Ձեր վստահելի աղբյուրը

Առողջապահության նախարարության աշխատակազմի Պետական հիգիենիկ և հակահամաճարակային տեսչության Այրում-Ջիլիզայի սանիտարական- կարանտինային կետի արդեն նախկին պետ Մարտին Մկրտչյանը դիմել է դատարան՝ իրեն նյութական պատասխանատվության ենթարկելու մասին՝ ՀՀ առողջապահության նախարարության աշխատակազմի ղեկավարի այս տարվա մարտի 3-ի հրամանն անվավեր ճանաչելու պահանջով:

«Ես ամեն դեպքում հավատում եմ մեր դատական համակարգին: Ինքս օրինապաշտ մարդ եմ, երբևէ չեմ խուսափի պատասխանատվությունից, եթե մեղավոր լինեմ: Պարզապես պետք է ապացուցել, որ ես մեղավոր եմ, ոչ թե առանց հիմքի, առանց օրենքը կիրառելու հրաման արձակեն: Սա է ինձ վրդովվեցնում»,- Panorama.am-ի հետ զրույցում ասաց Մ. Մկրտչյանը:

Նա պատմեց, որ 2013 թ. Այրում-Ջիլիզայի սանիտարական-կարանտինային կետի պետն էր: Այդ ժամանակ Վրաստանում կարմրուկի բռնկումներ կային: Մեղրիի սանիտարական-կարանտինային կետից Այրում էին տեղափոխել ոչ կոնտակտային հեռավորության վրա ջերմությունը չափող սարք: Բավականին երկար ժամանակ օգտագործել են: Նույն տարվա սեպտեմբերի սկզբին Իրանում խոլերայի դեպքեր էին գրանցվել:

«Վերևից ասացին, որ այդ սարքը նորից հետ ուղարկենք: Երեկոյան ես ծառայողական մեքենայով այդ սարքը տեղափոխեցի: Վարորդ ունեի, սակայն նա հեռու էր բնակվում, դժվար էր երեկոյան ժամերին հասնել Այրում: Ես ունեմ վարորդական իրավունք:
Գիշերով տարել հանձնել եմ մեր կենտրոնին: Վերադառնալիս Նոյեմբերյանի վտանգավոր հատվածում տեղի ունեցավ դժբախտ դեպք: Վազանց կատարող դիմացի մեքենայից փախցրել եմ մեքենաս ու բախվել եմ ժայռին: Կորցրել եմ գիտակցությունս: Ուղեղի ցնցումով և կողերի կոտրվածքով տեղափոխվել եմ հիվանդանոց: Հաջորդ օրը զանգահարեցին կենտրոնից, ասացին, որ որևէ խնդիր չկա, քո առողջության մասին մտածիր: Նոյեմբերյանի քրեական բաժնում գործ էր հարուցվել: Քանի որ հանցակազմ չկար, քրեական գործը մերժելու մասին որոշում էր կայացվել: Որոշման մեջ մի քանի հետաքրքիր կետ կար: Առողջապահության նախարարություն հարցում էին արել: Պատասխանել էին, որ Մարտին Մկրտչյանից պարտք ու պահանջ չունեն՝ անկախ հասցված նյութական վնասի չափից»,- մանրամասներ ներկայացրեց նա:

Բուժում ստանալուց հետո Մ. Մկրտչյանին տեղափոխում են Երևան: Այժմ աշխատում է առողջապահության նախարարության աշխատակազմի առողջապահական պետական տեսչությունում որպես գլխավոր մասնագետ:

«Դեպքից անցնում է վեց ամիս: Առողջապահության նախարարության աշխատակազմի ղեկավարը (Սուրեն Քրմոյան) հրաման է արձակում իմ հասցրած նյութական վնասի փոխհատուցման մասին ու հենց մարտից սկսում են բռնագանձել իմ աշխատավարձից: Ես հանկարծակիի եկա, որովհետև երբ քննիչը գործն ուղարկել էր նախարարություն պարզելու՝ արդյոք անհամաձայնություն ունեն գործը կարճելու հետ կապված, որևէ բողոք, անհամաձայնություն չէին հայտնել, ինչպես արդեն ասացի, գրել էին որ պարտք ու պահանջ չունեն: Աշխատակազմի ղեկավարին գրում եմ, թե ինչ հիմքով է նման հրաման արձակել, ուղարկում են փաստաթուղթ, որտեղ մի շարք հարցեր սխալ էին մեկնաբանված»,- ասաց նա, ապա ներկայացրեց մի քանի փաստ:

Դեպքը տեղի է ունեցել սեպտեմբերի 26-ին: Նոյեմբերյանի լիցենզավորված փորձագիտական խումբը հոկտեմբերի 7-ին տվել է փորձագիտական եզրակացություն վնասի մասին: Նրանք մանրամասն նկարագրել են, թե մեքենայի որ մասն է վնասվել, ինչ աշխատանք պետք է կատարվի վերանորոգման համար, շուկայական արժեքը կազմել է 1 միլիոն 46 հազար դրամ:

«Վեց ամիս անց աշխատակազմի ղեկավարի հրամանում նշված է, որ ինչ-որ «Հայկ Գևորգյան» ԱՁ- ի կողմից անցկացվել է փորձաքննություն, որտեղ նույնիսկ հարկային կոդ չկա նշված: Ըստ այդ փորձաքննության, վնասը կազմում է 2 միլիոն 284 հազար: Թե ինչպես է այդ վեց ամսվա ընթացքում 1 միլիոնը դարձել 2 միլիոն, չգիտեմ: Այդ ընթացքում մեքենան ինձ մոտ չի եղել: Հնարավոր է, որ այդքան կազմի: Միգուցե այդ ընթացքում թալանել են մեքենան: Նախքան նման հրամանի արձակումը, պետք է ապացուցվեր իմ մեղավորությունը: Աշխատանքային օրենսգրքով նախատեսված է, թե որ դեպքերում, անգամ, եթե վնաս է պատճառվում, ինչ չափով կարող են ինձնից գումար բռնագանձել: Իրենք այդ եղանակով չեն գնացել: Չնայած մեղավորության ապացուցման հիմք կա: Պետավտոտեսչությունն առանց փորձաքննություն կատարելու վերցրել էր քրեական գործը մերժելու մասին որոշումը, դրա հիման վրա ինձ տուգանել 30 հազար դրամ: Չգիտեմ՝ ինչի համար: Գրված չէ որևէ խախտում, այլ ճանապարհային երթևեկության կանոնները չպահպանելը: Բայց թե ինչ կանոն չեմ պահպանել, պարզ չէ: Վճարեցի այդ գումարը, քանի որ բողոքարկելու համար պետք է գնայի Նոյեմբերյան: Առողջական խնդիրներ ունեի, չգնացի ու վճարեցի տուգանքը, որպեսզի չեռապատկվեր, չհնգապատկվեր: Հիմա դա հիմք են ընդունում, որ ես մեղավոր եմ: Ենթադրենք մեղավոր եմ, բայց օրենքով նախատեսում է ամբողջությամբ վնասի փոխհատուցում այն դեպքում, եթե վարորդը խմած է եղել, թմրանյութի ազդեցության տակ է եղել: Իմ դեպքում նման բան չկա: Թող դիմեին դատարան, վճիռ կայացվեր, որ ես մեղավոր եմ: Ըստ օրենքի, այդ դեպքում նախատեսվում է բռնագանձում աշխատավարձի եռապատիկից ոչ ավելի: Իսկ իրենք 2 միլիոնից ավելի են որոշել ինձանից բռնագանձել ու բռնագանձում են: Ինձնից պարտադրաբար պահում են այդ գումարը, քանի որ իրենք են տալիս աշխատավարձ: Սակայն ուր է գնում այդ գումարը չգիտեմ, քանի որ մինչև օրս այդ մեքենան վերանորոգված չէ»,- ասաց դատարան դիմած Մ. Մկրտչյանը:

Նա նշեց, որ որևէ տեղ գրված չէ, որ վթարը տեղի է ունեցել հենց իր մեղքով և չի հասկանում, թե ինչու են այսօր իրեն ուռճացած թվերով անհիմն փաստաթղթեր ներկայացրել ու գանձում են գումար՝ այդպես իր ընտանիքին նյութական ծանր վիճակի մեջ դնելով: