Ձեր վստահելի աղբյուրը

Ջինս արտադրող հայտնի բրենդները մտածում են դրանց արդիականացման մասին` հաշվի առնելով վերջերս վաճառքում հայտնված Apple-ի նոր սմարթֆոնների չափսերը: Այս մասին գրում է «Լենտա. ռու»-ն:
 
Քանի որ iPhone 6-ը և iPhone 6 Plus-ը չեն տեղավորվում ջինսերի գրպաններում: Դժգոհություններին ի պատասխան մի քանի բրենդային արտադրողներ պատրաստակամություն են հայտնել ջինսերը համապատսխանեցնել գնորդների պահանջներին:

Նման պատրաստակամություն արդեն հայտնել են Levi's, Uniqlo, American Eagle, LL Bean, J Crew և Lee ապրանքանիշները: Թե երբ դրանք կհայտնվեն վաճառքում, առայժմ հայտնի չէ:

Նոր սերնդի սմարթֆոնները հայտնվեցին վաճառքում այս տարվա սեպտեմբերին, iPhone 6-ն ունի 138 մմ երկարություն, 67 մմ լայնություն, իսկ iPhone 6 Plus –ը՝ 158 մմ երկարություն, 78 մմ լայնություն:

Հիշեցնենք, որ Apple ընկերությունը վաճառքի առաջին երեք օրում տասը երկրում 10 մլն iPhone 6 և iPhone 6 Plus է կարողացել վաճառել: Նոր սերնդի սմարթֆոններն ընկերությունը ներկայացրել էր սեպտեմբերի 9-ին, ինչից հետո սեպտեմբերի 19-ին ԱՄՆ-ում, Ավստրալիայում, Մեծ Բրիտանիայում, Գերմանիայում, Կանադայում, Հոնկոնգում, Սինգապուրում, Ֆրանսիայում, Ճապոնիայում սկսվեց դրանց վաճառքը: Ուրբաթ, շաբաթ, կիրակի օրերին ընկերությանը հաջողվել է իրացնել 10 մլն սմարթֆոն: