The American Interest. «Ժամանակն է պատժամիջոցներ կիրառել Ալիևի վարչակազմի նկատմամբ»
The American Interest առաջատար պարբերականը անդրադարձել է վերջին ամիսներին Ադրբեջանում տիրող մարդու իրավունքների զանգվածային խախատումներին և Ալիևի վարչակազմի հասցեին քննադատություններ հնչեցնող քաղաքացիական ակտիվիստների ձերբակալություններին:
Ըստ պարբերականի` օգտվելով այն առիթից, որ միջազգային հանրության ուշադրությունը վերջին ամիսներին սևեռված է Մերձավոր Արևելքում իսլամիստական ծայրեհեղականների գործողությունների, ինչպես նաև ուկրաինական ճգնաժամի վրա, Բաքվում Ալիևի վարչակազմը աննախադեպ բռնաճնշումներ է կիրառում քաղաքացիական հասարակության ներակայացուցիչների նկատմամբ: Այս համատեքստում պարբերականը առաջարկում է Ալևին դասել Եվրոպայի բռնապետներ համարվող Լուկաշենկոյի և Պուտինի շարքերում` նկատի ունենալով, որ վերջինս իր ռեպրեսիվ կեցվածքով նույնիսկ առաջ է անցել նրանցից:
«Վերջին աննախադեպ ձերբակալությունների արդյունքում այժմ Ադրբեջանում կա ավելի քան 100 քաղբանտարկյալ, որը մոտավորապես երկու անգամ ավելին է, քան Ռուսաստանն ու Բելառուսը միասին վերցրած: Բացի այս սահմռկեցուցիչ թվերից, ադրբեջանական իշխանությունները ավելի դաժան են դարձել քաղաքացիական հասարակության ներկայացուցիչների, վարչակազմի հասցեին քննադատություններ հնչեցնողների, ինչպես նաև ընդդիմադիրների նկատմամբ` այդ թվում Արևմտյան»,- գրում են հոդվածագիրները:
Վերջիններս նկատում են, որ Ալիևը խորապես արհամարհում է ոչ միայն Արևմտյան մի շարք կառույցների կողմից հնչեցվող քննադատությունները, այլ նաև ԱՄՆ նախագահ Բարաք Օբամային` անտեսելով վերջերս նրա կողմից հասարակական կազմակերպությունների գործունեության ոլորտը կարգավորող ադրբեջանական օրենսդրության քննադատությունը:
«Այս վտանգավոր միտումը կանխելու լավագույն տարբերակը Ալիևի վարչակազմի նկատմամբ հստակ պատժամիջոցների սահմանումը կլինի»,- առաջարկում են հոդվածագիրները:
Նրանք ահազագնում են, որ Ալիևն ու իր շրջապատը ամենաթողության մթնոլորտում այնքան առաջ են գնացել, որ նրանց բռնաճնշումների թիրախում են հայտնվում նույնիսկ ադրբեջանական ծագմամբ ԱՄՆ քաղաքացիները, իսկ որ ամենավատն է Ադրբեջանի կառավարության ներկայացուցիչների և նախագահի աշխատակազմի ղեկավար Ռամիզ Մեհդիևի թիրախում է հայտնվել արդեն հեռացող ԱՄՆ դեսպան Ռիչարդ Մորնինգսթարը:
«Այս ամիս Բաքու կատարած այցի ժամանակ Սենատի անդամներին նույնիսկ անվանել են «շներ» և «լրտեսներ» միայն այն բանի համար, որ վերջիններս հանդիպել են քաղաքական դրդապատճառներով ձերբակալված Խադիջա Իսմայիլովայի հետ»:
Ըստ հոդվածագիրների` Ալիևի վարքագիծը պայմանավորված է նավթից և գազից ստացվող գումարներով, որոնցով նա միաժամանակ և միջազգային հանրության ուշադրությունն է շեղում երկրի ներքին գործերից և այդ ամենը կոծկելու համար արտասահմանում իրեն պաշտպանող «բարեկամներ» գտնում:
Եզրափակելով` հեղինակները նշում են, որ Ալիևի վարչակազմին ԱՄՆ-ն և Արևմուտքը պետք է հասկացնեն, որ ինչպիսին էլ լինի միջազգային իրադրությունը, միևնույնն է իրենց ռեպրեսիվ գործողությունները չեն կարող անհետևանք մնալ:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
