ինչու ծանր, խիստ հոդվածով դատապարտեցիք, ինչի պատիժը ծանր տվեցիք, իսկ եթե մի փոքր մեղմ է լինում, բոլորի մոտ հարցադրումներ են առաջանում այդ կապակցությամբ: Այս պատճառով այսօր ունենք այն, ինչ ունենք, բոլորը փորձում են հնարավորինս, հատկապես հնչեղություն ունեցող գործերով, ծանր կամ խիստ պատիժներ կայացնել»,- ասաց փաստաբանը:
Նման համոզման հանգելու համար Ե. Սարգսյանը վառ օրինակ է համարում իր պաշտպանյալի՝ Դավիթ Սարգսյանի գործով ՀՀ Վերաքննիչ քրեական դատարանում ընթացող դատավարությունը:
«Նախորդ դատական նիստի ժամանակ, երբ դատարանը ճշտում էր Դավիթ Խաչատրյանի դիրքորոշումը, ականատես եղանք, որ դատավորներից յուրաքանչյուրը, երբ հարցեր էին տալիս Դավիթին, բացարձակապես որևէ օբյեկտիվ դիտորդի մոտ չէր կարող տպավորություն լինել, որ այստեղ նրանք արդեն իսկ մեղադրական դիրքորոշում չունեն դեռևս գործը չավարտված: Դավիթին մեղադրող տեքստով հարցեր էին տալիս: Ակնահայտորեն վկայում էր, որ իրենք համոզված են, որ այդպիսի դեպք տեղի է ունեցել, այն դեպքում, երբ որ այս փուլում նման դիրքորոշում ունենալու ու ցույց տալու իրավունք չունեն»:
Հիշեցնենք, որ ըստ նախաքննության տվյալների, 2013-ի մայիսի 15-ին զորամասի 1-ին պահակախմբի մուտքի դիտորդ, նույն զորամասի ԿՍ-19 ժամկետային զինծառայող, շարքային Դավիթ Խաչատրյանը վիճաբանության մեջ էր մտել պահակախմբում ընդգրկված ԿՍ-19 ՀԴՆ-ի ժամկետային զինծառայող, շարքային Լյուքս Ստեփանյանի հետ, որի ժամանակ շարքային Դ. Խաչատրյանն իրեն ամրակցված ԱԿՄ տեսակի ինքնաձիգից կրակել է շարքային Լ. Ստեփանյանի ուղղությամբ: Արդյունքում վերջինս գլխի շրջանում ստացած հրազենային վնասվածքից տեղում մահացել էր, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել էր հրազենային վնասվածք:
Խաչատրյանի նկատմամբ հարուցվել էր քրեական գործ` ՀՀ քրեական օրենսգրքի միանգամից երկու հոդվածներով` ՀՀ քր. օր-ի 104 հոդ-ի 2-րդ մասի 6-րդ կետի հատկանիշներով՝ «սպանությունը՝ շատերի կյանքի համար վտանգավոր եղանակով» և ՀՀ Քր. Օր.-ի 112 հոդվածի 1-ին մասի հատկանիշներով` «դիտավորությամբ մեկ ուրիշին մարմնական վնասվածք պատճառելը»:
Այս տարվա հուլիսի 4-ին Տավուշի մարզի ընդհանուր իրավասության դատարանի կայացրած դատավճռով Դավիթ Խաչատրյանը դատապարտվել 17 տարի ազատազրկման:
Երեմ Սարգսյանի՝ վերաքննիչ բողոքի բովանդակությունն է. «Ամբողջությամբ բեկանել և փոփոխել Տավուշի մարզի ընդհանուր իրավասության դատարանի` Դավիթ Խաչատրյանի վերաբերյալ կայացրած. դատավճիռը, Դավիթ Խաչատրյանին մեղավոր ճանաչել ՀՀ քր. օր-ի 373 հոդ. (Զենքի, ռազմամթերքի, պայթուցիկ նյութերի եվ պայթուցիկ սարքերի պահպանության պարտականությունը ոչ պատշաճ կատարելը կամ չկատարելը) 2-րդ և 3-րդ մասերով և նրա նկատմամբ նշանակել արդարացի պատիժ` նշված հոդվածների սանկցիաների սահմաններում, կամ Դավիթ Խաչատրյանին մեղավոր ճանաչել ՀՀ քր. օր-ի 104 հոդ. 1-ին մասով (Սպանությունը` ապօրինաբար մեկ ուրիշին դիտավորությամբ կյանքից զրկելը) և 120 հոդվածով (Անզգուշությամբ առողջությանը ծանր վնաս պատճառելը) և նրա նկատմամբ նշանակել արդարացի պատիժ` նշված հոդվածների սանկցիաների սահմաններում, կամ ամբողջությամբ բեկանել Տավուշի մարզի ընդհանուր իրավասության դատարանի 10.03.2014թ. կայացրած` ինքնաբացարկի միջնորդությունը մերժելու մասին որոշումը, բավարարել այդ միջնորդությունը և այդ հիմքով բեկանել 04.07.2014թ. դատավճիռը և քրեական գործն ուղարկել համապատասխան ստորադաս դատարան` նոր քննության, իսկ վերը նշված խնդրանքները չբավարարելու դեպքում նշանակված պատժի մասով բեկանել և փոփոխել 04.07.2014թ. դատավճիռը և նրա նկատմամբ նշանակել ՀՀ քր. օր-ի 104 հոդ. 2-րդ մասի 6-րդ կետով և 112 հոդ. 1-ին մասով սահմանված նավազագույն պատիժները»:
Վերաքննիչ դատարանում բողոքը քննում է դատավորների հետևյալ կազմը՝ Կարինե Ղազարյան, Գրիշա Մելիք-Սարգսյան, Գագիկ Ավետիսյան:
Նախորդող հրապարակումներ՝
Լյուքս Ստեփանյանին սպանելու համար դատապարված Դ. Խաչատրյանը ուզում է միայն իր արածի համար պատժվել
Լյուքս Ստեփանյանի գործով ամբաստանյալը դատապարտվեց 17 տարի ազատազրկման
Լյուքս Ստեփանյանի սպանության գործով նախաքննության արդյունքները գոհացրել են գլխավոր դատախազին
Երբեք մի ասեք` երբե՛ք. Փաստաբան Երեմ Սարգսյանը պատասխանում է գլխավոր դատախազին
Սեյրան Օհանյա՞նն է կայացրել Լյուքս Ստեփանյանի գործով դատավճիռը. Պաշտպանական ճառ
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
