HRW. «Թուրքիան մարդու իրավունքների պաշտպանության ոլորտում զգալի հետընթաց է գրանցել»
Human Rights Watch միջազգային իրավապաշտպան կազմակերպությունը «Հետընթացը մարդու իրավունքների ոլորտում և բարեփոխումների առաջարկները» վերտառությամբ զեկույց է հրապարակել, որտեղ անդրադարձ է կատարված վերջին տարիներին Թուրքիայում մարդու իրավունքների և ազատությունների երաշխավորման ոլորտում արձանագրված լուրջ թերացումներին:
Զեկույցի համաձայն` իշխանության գտնվելու տարիներն «Արդարություն և զարգացում» կուսակցությունը ցույց է տվել քաղաքական ընդդիմության, հանրային դժգոհության և քննադատական մոտեցում ունեցող մամուլի նկատմամբ օրեցօր աճող անհանդուրժողականություն:
«Մամուլի ազատության սահմանափակումները, բողոքի ցույցերի ճնշումը և քրեական դատական համակարգի քաղաքականացումը բերել են երկրում մարդու իրավունքների պաշտպանության ինստիտուտի քայքայմանը` միաժամանակ ավելի խորացնելով երկրում առկա քաղաքական բևեռացվածությունը»,- նշված է զեկույցում:
Human Rights Watch-ը անդրադարձել է նաև կոռուպցիոն վերջին սկանդալներին` նշելով, որ «Արդարություն և զարգացում» կուսակցությունը ամեն ինչ արել է հետաքննությանը խոչընդոտելու համար, նույնիսկ ձերբակալվել են հետաքննություն իրականացնող իրավապահ համակարգի ներկայացուցիչները` այսպիսով լուրջ վտանգի տակ դնելով երկրում օրենքի գերակայության սկզբունքը:
Զեկույցում առանձնահատուկ ուշադրություն է հրավիրված մամուլի ազատության սահմանափակումների և լրագրողների նկատմամբ տարբեր բռնաճնշումներ կիրառելու պրակտիկայի վրա, որը վերջին տարիներին Թուրքիայում մեծ չափերի է հասել և հաճախ կիրառվում է անձամբ Էրդողանի կողմից:
Փաստաթղթի խորհրդատվությունների բաժնում իրավապաշտպան կազմակերպության մասնագետները առաջարկում եմ ԱՄՆ-ին և ԵՄ-ին` Թուրքիայի հետ հարաբերություններում անկյունաքարային դարձնել մարդու իրավունքների պաշտպանության անհրաժեշտությունը և հիշեցնել Թուրքիային, որ տարածաշրջանային կայունությունը մեծապես կախված է նաև այդ իրավունքների պաշտպանության բարձր մակարդակից:
Քաղաքական դրդապատճառներով ձերբակալությունների շարքում HRW-ն անդրդարձել է նաև հայազգի լեզվաբան Սևան Նիշանյանին, ում թուրքական կառավարության կողմից մեղադրանք է առաջադրված քրեական օրենսգրքի 216-րդ դրույթով` իբրև «ժողովրդի մի մասի կրոնական զգացմունքները հրապարակայնորեն ծաղրելու» համար:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
