Ձեր վստահելի աղբյուրը

Վենետիկի հանձնաժողովը քննարկել է Հայաստանի սահմանադրական բարեփոխումների հայեցակարգի նախագիծը ու տվել իր եզրակացությունը, որը բաղկացած է 87 կետից: Վերջին կետում կարդում ենք՝ «Վենետիկի հանձնաժողովն ուրախ կլինի շարունակել համագործակցել Հայաստանի իշխանությունների հետ այս կարևոր բարեփոխումներն իրականացնելու գործընթացում»:

Վենետիկի հանձնաժողովի եզրակացության ու Հայաստանի Սահմանադրական բարեփոխումների հանձնաժողովի առաջիկա քայլերի մասին Panorama.am-ը զրուցել է հանձնաժողովի անդամ Գևորգ Դանիելյանի հետ:

-Պարոն Դանիելյան, հոկտեմբերի 10-11-ը Վենետիկի հանձնաժողովը լիագումար նիստում քննարկել է Հայաստանի սահմանադրական բարեփոխումների հայեցակարգի նախագիծը, ի՞նչ եզրակացություն է տվել հանձնաժողովը:
-Վենետիկի հանձնաժողովի եզրակացությունը դրական է, միաժամանակ, դրանում արտացոլված են որոշ նկատառումներ, որոնք Հայաստանի Սահմանադրական բարեփոխումների հանձնաժողովի կողմից համարժեք ընդունվել են և կատարվել անհրաժեշտ շտկումներ: Ի դեպ, Վենետիկի հանձնաժողովի եզրակացությունն արդեն զետեղված է այդ կառույցի կայք-էջում, այն բավականին ծավալուն է, բաղկացած է 87 կետից:

-Կառավարման խորհրդարանական համակարգին անցում կատարելու վերաբերյալ ի՞նչ դիրքորոշում է հայտնել Հանձնաժողովը:
-Վենետիկի հանձնաժողովի դիրքորոշումը ևս ելակետ է ընդունել այն, որ խորհրդարանական կառավարման ձևն առավել նախընտրելի է իրավաքաղաքական զարգացումների ներկա փուլում մեր երկրում կուտակված հիմնախնդիրների լուծման և ժողովրդավարական ինստիտուտների կայացման ու արմատավորման տեսանկյունից: Ընդ որում, նշված եզրակացության մեջ ևս արտացոլված է այն գաղափարը, որ կառավարման ձևի ընտրության հարցը կարող է վերջնական տեսքով լուծում ստանալ միայն քաղաքական ուժերի փոխադարձ համաձայնության դեպքում:

-Նախօրեին կայացել է Հայաստանի Սահմանադրական բարեփոխումների հանձնաժողովի նիստը, կոնկրետ ի՞նչ հարցեր են քննարկվել:
-Նախ, հանգամանորեն քննարկվել է Վենետիկի հանձնաժողովի նշված եզրակացության հիման վրա լրամշակված նախագիծը, իսկ վերջնական արդյունքներով անցկացվել է բաց քվեարկություն, և կոնսեսուսով հավանության է արժանացել նշված փաստաթուղթը: Ըստ էության, բավականին բուռն քննարկումներ են եղել, առանձին հարցադրումների առնչությամբ հնչել են անգամ իրարամերժ տեսակետներ, սակայն քննարկումների ընթացքում փոխհամաձայնեցված լուծումներ գտնվել են: Որոշվել է այն, արդեն վերջնական լրամշակված տեսքով ներկայացնել Հանրապետության նախագահին:

-Պարոն Դանիելյան, սահմանադրական բարեփոխումների հայեցակարգի նախագիծը ե՞րբ է ներկայացվելու Հայաստանի նախագահին:
-Սահմանված ժամկետին՝ հոկտեմբերի 15-ին:

-Նախագահի կողմից հայեցակարգի նախագիծը հավանության արժանանալուց հետո ի՞նչ գործընթացներ են նախատեսվում: Եվ ի՞նչ է սպասվում հավանության չարժանանալու դեպքում:
-Հավանության արժանանալու դեպքում կսկսվեն քաղաքական քննարկումներ՝ նկատի ունենալով, որ մի շարք էական հարցադրումների շուրջ նախապայման է համարվել քաղաքական փոխհամաձայնությունը: Իսկ համապատասխան վերապահումների դեպքում մասնագիտական հանձնաժողովը կվերանայի փաստաթուղթը և արդեն այդ նկատառումներով ձեռնամուխ կլինի Սահմանադրության տեքստի նախագծի մշակման աշխատանքներին:

-Պարոն Դանիելյան, սահմանադրական բարեփոխումները նախագիծը հաստատվելուց հետո ե՞րբ կլինի հանրաքվե:
-Նախատեսված աշխատանքների բնականոն ընթացքի պարագայում հանրաքվեն նախատեսված է 2016 թվականի աշնանը: