Ձեր վստահելի աղբյուրը

«ԴիջիԹեք էքսպո-2014» տեխնոլոգիական ցուցահանդեսում տարեցտարի արձանագրվում է ոչ միայն քանակական փոփոխություններ, այլ նաև որակական: Ամեն տարի մասնակցող ընկերությունները նորույթներ են բերում, ամեն տարի զարմացնում են բոլորիս»,- ցուցահանդեսի բացման արարողությունից հետո լրագրողների հետ ճեպազրույցում ասաց «ԴիջիԹեք էքսպո»-ի կազմակերպիչ Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը:

Նշենք, որ այսօր տրվեց 10-րդ հոբելյանական «ԴիջիԹեք էքսպո-2014» տոխնոլոգիական ցուցահանդեսի մեկնարկը: Երեք օր շարունակ շուրջ 130 ընկերություն ներկայացնելու է իր արտադրանքը: Ցուցահանդեսի պաշտոնական բացմանը ներկա է եղել ՀՀ նախագահ Սերժ Սարգսյանը, ՀՀ-ի տեխնոլոգիական ոլորտի ընկերությունների տնօրեններ, միջազգային ու պետական կառույցների ղեկավարներ:

Կ. Վարդանյանը տեղեկացրեց, որ հոբելյանական ԴիջիԹեք-ի շրջանակում անցկացվում են մի շարք միջոցառումներ, որոնցից են «Ռոբոտներն առօրյայում» փառատոնը, որի մասնակիցները ինժեներական խմբակների սաներն են, համակարգչային և բջջային խաղերի հեքեթոնը, որի ընթացում խաղեր նախագծող թիմերը հատուկ ընտրված թեմայով խաղ են ստեղծելու: Ցուցահանդեսի շրջանակում գործում է աշխատանքի տոնավաճառ, որտեղ ՏՀՏ և բիզնես ոլորտի ընկերությունները ներկայացում են թափուր աշխատատեղերը, տեխնոլոգիական ոլորտի մասնագետների համար անցկացվում է ԴիջիԼայֆ սեմինարներ, որի շրջանակներում այցելուները հնարավորություն ունեն ծանոթանալ ամենավերջին տեխնոլոգիական լուծումներին, հանդիպել Հայաստանի ՏՏ լիդերներին:

«Այս տարիների ընթացքում, կարծում եմ, ԴիջիԹեքը դարձել է բարձր տեխնոլոգիական Հայաստան ստեղծելու մեր ամենակարևոր գործիքներից մեկը»,- ասաց Կ. Վարդանյանը:

Որակական փոփոխության մասին խոսելիս, նա նշեց, եթե տարիներ առաջ ներկայացված էին ընկերություններ, որոնք համակարգչային տեխնիկա էին վաճառում, ապա այսօր նման որևէ ընկերություն չկա, ավելի շատ համակարգչային լուծումներ առաջարկող ընկերություններ են:

Կ. Վարդանյանը տեղեկացրեց, որ հոբելյանական ԴիջիԹեքին շատ լավ նվեր է մատուցվել. «Չորս օր առաջ Մեխիկոյում տեղի էր ունենում Ինֆորմացիոն տեխնոլոգիաների համաշխարհային կոնգրեսը, որտեղ որոշում է ընդունվել, որ 2019 թվականին համաշխարհային կոնգրեսն անցկացվելու է Երևանում: Սա մեծ հաջողություն է մեր երկրի համար: Նման մեծության միջոցառումներ մեզ մոտ քիչ են լինում»: