Ձեր վստահելի աղբյուրը

Ուղիղ տասը տարի առաջ Հայաստանում առաջին անգամ ծնվեցին երեխաներ, որոնք լույս աշխարհ էին եկել շնորհիվ արտամարմնային բեղմնավորման: Երեքն են՝ երկու աղջիկ և մեկ տղա՝ Գեորգին, Աննան և Նանան: Նրանք ծնվել են Հայաստանում, բայց ապրում են Վրաստանում՝ Մառնեուլում: Այսօր նրանք կրկին եկել էին Հայաստան՝ Երևանում կազմակերպված գիտապրակտիկ կոնֆերանսին մասնակցելու համար:

«13 տարի երեխա չէինք ունենում: Քույրս այստեղ էր բնակվում: Կապ հաստատեցի այստեղի բժիշկների հետ: Շնորհիվ մեր բժիշկների, մենք այսօր ունենք երեք երեխա: Ես հավատում էի, որ նման արդյունք կլինի: Անցել է տասը տարի: Կրկին այստեղ ենք: Շնորհակալ ենք հրավերի համար»,- լրագրողներին պատմեց եռյակի մայրը՝ Կարինա Մայսուրաձեն:

Եռյակը լույս աշխարհ է եկել «Մոր և մանկան առողջության պահպանման գիտահետազոտական կենտրոն»-ում: Կենտրոնի տնօրեն, պրոֆոսոր Գեորգի Օկոևն ասաց. «Այսօր մեր երկրի և մեր կենտրոնի համար նշանակալի օր է: Տասը տարի առաջ ծնվեցին մեր առաջին երեխաները` եռյակ, որոնք լույս աշխարհ եկան շնորհիվ արտամարմնային բեղմնավորման»:

Նա նաև ասաց, որ այսօր կրկնակի տոն է, որովհետև մեկ տարի առաջ ի շնորհիվ «Արագիլ» հիմնադրամի, լույս աշխարհ եկան ևս առաջին երեխաները, որոնք կրկին եռյակ են:

Նշենք, որ «ԱՐԱԳԻԼ» վերարտադրողական բժշկության աջակցության հիմնադրամը շահույթ ստանալու նպատակ չհետապնդող կազմակերպություն է, որը հիմնադրվել է 2011թ.-ին: Հիմնադրամի նպատակն է աջակցել Հայաստանի ժողովրդագրական խնդիրների լուծմանը և վերարտադրողական բժշկության կազմակերպումը: Հիմնադրամը գործում է Հայաստանի նախագահի տիկնոջ՝ Ռիտա Սարգսյանի բարձր հովանու ներքո:

Գ. Օկոևն ասաց, որ այսօրվա գիտապրակտիկ կոնֆերանսին մասնակցում են առաջատար մասնագետներ Ֆրանսիայից, Ռուսաստանից, Ուկրաինայից, Վրաստանից, ովքեր կիսվելու են իրենց փորձով՝ արտամարմնային բեղմնավորման տեխնոլոգիաների մասին, իսկ հայ մասնագետներն էլ իրենց փորձով: Գիտաժողովին ներկա էր նաև ՀՀ նախագահի տիկին Ռիտա Սարգսյանը: 

Պատասխանելով հարցին, թե Հայաստանում ի՞նչ արդյունքների են հասել արտամարմնային բեղմնավորման հարցում, պրոֆեսորն ասաց. «Կարող ենք արձանագրել հարյուրավոր երեխաներ, որոնք լույս աշխարհ են եկել, կարող ենք արձանագրել բոլոր նոր տեխնոլոգիաները, որոնք այսօր օգտագործվում են: Ի շնորհիվ դրանց, մենք կարող ենք հպարտանալ և ասել, որ Հայաստանն աշխատում է այն ստանդարտներով, որոնք ընդունված են զարգացած բոլոր երկրներում»:

Գ. Օկոևի խոսքով, նախորդ տարվանից կտրուկ աճել է այդ մեթոդին դիմող ընտանիքների թիվը. «Եվս մեկ անգամ կուզեի ընդգծել, որ դա շնորհիվ «Արագիլ» հիմնադրամի է: Այն բազմաթիվ ընտանիքների թույլ տվեց, ովքեր չէին էլ փորձում մտածել, որ կարող են այս թանկարժեք մեթոդի օգնությանը դիմել, այսօր և՛ դիմում են, և արդեն կան բազմաթիվ երեխաներ»:

Հարցին, թե այս միջոցին դիմած զույգերից քանի՞ տոկոսն է երեխա ունենում, նա պատասխանեց. «Ամբողջ աշխարհում ստանդարտ կա, մոտավորապես 37-38 տոկոսի դեպքում է ավարտվում ծննդաբերությամբ: Սա այն ռեալ թիվն է, որով ավարտվում են ծննդաբերությամբ»:

Այսօր, ըստ նրա, արդեն դիմում են ընտանեկան այնպիսի զույգեր, որոնց մոտ խնդիրը կապված է տղամարդկանց հետ:

Բժշկական գիտությունների դոկտոր, պրոֆեսոր, «Արագիլ» հիմնադրամի հոգաբարձուների խորհրդի անդամ Կարինե Թոխունցն էլ իր խոսքում ասաց. «Մենք այսօր հպարտությամբ պետք է ներկայացնենք մեր արդյունքները: Կատարված է արդեն արտամարմնային բեղմնավորման 140 ցիկլ, որոնց արդյունքում ծնվել է 28 երեխա և տվյալ պահին զարգացող 55 հղիություն: Արդյունքները լավն են»:

Նա նաև հայտնեց, որ «Արագիլ» հիմնադրամն արդեն հերթագրում է երկրորդ փուլը, մարդիկ կարող են դիմել: Կարինե Թոխունցը հիշեցրեց, որ դիմողներն անպայման պետք է բժշկից ուղեգիր ունենան:

Նշենք, որ Հիմնադրամին կարող են դիմել այն զույգերը, որոնց միասնական եկամուտը ամսական 200 հազար դրամը չի գերազանցում: Դա պարտադիր պայման է։ Բացի այդ, զույգն անպայման պետք է ուղեգիր ունենա արտամարմնային բեղմնավորում (ԱՄԲ) իրականացնող բժշկական որևէ հաստատությունից, ինչը կհաստատի, որ տվյալ զույգին ցուցված է ԱՄԲ: Զույգերի ներկայացած փաստաթղթերը ստուգվում է ՀՀ աշխատանքի և սոցիալական հարցերի նախարարությունում, որից հետո հիմնադրամի կողմից զույգերը ուղեգրվում են 4 վերարտադրողական կենտրոններից մեկը: 

Միջոցառմանը ներկա էր Քնարիկ Վարդանյանն իր երեք աղջիկների՝ Աննայի, Էլենի, Դիանայի հետ, ովքեր արդեն մեկ տարեկան են: Նրանք լույս աշխարհ են եկել հենց «Արագիլ» հիմնադրամի օգնությամբ:

«Երջանիկ ենք: Շատ երկար ենք սպասել: Իհարկե, դժվար է պահել երեք երեխա, բայց արդեն սովորել ենք»,- պատմեց աղջիկների մայրը:

Առողջապահության նախարար Արմեն Մուրադյանն էլ ողջունեց դահլիճում գտնվող երեխաներին ու նրանց ծնողներին:

«Ուրախ եմ բոլորիդ ողջունել այս հիշարժան օրը: Առանձնահատուկ ուրախություն եմ ապրում, երբ դահլիճում տեսնում եմ այն երեխաներին, որոնք ծնվել են այս ազնվաբարո գործունեության արդյունքում: Տասը տարի առաջ առողջապահական համակարգի մեծ աշխատանքի արդյունքում Հայաստանում ծնվեց առաջին արտամարմնային երեխան: Մեկ տարի առաջ էլ ծնվեց եռյակ այն հիանալի հիմնադրամի հետ համագործակցության արդյունքում, որը ղեկավարում է Ռիտա Սարգսյանը: Հայաստանում այսօր կիրառվում են բոլոր առաջատար տեխնոլոգիները, որոնք կիրառվում են առաջադեմ բժշկական կենտրոններում: Մեծ հաջողություն է մեր երկրի համար: Մեր կանայք այլևս կարիք չունեն մեկնել արտասահման և այնտեղ սպասել իրենց մայրանալու իրավունքին»,- ասաց նախարարը: