Խադիջա Իսմայիլովա. Յունուսին գումարները փոխանցվել էին ոչ թե Հայաստանից, այլ Եվրամիությունից
Եվրոպայի խորհրդի խորհրդարանական վեհաժողովի աշնանային նստաշրջանի շրջանակներում Ստրասբուրգում տեղի ունեցավ քննարկում՝ «Աննախադեպ ճնշումները Ադրբեջանում» թեմայով։ Քննարկումը կազմակերպել էին International Media Support (IMS), Human Rights House Foundation (HRHF), ԵԽԽՎ պատգամավորներ Թինի Կոքսը, Մայքլ ՄաքՆամարան, Պիտեր Օմցիգը, Մայլիս Ռեպսը։ Քննարկմանը մասնակցում էր նաև Ադրբեջանի ընդդիմադիր հետաքննող լրագրող Խադիջա Իսմայլովան։
Ինչպես հայտնում է Panorama.am-ի թղթակիցը Ստրասբուրգից, Պիտեր Օմցիգն ասել է, որ ներկայումս Ադրբեջանում կա 95 քաղաքական բանտարկյալ։ Վերջին ամիսներին ճաղերի հետևում հայտնվեցին այն իրավապաշտպանները, ովքեր համագործակցում էին ԵԽ-ի հետ։ Աննախադեպ ռեպրեսիաները սկսվեցին հատկապես ԵԽ-ում Ադրբեջանի նախագահության ժամանակ, որը փորձ արեց լռեցնել բոլոր քննադատող ձայները։
Խադիջա Իսմայիլովան կրում էր Ինթիգամ Ալիևի նկարով շապիկ, ով Ադրբեջանում հայտնի իրավաբան է, այդ թվում նաև իր, սակայն այժմ հայտնվել է ճաղերի հետևում։ Իսմայիլովան, ով որպես լրագրող անդրադարձել է Ալիևի, նրա կնոջ, աղջիկների ունեցած բիզնեսներին, ասաց, որ ինքը ևս մշտապես սպառնալիքներ է ստանում։
Խադիջա Իսմայիլովան նաև ԵԽ պատգամվորներին մեղադրեց Ադրբեջանում ստեղծված իրավիճակի համար։
«Երբ Մամեդյարովն ու Ալիևը ելույթ են ունենում ԵԽԽՎ-ում և հայտարարում, որ Ադրբեջանում չկան քաղաքական բանտարկյալներ, նրանք ցիտում են հենց ձեր կողմից 2013թ-ին կատարված քվեարկությանը, որով պատգամավորները դեմ քվեարկեցին քաղաքական բանտարկյալների վերաբերյալ Շտրասերի բանաձևին։ Այդ օրը առանձնահատուկ էր քվեարկությանը մասնակցած պատգամավորների քանակով, չգիտեմ ինչ էր տեղի ունեցել, բայց հույս ունեմ, որ այն կապված չէր փողի և խավիարային դիվանագիտության հետ։ Պատգամավորները իրենց քվեարկությամբ հաշվի չեն առնում, թե ինչպիսի վտանգ կարող է այն ունենալ այլ մարդկանց վրա։ Եվ Իլհամ Ալիևը հայտարարում է, որ ԵԽ-ն հաստատեց, որ Ադրբեջանում չկան քաղաքական բանտարկյալներ։ Եվ զարմանալիորեն Եվրոպայի խորհրդից ոչ մեկ չասաց, որ այդ բանաձևի տապալումը չէր նշանակում, որ Ադրբեջանում չկան քաղաքական բատարկյալներ։ Եվ եթե դուք չեք հասկանում այդ ուղերձը՝ գնացեք՝ կրթվեք»։
Խադիջա Իսմայլովան հիասթափություն է համարում լռությունը՝ ասելով, որ ԵԽ-ն ոչ թե երկխոսության կոչ պետք է անի, այլ պահանջի Ադրբեջանից կատարել իր ստանձնած պարտավորությունները և ազատ արձակի քաղբանտարկյալներին։
Անդրադառնալով Լեյլա Յունուսի ձերբակալմանը՝ Խ.Իսմայիլովան ասաց, որ մի շարք մեղադրանքների հետ նրան առաջադրվել է նաև պետական դավաճանության մեղադրանքը, թե իբր Լեյլա Յունուսը լրտեսություն է կատարել Հայաստանի օգտին և գումարներ ստացել Հայաստանի հատուկ ծառայություններից։
«Սակայն, ստուգելով Լեյլա Յունուսի հաշվեհամարները, պարզվել է, որ այդ գումարները փոխանցվել են ոչ թե Հայաստանից, այլ Եվրամիությունից։ Ահա, թե ինչպես են Ադրբեջանի իշխանությունները խարխլում Ադրբեջանի եվրոպական ինտեգրացիան։ Մենք աշխատում ենք մեր երկրի բարօրության համար և շատ ցավալի է, որ Յունուսին համարում են Հայաստանի լրտես, ինձ անվանում էին ԱՄՆ-ի լրտես»,-ասաց Իսմայիլովան։
Խադիջա Իսմայիլովան վերջում ասաց, որ վերադառնալու է Ադրբեջան՝ չնայած 2 օր առաջ իր նկատմամբ բացված քրեական գործին և կալանքի հրամանին։
Նշենք նաև, որ քննարկմանը ներկա էին ադրբեջանցի երիտասարդ ակտիվիստները, ովքեր կրում էին Ադրբեջանում քաղաքական բանտարկյալների նկարներով շապիկներ։
Նախորդող հրապարակում`
ԵԽԽՎ անկաշառ պատգամավորները փորձում են բացահայտել Ադրբեջանի կողմից կաշառվածներին
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
