Ձեր վստահելի աղբյուրը

Եվրոպայի և Եվրասիայի հարցերով ԱՄՆ պետքարտուղարի օգնական Վիկտորիա Նուլանդը, ելույթ ունենալով Կիևում Տ. Շևչենկոյի անվան համալսարանի ուսանողության առջև, հայտարարել է, թե ԱՄՆ-ն պատրաստ է չեղյալ համարել Ռուսաստանի նկատմամբ սահմանված պատժամիջոցները, վերջինիս կողմից Մինսկում ձեռք բերված ուկրաինական հակամարտության կարգավորմանը միտված պայմանավորվածությունների կատարմանը զուգընթաց: Այս մասին տեղեկացնում է «Իտառ-Տասս» գործակալությունը:

Գնահատելով Ուկրաինայի արևելան շրջաններում առկա իրավիճակը, Նուլանդը կարևորել է հրադադարի ռեժիմի պահպանումն ու ռուս-ուկրաինական սահմանի երկայնքով ուկրաինական ուժերի վերահսկողության անհրաժեշտությունը:

«Հրադադարի գոտում հնարավոր է որոշ տարածքների փոխանակում և եթե դա կօգնի կրակի դադարեցմանը, ապա մենք կաջակցենք այդ նախաձեռնությանը ևս», - ասել է նա:

Ամերիկացի պաշտոնյան անդրադարձել է նաև Ուկրաինայի՝ ՆԱՏՕ-ին անդամակցության հեռանկարներին, հայտարարելով թե «դաշինքի դռները բաց են ցանկացած երկրի համար, որը կհամապատասխանի գործող չափորոշիչներին»:

«Ներկայումս Ուկրաինան օրենքով ամրագրել է արտադաշինքային կարգավիճակը: Ձեզանից է կախված՝ անվտանգության կազմակերպման ինչ միջոցներ է անհրաժեշտ ձեռնարկել», - ասել է Նուլանդը:

Պատասխանելով Ուկրաինայի՝ ՆԱՏՕ-ից դուրս ԱՄՆ հատուկ դաշնակցի կարգավիճակ ստանալու հնարավորությանը, Նուլանդն ասել է, թե Ուկրաինան «արդեն իսկ օգտվում է նման համագործակցության առավելություններից»` հիշատակելով,  մասնավորապես, ուկրաինական զինծառայողների վերապատրաստումն ու համատեղ զորավարժությունների հանգամանքը: