Ձեր վստահելի աղբյուրը

Panorama.am-ի բացառիկ հարցազրույցը ադրբեջանական գերությունից գիշերը վերադարձած Հակոբ Ինջիղուլյանի հետ:

-Հակոբ ջան, բարի վերադարձ: Ինչպե՞ս ես:
-Լավ, շատ լավ, շնորհակալ եմ: Տանն եմ, լավ եմ….

-Ե՞րբ պետք է գնաս բուժզննման:
-Հիմա պատրաստվում ենք, ժամը մեկին երևի կլինենք տեղում:

-Հակոբ, ինչ –որ առողջական խնդիր կա՞, որ առաջնային հենց դա կուզես բժիշկների ուշադրության կենտրոնում լինի:
-Հազս է տանջում:

-Իսկ կոտրվածք այս մեկ տարում ունեցե՞լ ես:
-Քիթս է ջարդած, չեմ կարողանում քթով շնչել, տանջվում եմ:

-Իսկ այլ կոտրվա՞ծք ունեցել ես:
-Ձեռքս է վնասված եղել, բայց հիմա անցել է:

-Ցավով եմ հիշեցնում, բայց գերություն ընկած Մամիկոն Խոջոյանին դաջել էին… քո պարագայում նման մոտեցում եղե՞լ է:
-Ես տեսել եմ youtube-ով… ոչ, ես դաջվածք չունեմ: Ուղղակի ինձ թևից սրսկել են, դա է անհանգստացնում:

-Վախենում ես, որ հնարավոր է դիզվառելիք լինի ներարկվա՞ծ:
-Չգիտեմ, բայց այնպես չի եղել, որ թմրանյութի ազդեցության տակ եմ եղել:

-Այսինքն` թմրանյութ չե՞ն ներարկել, այլ բան:
-Այո, թմրանյութ հաստատ չի եղել, որովհետև ես նորմալ եմ եղել:

-Ինչպե՞ս են քեզ վերաբերվել:
-Սկզբից շատ դժվար է եղել, շատ վատ էր… բայց հետագայում ամեն ինչ նորմալ էր:

-Որտե՞ղ են քեզ պահել սկզբում, երբ վատ է եղել վերաբերմունքը:
-Սկզբից Սարիջաղլու զորմասում: Հետո ռազմագաղութում, մի սենյակ էին տվել, այդտեղ էլ մնացել եմ:

-Հայ գերիներ քեզ հետ եղե՞լ են այդտեղ:
-Այո, 5 հոգանոց հայ ընտանիքը:

-Նրանց ճակատագրից հիմա տեղյա՞կ ես:
-Ոչ, բայց ես իրենց հետ առանձին, գաղտնի նամակագրական կապեր էի ունենում: Մեկ ասում էին, որ գան Հայաստան դատ է սպասվում, մեկ ասում էին, որ պահանջում են, որ մնան Ադրբեջանում, թե չէ կկախեն, բայց իրենք չեն ուզում մնալ Ադրբեջանում: Այդպես:

-Հակոբ, քո կարծիքով որ՞ն էր պատճառը, որ սկզբից վատ էին վերաբերվում, բայց հետո վերաբերմունքը փոխվեց:
-Երբ Կարմիր խաչից սկսում էին հաճախել ինձ մոտ, այդ ժամանակ սկսում էին ավելի լավ վերաբերվել:

-Ի՞սկ սնունդը:
-Ինչ ադրբեջանցի զինվորն ուտում էր, էն էլ ես էի ուտում: Դա էլ նման էր մեր բանակի սնունդին:

-Ամենադաժան բանը, որ եղել է այս մեկ տարում:
-Գերևարության ժամանակ որ ինձ խբել-ծեծել են: Կարող եմ ավելացումներ էլ անեմ..

-Իհարկե, ասա:
-Մաքրություն էլ եմ արել, հայհոյել էլ են, կապիկություններ են արել` ձեռք են առել ինձ:

-Ավելի շատ սպայական անձնակազմն էր վատ վերաբերվում, թե զինվորները:
-Չէ, մենակ սպայականը… սպաներից մի քանի հոգու կարող եմ մատների վրա հաշվել, որ մարդ են եղել:

-Կարեն Պետրոսյանի մահվան մասին իմացե՞լ ես այնտեղ:
-Ոչ: Նոր իմացա:

-Ինչ կուզեիր փոխել անցած մեկ տարում:
-Ուզում եմ շարունակեմ ծառայությունս, իսկ մնացածը հետո կերևա:

Հարակից հրապարակում`
Ադրբեջանական գերության մեջ գտնվող Հակոբ Ինջիղուլյանը վայրկյաններ առաջ վերադարձավ Հայաստան (տեսանյութ)