Ձեր վստահելի աղբյուրը

«Հանրային հեռուստաընկերությունը ղումարի քարոզ է տանում և դա ակնհայտ երևաց Ֆուտբոլի առաջնության ժամանակ»,- Ազգային Ժողովում  դիմելով Հանրային հեռուստաընկերության տնօրեն Ռուբեն Ջաղինյանին` նշեց ՀԱԿ խմբակցության անդամ Նիկոլ Փաշինյանը:

«Ֆուտբոլի առաջնության ժամանակ իրականում միակ կոնկրետ բանը, որ դուք քարոզել եք, ցավոք սրտի խաղադրույքներն են` ամեն րոպե հայտարարվում էր, որ խաղադրույքը փոխվում է և այլն: Չի կարելի»,- նկատեց ընդդիմադիր գործիչը:

Նրա խոսքով` նման հեռարձակմանը հետևելիս ինքն ու շատ քաղաքացիներ որոշեցին Հանրայինով ֆուտբոլը չդիտել. «Ես հասկանում եմ, որ հնարավորություններ պետք է ստեղծվեն, բայց ոչ ամեն գնով»:

Ռ.Ջաղինյանը նախ նկատեց, որ չի կարծում, թե ամենը եղել է այնպես, ինչպես նկարագրում է Ն.Փաշինյանը, սակայն և խոստացավ, որ մյուս անգամ ավելի ուշադիր կլինեն:

«Հանրայինը ֆուտբոլը ցույց տվեց և բոլորս հնարավորություն ունեցանք հետևել խաղերին»,- ավելացրեց նա:

Ի դեպ, նախքան բուն հարցին անցնելը ընդդիմադիր պատգամավորը նշեց, որ դրական տեղաշարժեր նկատում է Հանրայինի գործունեության մեջ, սակայն Ն.Փաշինյանի գովեստին արժանացավ Հանրային ռադիոի աշխատանքը:

Ըստ պատգամավորի` Հանրային ռադիոն այսօր բավականին բարձր մակարդակի վրա է գտնվում, այդտեղ հավաքվել է իսկապես պրոֆեսիոնալ թիմ և միակ խնդիրը դրա հասանելիությունն է ՀՀ բոլոր հատվածներում: Իր հերթին Ռ.Ջաղինյանը նկատեց, որ արդեն ուրախացնում է, որ Նիկոլ Փաշինյանը ինչ-որ դրական փոփոխություններ տեսնում է: