Ձեր վստահելի աղբյուրը

«Քառյակը ոչ թե խնդրի լուծում է ուզում գտնել, այլ պարզապես ինչ-որ դիվիդենտներ է հավաքում, նյութ է հավաքում իրենց հանրահավաքներում խոսելու համար»,- Panorama.am-ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը` արձագանքելով այն հարցին, թե քառյակը հնարավոր է այսօր էլ արտահերթ նիստ նախաձեռնի, քանի որ նախօրեին ՀՀԿ-ն բոյկոտել էր և հնարավոր է արդյոք, որ քաղաքական մեծամասնությունը այդ դեպքում ևս տապալի արտահերթը իր չմասնակցելով:

Հիշեցնենք, խոսքը այսօր ուժի մեջ մտած «Շրջանառության հարկի մասին» օրենքին է վերաբերում, որից բողոքում են առևտրականները:

Վ.Բաղդասարյանը նշեց, որ իրենք հրավիրել են քաղաքական ուժերի ներկայացուցիչներին քննարկման, եկել են, քննարկել են, անգամ համաձայնություն են տվել, բայց մեկ էլ առանց իրենց կարծիքը հարցնելու ու քննարկելու արտահերթի օրակարգ են բերում. «Սա նշանակում է, որ նրանք ուղղակի չեն ցանկանում այս խնդրին լուծում տալ»:

ՀՀԿ խմբակցության ղեկավարը կարծիք հայտնեց նաև, որ արտահերթ նիստ հրավիրելը խորհրդարանական ընդդիմության կողմից ընդամենը ինքնանպատակ է, առավել ևս, որ մարդիկ այդ համակարգում դեռ չեն աշխատել և ինքը միանշանակ համոզված է, որ նախ հարկավոր է աշխատել մեկ-երկու ամիս, տեսնել, թե ինչ է առաջարկում համակարգը, նոր անալիզի ենթարկել բողոքները, թե ինչից են նրանք բողոքում. «Բայց քառյակը չի ցանկանում: Նրանք պարզապես ցանկանում են բոյկոտել, այդ թվում և որպեսզի բոյկոտվի արտահերթը, որ իրենք խոսելու բան ունենան»:

Ճշտող հարցին` եթե մեկ-երկու ամիս հետո բողոքները շարունակվեն, ապա պատրա՞ստ է ՀՀԿ-ն վերադառնալ այս հարցի քննարկմանը, Վ.Բաղդասարյանն ասաց, որ առևտրականների բողոքն այսօր փաստաթուղթ ներկայացնելն է առաջ քաշել, բայց դա կառավարության պահանջն է, որն էլ իրականացնելու է վերահսկողություն այդ իմաստով:

«Կառավարությունը վստահ է իր որոշումներում, որ առանց փաստաթղթի այլևս չի շարունակվելու գործընթացը: Այսինքն երկու տարբերակ է առաջ գալիս. կամ ձեռնարկատերերը պետք է ասեն, որ չեն ուզում հարկային դաշտում աշխատել, կամ որ չեն ուզում փաստաթուղթ ներկայացնել: Բնականաբար, չեն կարող առաջինն ասել, քանի որ անկարելի է նման բան ասելը, ասում են` փաստաթուղթ չենք տա, որովհետև սա խոշորների համար է արվում: Բայց կառավարությունն էլ հստակ ասում է` փաստաթուղթ պետք է ներկայացվի, իսկ եթե չեն ներկայացնի, ապա նոր կանդրադառնանք այդ հարցին: Իսկ եթե խնդիրներ առաջանան, ապա մեկ-երկու ամսում հեղափոխություն չի կատարվի, որևէ մեկը չի սննկանա կամ տնտեսական դաշտը դեֆոլտի չի ենթարկվի, այնպես որ կանդրադառնանք»,- տեղեկացրեց մեր զրուցակիցը ու նաև հարց հնչեցրեց` բայց ո՞ւր էր այդ նույն ընդդիմությունը երկու-երեք ամիս առաջ, ինչո՞ւ են հիմա բարձրաձայնում, իբրև թե խնդիրների մասին, երբ օրենքի ուժի մեջ մտնելուն մնում էր հաշված օրեր:

«Եթե մարդիկ իսկապես ուզում էին խնդիր լուծել, թող երկու ամիս առաջ գային ասեին, ոչ թե հիմա: Ասում եմ` դիվիդենտների պայքար է, ասելիք ունենալու պայքար, ուրիշ ոչինչ»,- հավելեց Վ.Բաղդասարյանը:

Հարակից հրապարակում`
Քառյակը չի հանձնվում` հնարավոր է նորից արտահերթ նիստ նախաձեռնեն