Ձեր վստահելի աղբյուրը

«Պարզ է, որ հանդիպումը պետք է ունենա որոշակի օրակարգ, որում պետք է լինեն ոչ միայն այն սկզբունքները, որոնք մինչև այդ եղել են բանակցային սեղանին, այլ նաև հնարավորություն պետք է տա կողմերին արձագանքել գոյություն ունեցող փաստաթղթին»,- ասուլիսում հայտարարեց քաղաքագետ Ալեքսանդր Մարկարովը` անդրադառնալով հոկտեմբերի վերջին Փարիզում կայանալիք Հայստանի, Ադրբեջանի և Ֆրանսիայի նախագահների հնարավոր հանդիպմանը:

Հիշեցնենք, որ եռակողմ հանդիպման մասին խոսակցությունները շրջանառվում են, սակայն հստակություն այս իմաստով դեռ չկա:

Ա.Մարկարովը ավելացրեց, որ առայժմ կարելի է խոսել բավականին մինիմալ սպասելիքներից, որոնք կարող են լինել բանակցային գործընթացի ընթացքում առկա հարցերի վերաբերյալ: Ըստ նրա` փաստ է, որ բանակցային գործընթացում մենք մնում ենք այն տեղում, որտեղ եղել ենք մի քանի տարի առաջ և հիմնական պատճառը հակառակորդի ոչ արդյունավետ մոտեցումն է:

«Ադրբեջանական կոպիտ պահվածքը առայժմ չի ներշնչում կողմերի միջև վստահության ամրապնդում` շատ լավ հիշում ենք, որ այն առաջարկները, որոնք վերաբերվում էին թե շփման գծում դիպուկահարներին, թե մնացած այլ հարցերին չեն ստանում դրական արձագանք: Բանակցային գործընթացը շարունակվում է, դա որոշակի դրական էլեմենտ է իր մեջ պարունակում, բայց բացասականը կայանում է նրանում, որ ստատուս-քվոն չի ենթարկվում փոփոխության, ինչպես մենք նախատեսում ենք, ինչը մեզ համար գերակա առաջնահերթություն է»,- նշեց նա:

Ինչ վերաբերում է Մինսկում կայանալիք գագաթաժողովին, ապա ըստ քաղաքագետի` կա որոշակի հավանականություն, որ ընթացքը կբերի նրան, որ Հայաստանը միավորվի ԵՏՄ-ին ու հունվարից սկսած գործառնության մեջ կդրվեն այն փաստաթղթերը, որոնք վերաբերվում են Հայաստանին: